شوكەيەۆ: تۇركىستانداعى قۇرىلىس كومپانيالار پايدانى ەمەس، ساۋاپتى ءىستى دە ەسكەرگەنى دۇرىس
بۇل تۋرالى قازاقپارات اكىمدىكتىڭ باسپا ءسوز قىزمەتىنە سىلتەمە جاساپ حابارلايدى.
باسقوسۋ بارىسىندا كومپانيا وكىلدەرى تۇركىستان قالاسىنداعى قۇرىلىس بارىسىن باياندادى.
«قازىرگى تاڭدا «BI group» حولدينگى تۇركىستان قالاسىندا 5 نىساننىڭ قۇرىلىسىن جۇرگىزۋدە. ولار: وبلىستىق اكىمدىك جانە باسقارمالار مەن دەپارتامەنتتەردىڭ عيماراتى، ورتالىق ستاديون، مەدياورتالىق، «استانا» الاڭى، «ۇلى دالا ەلى» ورتالىعى. وبلىستىق اكىمدىك عيماراتىن اعىمداعى جىلى اياقتاۋدى جوسپارلاپ وتىرمىز، ال باسقارمالار مەن دەپارتامەنتتەردىڭ عيماراتتارىن 2020 -جىلدىڭ ناۋرىز ايىندا پايدالانۋعا بەرەتىن بولامىز. ستاديون، مەدياورتالىق، «استانا» الاڭى مەن «ۇلى دالا ەلى» ورتالىعىنىڭ قۇرىلىس جۇمىستارى كەستە بويىنشا جۇرۋدە»، - دەدى ايدىن ءجۇمادىل ۇلى.
سونداي- اق، كومپانيا وكىلدەرى تۇركىستان قالاسىندا بوي كوتەرەتىن كوپقاباتتى تۇرعىن ءۇي القاپتارىنا ارنالعان «Smart city»سىندى اقىلدى قالا جوبالارىن تانىستىردى. وندا ءاربىر پاتەردىڭ جىلۋ، جارىق، اۋا تازالىعىن باقىلاپ وتىراتىن تسيفرلى تەحنولوگيالار قاراستىرىلعان.
وبلىس ورتالىعىنداعى قۇرىلىس جۇمىستارىنىڭ بارىسىمەن حاباردار بولعان ءوڭىر باسشىسى ءبىرقاتار تاپسىرمالار بەردى.
«تۇركىستاندا قۇرىلىس جۇمىستارىن جۇرگىزۋشى كومپانيالار تەك پايدانى عانا ويلاماي، ەلگە ساۋاپتى ءىستى دە ەسكەرگەنى دۇرىس. قاسيەتتى قالانى دامىتۋعا ۇلەس قوسۋدىڭ ءوزى ۇلكەن يگىلىكتى ءىس. باستىسى، جاڭا اكىمشىلىك ورتالىقتاعى بوي كوتەرەتىن عيماراتتار ۋاقىتىندا اياقتالۋى ءتيىس. سىرتقى كەلبەتى مەن ىشكى قۇرىلىمى زامان تالابىنا ساي بولۋى كەرەك. اقىلدى قالا جوباسىن الداعى ۋاقىتتا قولعا الىپ، سەرىكتەستىك تانىتاتىن بولامىز. سونداي- اق، ءتيىستى باسقارما باسشىلارىنا ينفراقۇرىلىم ماسەلەسىن دەر كەزىندە شەشۋدى تاپسىرامىن. تۇرعىن ۇيلەردى سالۋدا بارىنشا حالىققا قولجەتىمدى بولۋ جاعىن باستى نازاردا ۇستاۋىمىز قاجەت»، - دەدى ءومىرزاق ەستاي ۇلى.
