يمپورتتىڭ ۇلەسىن ازايتامىز - اسقار مامين

استانا. قازاقپارات - ق ر پرەمەر-ءمينيسترى اسقار مامين وتاندىق تاۋارلاردىڭ كولەمىن ۇلعايتۋعا قاتىستى نەگىزگى مىندەتتەردى اتادى، دەپ حابارلايدى قازاقپارات ءتىلشىسى.

ۇكىمەت باسشىسىنىڭ ايتۋىنشا، جەتى جىلدان كەيىن يمپورتتىڭ ۇلەسى 59 پروتسەنتتەن 37 گە دەيىن تۇسەدى. ەسەسىنە وتاندىق تاۋارلاردىڭ كولەمى ارتادى. وسىعان بايلانىستى وڭدەۋشى كاسىپورىندارى ءارتاراپتاندىرۋ شارالارى جالعاسادى.

«2019-2025-جىلدارى ارالىعىندا 300 گە جۋىق جوبا ىسكە اساتىن بولادى. بولجامعا سايكەس، 2025-جىلعا قاراي قاراپايىم زاتتار ەكونوميكاسى تاۋارلارىن وڭدەۋ كولەمى 4 تريلليون تەڭگەدەن 9 تريلليون تەڭگەگە دەيىن ۇلعايادى. سول كەزدە بۇكىل قازاقستان بويىنشا 16 مىڭنان استام تۇراقتى جۇمىس ورنى قۇرىلادى. بۇل - اسا ماڭىزدى الەۋمەتتىك-ەكونوميكالىق مىندەت»، - دەدى ا. مامين.

ايتا كەتەيىك، وتكەن جىلى اقوردادا وتكەن جيىندا ق ر پرەزيدەنتى نۇرسۇلتان نازاربايەۆ ەكىنشى دەڭگەيلى بانكتەرگە قوسىمشا 600 ميلليارد تەڭگەنى ءبولۋدى تاپسىرعان بولاتىن. اتالعان قارجىعا وڭدەۋ ونەركاسىبى مەن شيكىزاتتىق ەمەس ەكسپورتقا ارنالعان جوبالاردى قارجىلاندىرۋ قاجەت.

«وتاندىق كاسىپورىندار ەكسپورتقا باسىمدىق بەرۋى كەرەك. حالىق ءجيى تۇتىناتىن تاۋارلاردى كوپتەپ شىعارىپ، قاراپايىم زاتتار ەكونوميكاسىن ويلاۋ قاجەت. اربىرەۋى ءوز مىندەتىن ورىنداپ، باسقا نارىقتارعا شىعۋعا تىرىسۋى شارت. سونىڭ ارقاسىندا ەكسپورتتىق الەۋەتىمىزدى عانا ەمەس، ىشكى نارىقتى دا وتاندىق تاۋارلارمەن تولتىرا الامىز»، - دەدى ن. نازاربايەۆ.