نۇرسۇلتان نازاربايەۆ شەتەلدىك تۋريستەرگە كەڭەس بەردى

استانا. قازاقپارات - قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ ەلگە العاش رەت كەلگەن شەتەلدىك تۋريستەرگە كەڭەس بەردى، دەپ حابارلايدى قازاقپارات.

پرەزيدەنت سۇحباتىنىڭ ءۇزىندىسىن ق ر پرەزيدەنتى تەلەراديوكەشەنى Facebook پاراقشاسىندا جاريالادى.

«بىرىنشىدەن، شەتەلدىك قوناقتارعا ءبىزدىڭ بيىك تاۋلارىمىزدى كورۋدى ۇسىنار ەدىم. ريۋكزاك اسىنىپ، كروسسوۆكي كيىپ، تاۋعا كەتۋ كەرەك. اسىرەسە، جاز مەزگىلىندە ەرەكشە سۇلۋ بولادى. ءوزىڭ جاسىل توبەدە تۇرساڭ، الدىڭدا قارلى شىڭدار كورىنەدى. قىسقى ۋاقىتتا تاۋلاردىڭ جىم-جىرت تىنىشتىعىن كورەر ەدى. اينالا اپپاق قار، جارقىراعان كۇن جانە جىلى اۋا رايى. سونداي-اق، قوناقتار تۇندە تاۋ ىشىندە جۇلدىزداردىڭ قانشالىقتى جاقىن بولاتىنىن دا كورۋى كەرەك»، - دەدى پرەزيدەنت جۋرناليست سۇراعىنا بەرگەن جاۋابىندا.

ەكىنشىدەن، مەملەكەت باسشىسى شەتەلدىك تۋريستەرگە شەتى مەن شەگى كورىنبەيتىن دالانى كورۋگە كەڭەس بەردى.

«ۇشىنشىدەن، كيىز ۇيگە كىرىپ، ۇلتتىق تاعامىمىز - قازاقشا دايىندالعان ەتتى جەپ، قىمىزدى ءىشىپ كورۋى كەرەك. ەتتى جەۋدىڭ دە ءوز جورالعىسى بار. ۇستەلگە وتىرعاندا الدىمەن ءشاي بەرەدى، وسىلايشا ادام اسقازانىن دايىندايدى»، - دەدى ن. نازاربايەۆ.

پرەزيدەنت قازاق دالاسى ارقىلى قىتاي يمپەرياسىنا بارعان يتاليالىق ساياحاتشى ماركو پولونىڭ جازبالارى جونىندە ايتىپ بەردى.

«تۇنگى ساعات 12 دە قازاقتار كەشكى اس ىشۋگە «جاتتى» دەيدى. سەبەبى، ول كەزدە بيىك ۇستەلدەر بولعان جوق، داستارحان باسىندا جاستىقتى شىنتاقتاپ جاتىپ، تاماق جەگەن. مالدى ايداپ اكەلىپ، ساۋىپ، جايعاستىرام دەگەنشە ساعات تۇنگى 12 بولاتىن شىعار. وركەنيەتتىڭ بارلىق اۋىرتپالىقتارىنان الىس، ناعىز ءومىر وسى»، - دەپ اتاپ ءوتتى پرەزيدەنت.

تورتىنشىدەن، مەملەكەت باسشىسى تۋريستەرگە اتتى ەرتتەپ ءمىنىپ، دالادا ات ۇستىندە شابۋدى ۇسىندى.

ەسكە سالا كەتەيىك، «Kazakh Tourism» ۇلتتىق كومپانياسىنىڭ حابارلاۋىنشا، 2018-جىلى قازاقستانعا 8,5 ميلليوننان استام شەتەلدىك تۋريستەر كەلگەن. بۇل 2017-جىلعى كورسەتكىشتەن %10 كوبىرەك.