تۇركىستان وبلىسىندا كوپبالالى انالار كيەلى جەرلەرگە زيارات ەتىپ قايتتى
تولەبي اۋدانى اكىمدىگىنىڭ ۇيىمداستىرۋمەن وتكەن ساياحات بارىسىندا نازىكجاندىلار قاسيەتتى «دومالاق انا»، «ارىستانباب» جانە رۋحاني استانامىز تۇركىستان قالاسىنداعى قوجا احمەت ياساۋي كەسەنەسىن ارالاپ كوردى، دەپ حابارلايدى قازاقپارات ءتىلشىسى.
انالاردى جولعا شىعارىپ سالۋ راسىمىندە اۋدان اكىمى باۋىرجان وماربەكوۆ پەن اۋداندىق ءماسليحاتتىڭ حاتشىسى نۇرلان قويباعاروۆ ولاردى كەلە جاتقان مەرەكەمەن قۇتتىقتاپ، ءسات ساپار تىلەدى. وتباسىنىڭ كۇندەلىكتى شارۋاسى مەن بالا تاربيەسىن جانە قوعامدىق جۇمىستاردى قوسا اتقارىپ جۇرگەن ايەلدەر قاۋىمى وسىلايشا ساياحات جاساپ قايتتى. ولار ءۇشىن كيەلى تۇركىستان شاھارىندا تۇسكى اس ۇيىمداستىرىلىپ، ارنايى مەرەكەلىك كونتسەرت قويىلدى. سونداي-اق، «ورامال تون بولمايدى، جول بولادى» دەگەن ۇستانىممەن ءارقايسىسىنا اق جاۋلىق تارتۋ ەتىلدى.
مەرەكە قارساڭىندا بايدىبەك اۋدانىندا دا پوليتسەيلەر تۇرمىسى تومەن جانە كوپ بالالى وتباسىلارعا قايىرىمدىلىق جاسادى. ءتارتىپ ساقشىلارى ون اۋىلدىق وكرۋگىندە تۇراتىن 20 جانۇيانىڭ ۇيلەرىندە بولىپ، ازىق-تۇلىك زاتتارىن تاراتتى. پوليتسيا قىزمەتكەرلەرى بۇل قادامنىڭ باستى سەبەبى، اۋداندا تۇراتىن تۇرمىسى تومەن كوپبالالى وتباسىلارعا جانە ولاردىڭ بالالارىنا قۋانىش سىيلاۋ بولعانىن ايتادى. الداعى ۋاقىتتا اتالعان پوليتسيا ءبولىمى تاراپىنان وسىنداي قايىرىمدىلىق ءىس-شارالارى جالعاسىن تاپپاق.