بالعىنبەك يماش «ونەر بارىسى» تۋرالى: سەرىك يبراگيموۆ ءبارىن جەڭەمىن دەپ وتىر

استانا. قازاقپارات - «ونەر بارىسى» جوباسىنىڭ اۆتورى، ايتىسكەر اقىن بالعىنبەك يماش ناۋرىز مەيرامى كەزىندە وتەتىن بىرەگەي تۋرنيرگە دايىندىق قالاي جۇرگىزىلىپ جاتقانىن ايتىپ بەردى، دەپ حابارلايدى قازاقپارات ءتىلشىسى.

«بيىل - جاستار جىلى دەپ جاريالانعاندىقتان، «رۋحاني جاڭعىرۋ» باعدارلاماسىنىڭ اياسىندا جاستارىمىزدى ۇلتتىق قۇندىلىقتارعا بۇرۋ، ۇلان بايتاق دالانى قالدىرىپ كەتكەن اتا-بابالارىمىزدىڭ قايسارلىعىن ناسيحاتتاۋ ماقساتىندا وسى جوبانى ۇيىمداستىرىپ وتىرمىز. ونەر سالاسىندا جۇرگەن انشىلەردىڭ، اقىندار مەن سىقاقشىلاردىڭ سەگىز قىرلى، ءبىر سىرلى ەكەنىن كورسەتكىمىز كەلەدى. جاستار قازىر جۇلدىزدارعا ەلىكتەيدى. ءبىز نەگە انشىلەردى ءبىر قىرىنان كورۋىمىز كەرەك. جۇرتتىڭ ءبارى كەز كەلگەن جوبا بولسا، مىندەتتى تۇردە انشىلەر قالمايدى ەكەن دەپ ايتىپ جاتادى. ءبىراق ءبىز ونەردىڭ بارلىق سالاسىنان ۇمىتكەرلەردىڭ بارىنە جول اشتىق»، - دەيدى جوبا اۆتورى استانادا وتكەن باسپا ءسوز ءماسليحاتىندا.

بالعىنبەك يماشتىڭ ايتۋىنا قاراعاندا تۋرنيرگە 18 ءانشى مەن اقىن تاڭداپ الىنعان.

«نۇرلان مۇسايەۆ دەگەن ماڭعىستاۋلىق بالۋان بىرنەشە جىل بۇرىن ءوز ءوڭىرىنىڭ ونەر بارىسى اتانعان. نۇرلانمەن بىرگە سولتۇستىك وڭىردەن شىققان الىبەك سەرعاليەۆ اتتى اقىن دا باعىن سىنايدى. «جاۋجۇرەك مىڭ بالا» دەگەن فيلم جاستارعا قالاي اسەر ەتكەنىن بىلەسىزدەر. باتىرلاردىڭ ءرولىن سومداعان جىگىتتەر ومىردە قانداي ەكەن دەگەن سۇراقتار دا سۇرالىپ جاتتى. ول جىگىتتەر وزدەرىنىڭ كينودا سومداعان كەيىپكەرلەرىمەن ەشقانداي ايىرماشىلىعى جوق ەكەنىن وسى جوبادا دالەلدەي الادى. سوندىقتان، سول فيلمدەگى باستى رولدەگى ءۇش جىگىت تە قاتىسقالى وتىر»، - دەيدى اقىن.

جوبا اۆتورى ءوز سوزىندە تاۋ حالىقتارى سەكىلدى قازاق بالالارىن دا جاس كەزىنەن باستاپ كۇرەسكە تاربيەلەۋ كەرەكتىگىن اتاپ ءوتتى.

«ءبىزدىڭ جاستارىمىزدىڭ ءبارى نەگە ءانشى بولۋعا قۇمار؟ بىزگە ۇلان بايتاق دالاسىن قورعايتىن، وتانىنا، وتباسىنا قورعان بولا الاتىن ازاماتتار كەرەك. «بالا بارىسىن» وتكىزسەك قالاي بولار ەكەن دەگەن دە وي كەلدى. ول دا جوبالاردىڭ ءبىرى. «جاس بارىس» سەكىلدى تۋرنيرلەردى تەليەۆيزيالىق جوبا قىلساق، قانشاما جاستاردى قازاق كۇرەسىنە تارتا الار ەدىك»، - دەيدى بالعىنبەك يماش.

جوبا اۆتورىنان باسپا ءسوز ءماسليحاتىندا ناقتى فاۆوريتتەر بار ما دەگەن سۇراق تا قويىلدى.

«جۇلدىزداردىڭ قاي-قايسىمەن سويلەسسەڭ دە، «ونەر بارىسى مەن بولامىن» دەپ وتىر. جىگىتتەردىڭ ءبارى جانىپ تۇر. جەڭىل سالماقتا اناۋ وسال، مىناۋ مىقتى دەمەي-اق قويالىق. كۇش اتاسىن تانىمايدى. كىشكەنتاي سەرىك يبراگيموۆتىڭ ءوزى «75 كەلىگە دەيىن ءبارىن يلەيمىن» دەپ وتىر. ءبىراق، اۋىر سالماققا كەلەر بولسا، فاۆوريتتەردىڭ قاتارىندا ەركەبۇلان دايىروۆ بار»، - دەيدى بالعىنبەك يماش.

ايتا كەتسەك، «ونەر بارىسى» دوداسى 21- ناۋرىزدا استاناداعى «داۋلەت» سپورت كەشەنىندە وتەدى.

ەسكە سالا كەتسەك، «ونەر بارىسى» رەسپۋبليكالىق ءتۋرنيرى وتەتىنىن كەشە حابارلاعان بولاتىنبىز.

جيىرماعا جۋىق بالۋان چەمپيوندىق بەلدىكتى ساراپقا سالادى. ولاردىڭ ىشىندە بىردە-ءبىر كاسىپقوي سپورتشى جوق. ءبىراق ولاردى بۇكىل قازاقستان حالقى تانيدى - تاتاميگە تانىمال ارتيستەر مەن مۋزىكانتتار شىعادى. انشىلەر، ايتىسكەرلەر، اكتەرلەر، ك ت ا- عا قاتىسۋشىلار ۇلتتىق سپورت تۇرىنەن شەبەرلىك بايقاسادى.

قايرات نۇرتاس، اباي ايازبايەۆ، سەرىك يبراگيموۆ، مەيىرجان تورەبايەۆ، امانگەلدى وتەشوۆ، اسىلحان تولەپوۆ، ارتۋر تولەپوۆ، ايان وتەپبەرگەن، نۇرلان مۇسايەۆ، ەركەبۇلان دايىروۆ، الىبەك سەرعاليەۆ، نۇربولات ابدۋللين، ارداق بايعابىل، عالىم ماحامبەتوۆ، اقبولات وتەباي، سىرىمبەت بيبوسىنوۆ، حاميت ەردەحان جانە باسقالارى بوز كىلەمدە بەلدەسەدى.