ءجۇرسىن ەرمان زايىتوۆتىڭ ايتىسىن بەس-اق مينۋت كورسەتكەن تەلەارنالاردى سوكتى

 استانا. قازاقپارات - تانىمال قازاق اقىنى، ايتىس جاناشىرى ءجۇرسىن ەرمان قازىرگى قازاق تەلەۆيزياسىندا تسەنزۋرا ماسەلەسى كۇشىنە ءمىنىپ تۇرعانىن اشىپ ايتتى.

بۇل تۋرالى dalanews حابارلايدى.

ول وتكەن جىلى قىركۇيەكتە الماتىداعى المالى اۋدانىنىڭ 10 جىلدىعىنا بايلانىستى ايتىس وتكىزگەنىن، سول ايتىستى 14 ايدان كەيىن عانا ءۇزىپ-جۇلىپ كورسەتكەنىن ايتتى.

اقىننىڭ سوزىنشە، كەسىپ تاستايتىنداي بىرەۋدىڭ شامىنا تيەتىن ءسوز بولماعان.

ول تەلەارناداعى رەداكتورلىق جۇمىس كەزىندە ەكى اقىندى جىبەرگەنىمەن، باسشىلىق ءوز بىلگەندەرىن جاساعانىن جەتكىزدى.

ءجۇرسىن ەرمان وتكەن جىلى قازان ايىندا وتكەن استاناداعى حالىقارالىق ايتىس تا تسەنزۋرانىڭ سالدارىنان كوگىلدىر ەكراننان كورسەتىلمەگەنىن العا تارتتى.

ول «التىن دومبىرا» ايتىسىنداعى رينات زايىتوۆتىڭ ءسوزىن قيىپ تاستاعان تەلەارنالارعا دەگەن رەنىشىن ءبىلدىردى.

«التىن دومبىرا» ايتىسىن كەسىپ-كەسىپ، كليپكە اينالدىرىپ تاستاپتى. ريناتتىڭ ايتىسىنىڭ 5 مينۋتىن عانا بەرىپتى»، - دەدى ايتىس جاناشىرى.

اقىننىڭ سوزىنشە، تسەنزۋرا تەلەارنانىڭ ىشىندە وتىر.

ول مينيسترلىك تاراپىنان «كەسىڭدەر، پىشىڭدەر» دەگەن پارمەن بولماعانىن ايتادى.

ءجۇرسىن ەرمان رەداكتورلاردىڭ كولەڭكەدەن قورقامىن دەپ، ءسوز ونەرىنىڭ ءسانىن كەتىرگەنىن جاسىرمادى.

ەسكە سالا كەتسەك، ءجۇرسىن ەرمان ەلىمىزدە جىك-جىككە ءبولىنىپ، دومبىرانى «حارام» دەپ سانايتىن اقىنداردىڭ بار ەكەندىگىن ايتتى.