قازاقتىڭ تاڭعى اسى برەندكە اينالادى

تۇركىستان. قازاقپارات - قازاقستاندا العاش رەت قازاق ۇلتتىق تاعامدارىنىڭ برەندى ەنگىزىلەدى. بۇل تۋرالى تۇركىستان قالاسىندا قازاق تاعامتانۋ اكادەمياسىنىڭ استانالىق ساراپشىلارى جانە وبلىستىڭ مەيرامحاناشىلارى مەن وتەلەرلەرى باس قوسقان جيىندا ايتىلدى، دەپ حابارلايدى قازاقپارات ءتىلشىسى.

تۇركىستان وبلىسىنىڭ تۋريزم جانە سىرتقى بايلانىستار باسقارماسى ۇيىمداستىرعان كەزدەسۋدە ساراپشىلار بولاشاق اسپازدىق ءحيتىن ەنگىزىپ، اس دايارلاۋ باعدارلاماسىنىڭ ەرەكشەلىكتەرىمەن تانىستى. ولاردىڭ ايتۋىنشا، ەندى ەلىمىزگە كەلگەن قوناقتار ەكولوگيالىق تازا ونىمدەردەن دايىندالعان «قازاق تاڭعى اسىنان» ءدام تاتاتىن بولادى.

بۇل تاعام مەيمانداردىڭ ءوز دەنساۋلىعىنا كوڭىل ءبولىپ، ەرەكشە نازار اۋداراتىن وتە پايدالى اس بولماق. ال، اس تىزىمىندە مىنانداي تاعامدار بار: تارىدان جاسالاتىن تويىمدى تاعامنىڭ ءبىرى - مايسوك، سۇزبە، ايران، قىمىز، قۇرت، جەنت. تاڭعى اس 3 توپتان تۇرادى: ءسۇت ونىمدەرى، كوكونىستەر مەن كەپتىرىلگەن جەمىستەر جانە پىسىرىلگەن تاعامدار. قازاق تاعامتانۋ اكادەمياسى ديسسەرتاتسيالىق كەڭەسىنىڭ مۇشەسى يۋريي سينياۆسكييدىڭ سوزىنشە، وڭتۇستىكتەن باستاۋ العان ناعىز قازاقتىڭ ۇلتتىق تاعامدارى قازاقستاننىڭ باسقا دا ايماقتارىنا تارالادى.

سونداي-اق، قازاقتىڭ جان دۇنيەسىن ءتۇسىنۋ ءۇشىن «قازاق تاڭعى اسىنىڭ» ءدامىن تاتۋ كەرەك. ويتكەنى، ونىڭ قۇرامى عاسىرلار بويى وزگەرىسسىز قالۋدا. وسىنىڭ ارقاسىندا ءوڭىردىڭ گاسترونوميالىق ەرەكشەلىكتەرىن عانا ەمەس، سونىمەن قاتار، حالىقتىڭ سالت-ءداستۇرى مەن مەنتاليتەتىمەن دە تانىسۋعا بولادى. ماسەلەن، قوناقجايلىلىق - قازاق حالقىنىڭ ەرتەدەن كەلە جاتقان قاسيەتتەرىنىڭ ءبىرى. قوناقتى جاقسى كوڭىلمەن قارسى الىپ، تورگە وتىرعىزۋ مەن داستارقان ازىرلەپ كۇتىپ الۋ دا قازاققا ءتان. يدەيا اۆتورلارى جوسپارلاعانداي، «قازاق تاڭعى اسى» قوناق ۇيلەردە، مەيرامحانالاردا جانە تۇركىستاننىڭ باسقا دا قوعامدىق تاماقتاندىرۋ مەكەمەلەرىندە بەرىلەدى.

ساراپشىلاردىڭ پىكىرىنشە، قازاق تاڭعى اسى برەندىنىڭ ەنگىزىلۋى شەتەلدەن كەلگەن تۋريستەردىڭ سانىن ارتتىرادى جانە قازاقستاندىقتاردى تۇركىستان وبلىسىنا ساياحاتتاۋعا قوسىمشا ىنتالاندىرادى.