موڭعوليا قازاقتارى مالعا شاپقان قار بارىسىنا تيىسپەي، تۇزگە قويا بەرگەن

استانا. قازاقپارات - موڭعوليانىڭ بايان- ولگەي اۋدانىندا مالعا شاپقان قار بارىسىن ماماندار تەكسەرىپ، قايتادان تۇزگە قويا بەردى.

بۇل تۋرالى فەيسبۋك پاراقشاسىندا ق ر ا ش م ورمان شارۋاشىلىعى جانە جانۋارلار الەمى كوميتەتىنىڭ باسپا ءسوز حاتشىسى ساكەن دىلداحمەت جازدى، دەپ حابارلايدى قازاقپارات ءتىلشىسى.

ەسكە سالا كەتسەك، بۇعان دەيىن ساكەن دىلداحمەت الەۋمەتتىك جەلىدە بەلگىسىز بىرەۋلەردىڭ قار بارىسىن ۇستاپ العانى تۋرالى ۆيدەو تاراپ كەتكەنىن، قازىرگى ۋاقىتتا ماتەريال زەرتتەلىپ جاتقانىن جازعان ەدى. فەيسبۋكتە تاراعان ۆيدەودا قازاق تىلىندە سويلەگەن ءبىر توپ ادامنىڭ قار بارىسىن ۇستاپ العانى كورىنىپ تۇر. وسىعان بايلانىستى وقيعا قازاقستاندا بولعان دەگەن بولجام پايدا بولعان ەدى.

بۇگىن ساكەن دىلداحمەت جەلىدە تاراعان اتالمىش ۆيدەونىڭ ءمان-جايى انىقتالعانىن جاريا ەتتى.

«موڭعوليالىق سايان ت ۆ تەلەارناسى اتالعان جاعداي بويىنشا ارنايى رەپورتاج جاساپتى. 2019 -جىلدىڭ اقپان ايىنىڭ سوڭىندا قازاقتار تۇراتىن موڭعوليانىڭ بايان-ولگەي اۋدانىندا قار بارىسى مالعا شاۋىپ، اقىرى ۇستالىپ قالعان. الايدا ءتۇز تاعىسىن ەشكىم ولتىرمەي، سارايعا(قوراعا - رەد.) قاماپ، تابيعات قورعاۋشىلارعا حابار بەرگەن. ماماندار قار بارىسىنىڭ جاعدايىن باعامداپ، تۇزگە قايتا قويا بەرىپتى. موڭعولياداعى قازاق باۋىرلارىمىزعا بۇل ەرلىگى ءۇشىن مىڭ دا ءبىر العىس. ءبىزدىڭ ازاماتتار ءۇشىن بۇل ۇلگى. موڭعوليادا جەرگىلىكتى تۇرعىندار قار بارىسىنا وتە قامقور»، - دەپ جازادى ساكەن دىلداحمەت.