سامال ەسلياموۆا: مەن جۇلدىز ەمەسپىن، جۇلدىز اسپاندا

استانا. قازاقپارات - كانن فەستيۆالىنىڭ جەڭىمپازى، ءارتىس سامال ەسلياموۆا الداعى جوسپارلارى تۋرالى ايتىپ بەردى. بۇگىن ول اقوردادا ق ر پرەزيدەنتى نۇرسۇلتان نازاربايەۆپەن بولعان كەزدەسۋگە قاتىستى، دەپ حابارلايدى قازاقپارات ءتىلشىسى.

كەزدەسۋ كەزىندە مەملەكەت باسشىسى ءارتىستىڭ الداعى جوسپارلارى جايىندا سۇرادى.

سامال ەسلياموۆانىڭ ايتۋىنشا، مامىر ايىندا ءبىر كوركەم فيلم بار. ال جازدا قىتاي، موڭعوليا مەن كاندا بىرلەسىپ تۇسىرەتىن ءبىر جوبا قولعا الىنادى.

 «قۇداي قالاسا، سوعان تۇسەمىن دەپ جوسپارلاپ وتىرمىن» ، - دەدى س. ەسلياموۆا. ءارتىس شەتەلدە جۇرگەندە تۋعان جەرىنىڭ اسپانىن قاتتى ساعىنادى ەكەن.

 «ءوزىم الەمنىڭ قاي مەملەكەتىندە بولسام دا، ءارقاشان قازاقستانعا ۇلكەن قۋانىشپەن، ۇلكەن باقىتپەن ورالامىن. ەلىمدى، ونىڭ اسپانىن قاتتى ساعىنامىن. ءبىزدىڭ اسپانىنداي اسپان باسقا جەردە جوق. سول اسپاندا بەيبىتشىلىكتىڭ تاڭى اتقانى ءۇشىن ءوز اتىمنان جانە حالىقتىڭ اتىنان مىڭ العىس ايتامىن» ، - دەپ اتاپ ايتتى س. ەسلياموۆا.

ال كەزدەسۋدەن كەيىن جۋرناليستەر س. ەسلياموۆاعا «جۇلدىز بولعان قالاي ەكەن؟ » دەگەن سۇراق قويدى. وعان سامال: «وي، مەن ءوزىمدى جۇلدىز دەپ سانامايمىن. مەن - كادىمگى اداممىن. جۇلدىز مەن ءۇشىن اسپاندا. ال مەن - اداممىن. ماماندىعىم اكتريسا عوي، وندايدا ادامدار تانىمال بولىپ جاتادى. ەندى، كوشەدە جۇرگەندە ادامدار تانىپ جاتادى، فوتوعا ءتۇسۋدى سۇرايدى. بۇل - زاڭدى نارسە. ءارتىس بولعاننان كەيىن ونداي بولادى» ، - دەپ جاۋاپ بەردى.

 ايتا كەتەيىك، كەزدەسۋ كەزىندە ق ر پرەزيدەنتى نۇرسۇلتان نازاربايەۆ بارشا انالار مەن قىز- كەلىنشەكتەردى 8 - ناۋرىز - حالىقارالىق ايەلدەر كۇنىمەن قۇتتىقتادى. «انانىڭ قۇدىرەتى شەكسىز. «ونىڭ الدىندا بۇكىل دۇنيە باس يەدى» دەپ تەگىن ايتىلماسا كەرەك. ەرتە زاماندا جاۋلاسقان جۇرتتىڭ ورتاسىنا انا اق جاۋلىعىن تاستاعان كەزدە سوعىس توقتالىپ، بىتىمگە كەلەتىن بولعانىن بىلەمىز. ءداستۇرىمىزدى بارىنشا ساقتاپ كەلە جاتقان ءبىز ايەل زاتىن اسىرەسە قادىرلەيتىن حالىقپىز. قازاق ۇلتى قىز بالانى ءار ۋاقىتتا الاقانىنا سالىپ، ايالاپ وتىراتىن. بۇل سالتىمىز وتباسى ءۇشىن بۇزىلماس زاڭدىلىققا اينالىپ كەلەدى. «انا» دەگەن قاستەرلى ءسوزدى ەستىگەندە تەبىرەنبەيتىن جۇرەك جوق، تولقىمايتىن كوڭىل بولمايدى» ، - دەيدى ن. نازاربايەۆ. مەملەكەت باسشىسى كوپبالالى وتباسىلارعا كومەك بەرۋ ماسەلەسىن قوزعادى. سونداي- اق، ەكى اناعا اناعا "التىن القا" مەن "كۇمىس القانى" سالتاناتتى تۇردە تاپسىردى. پرەزيدەنت وتباسىنىڭ ىنتىماعىن ساقتاۋدىڭ قۇپياسىمەن دە ءبولىستى.