ديماشتىڭ اكەسى ۇيلەنگەن كەزدەگى قىزىقتى وقيعاسىن ايتتى

  استانا. قازاقپارات - ديماش قۇدايبەرگەننىڭ اتا- اناسى «تۇنگى ستۋديا» باعدارلاماسىندا قوناق بولىپ، العاش تانىسقان كەزى مەن ۇيلەنگەن شاقتارى تۋرالى ايتىپ بەردى.

بۇگىندە ءۇش بالانى تاربيەلەپ وسىرگەن قانات پەن سۆەتا ايتبايەۆتار 1993 -جىلدىڭ تامىز ايىندا شاڭىراق كوتەرگەن. قانات ايتبايەۆ جۇرەگىن جاۋلاعان ارۋدى ەڭ العاش «قىز سىنى» بايقاۋىندا كەزدەستىرگەن.

 ءبىر- ءبىرىن ۇناتىپ، ءبىراز ۋاقىت قول ۇستاسىپ جۇرگەننەن كەيىن وتباسىن قۇرعان. ەڭ قىزىعى، ۇيلەنەتىن كەزدە اۋىل اجەلەرى كۇيەۋ بالانى جولداس جىگىتپەن شاتاستىرىپ العان.

«ەكەۋمىز دە ونەر ادامى بولعاننان كەيىن، كۇيەۋ بالا بولىپ بارعان كەزدە ۇستىمە كونتسەرتتىك كيىم كيىپ بارعانمىن عوي. قولىمدا دومبىرا. قاسىمدا ادىلبەك دەگەن جولداس جىگىت بار. ول قارا كوستيۋم، اق كويلەك، گالستۋكپەن كەلگەن»، - دەيدى قانات ايتبايەۆ.

«جول ۇزاق. كۇيەۋ جىگىت كەشىگىپ جاتتى. اۋىلدا اپالار قۇمالاق اشىپ كەتتى. جاقىنداپ قالدى دەپ قويادى. ءسويتىپ تۇرعان كەزدە اۋىلعا كولىكپەن جىگىت جولداس كىرىپ كەلەدى. قۇمالاق تاستاپ وتىرعان اپالاردىڭ ءبارى قارا كوستيۋم كيگەن جىگىتتى كۇيەۋ بالا دەپ ويلاپ، ادىلبەكتى قۇشاقتاپ، قاناتقا ەشكىم قاراماعان»، - دەپ جالعادى ونىڭ ءسوزىن سۆەتا ايتبايەۆا.

 كۇيەۋ جىگىت ۇزاق كىدىرمەستەن اق جاۋلىقتى اجەلەردى وزىنە قاراتقان.

«اپالار، - دەدىم، ءبارى جالت قارادى. كۇيەۋ بالا مەن، - دەدىم. شوپىلدەتىپ جولداسىمدى ءسۇيىپ جاتقان جەرىنەن ءبارى ماعان كەلدى»، - دەپ كۇلدى قانات ايتبايەۆ.

 «نە دەيدى قۇرىسىن، دومبىرا ۇستاپ كەلگەنگە تويعا ولەڭ ايتۋعا كەلگەن بالا ما دەسەك دەگەن ەدى»، - دەيدى سۆەتا ايتبايەۆا.