مينيستر ا ق ش- قا تىكەلەي اۋە رەيستەرى قاشان اشىلاتىنىن ايتتى

استانا. قازاقپارات - بيىل قازاقستان مەن ا ق ش اراسىندا ۇكىمەتارالىق كەلىسىم راسىمدەلەدى. سونىڭ نەگىزىندە تىكەلەي نيۋ-يورك قالاسىنا ۇشۋعا مۇمكىندىك بار، دەپ حابارلايدى قازاقپارات ءتىلشىسى.

ق ر يندۋستريا جانە ينفراقۇرىلىمدىق دامۋ ءمينيسترى رومان سكلياردىڭ ايتۋىنشا، مەملەكەت باسشىسىنىڭ تاپسىرماسىن ىسكە اسىرۋ اياسىندا بيىل «ەير استانا» اۋە كومپانياسىمەن بىرلەسە وتىرىپ، توكيو، نيۋ-يورك، شاڭحاي جانە الەمنىڭ باسقا دا ءىرى قالالارىنا اۋە قاتىناسىن اشۋ جوسپارلانىپ وتىر.

«بيىل ءبىز ا ق ش- قا ۇشۋ ءۇشىن اككرەديتتەۋ راسىمدەرىن باستايمىز. مينيسترلىك قازاقستان مەن ا ق ش اراسىنداعى اۋە قاتىناسى تۋرالى ۇكىمەتارالىق كەلىسىم جوباسىن دايارلادى، وعان بيىل ناۋرىز ايىندا قول قويۋ جوسپارلانىپ وتىر»، - دەدى ر. سكليار ۇكىمەتتىڭ بۇگىنگى وتىرىسىندا.

ونىڭ سوزىنە قاراعاندا، ازاماتتىق اۆياتسيا سالاسىندا جولاۋشى تاسىمالداۋ كورسەتكىشتەرى ءوسىپ كەلەدى. ماسەلەن، وتكەن جىلى قازاقستان ارقىلى ۇشقان ترانزيتتىك جولاۋشىلار سانى 900 مىڭ ادامعا جەتتى. بۇل 2017-جىلمەن سالىستىرعاندا 45 پروتسەنتكە ارتىق. ول كەزدە 620 مىڭ ادام بولعان.

«2020 -جىلى ترانزيتتىك جولاۋشىلاردىڭ سانى 1,6 ميلليون ادامعا جەتەدى دەپ وتىرمىز. بيىل ءبىرىنشى جارتىجىلدىقتا مەملەكەت باسشىسىنىڭ تاپسىرماسى بويىنشا بيۋجەتى تومەن تۇڭعىش ۇلتتىق «Fly Arystan» اۋە كومپانياسىن ىسكە قوسۋ جوسپارلانعان. ول العاشقى جىلى 1 ميلليونعا جۋىق جولاۋشىنى «ەير استانا» اۋە كومپانياسىمەن سالىستىرعاندا ەكى ەسە تومەن باعامەن تاسىمالدايدى دەگەن جوسپار بار»، - دەپ اتاپ كورسەتتى ر. سكليار.