تۇركيا حالقى جەرگىلىكتى ونىمدەردى تاڭدايدى

 استانا. قازاقپارات - وتاندىق تاۋارلاردى تۇتىنۋ - ەل ەكونوميكاسىنا جاسالعان ەڭ ۇلكەن قولداۋ. تۇركيا رەسپۋبليكاسى ساۋدا مينيسترلىگىنىڭ جەرگىلىكتى ونىمدەردى ناسيحاتتاۋعا باعىتتالعان جاڭا ناۋقانى وسىلاي دەپ اتالادى.

 ەندى دۇكەن سورەلەرىندەگى ءاربىر تاۋاردا «جەرگىلىكتى ءونىم» نەمەسە «شەتەلدىك تاۋار» دەگەن تاڭبا بولۋى ءتيىس. تۇركيانىڭ دۇكەن سورەلەرىندەگى تاۋارلاردىڭ كەم دەگەندە 51 پروتسەنتى وتاندىق تاۋار. كەي جەرلەردە بۇل كورسەتكىش 90 پروتسەنتكە دەيىن بارادى. حالىقتىڭ جەرگىلىكتى ونىمدەرگە سۇرانىسى جوعارى.

 سەردار دەنيز، دۇكەن قوجايىنى:

- دۇكەندەگى تاۋارلاردىڭ 80 پروتسەنتكە جۋىعى جەرگىلىكتى ونىمدەر، 20 پروتسەنتى شەتەل تاۋارلارى. شەتەلدىك تاۋارلاردىڭ باسىم بولىگى ەلىمىزدە جاسالعان. ساۋدا سورەلەرىندەگى تاۋارلاردىڭ ورنالاسۋى دا ءارتۇرلى. ءبىز الدىمەن حالىق كوپ تۇتىناتىن، سۇرانىسقا يە تاۋارلاردى قويۋعا تىرىسامىز. تۇركيادا «تۇرىك جۇرتى ءۇشىن - تۇرىك تاۋارى» دەگەن تۇسىنىك قالىپتاسقان. جەرگىلىكتى تاۋارلاردىڭ ساپاسى وتە جوعارى. سوندىقتان تۇتىنۋشىلار باسقا ەلدىڭ تاۋارلارىن قاجەت ەتپەيدى.

 فاتما اينۇر بەسجي، تۇتىنۋشى:

- ۇنەمى تۇرىك تاۋارلارىن الامىن. ءبىر جاعىنان، ەلىمنىڭ ەكونوميكاسىنا ۇلەس قوسامىن، ەكىنشى جاعىنان، العان ءونىمنىڭ قۇرامىندا بوگدە قوسپالاردىڭ جوق ەكەنىن انىق بىلەمىن. باعاسى ءتيىمدى. ساپاسى جوعارى.

ساراي ەمينوعلۇ، تۇتىنۋشى:

 - ەلىمىزدە جاسالعاندىعى ءۇشىن جەرگىلىكتى ونىمدەردى الۋعا تىرىسامىن. سەبەبى، سەنىمدى ءارى ءدامى دە بىزگە ارنالعان. ءوزىمىزدىڭ ءونىم تۇرعاندا وزگەنىڭ تاۋارلارىن قايتەيىن؟ تۇرىك تاۋارلارى باسقا ەلدىڭ ونىمدەرىنەن ارتىق بولماسا، كەم ەمەس.

ەل ۇكىمەتى الداعى كۇندەرى دۇكەندەردە وڭىرلىك ساۋدا سورەلەرىن اشپاقشى. باستى ماقسات - ەلدىڭ 81 پروۆينتسياسىنىڭ ونىمدەرىن تانىتۋ. جەرگىلىكتى وندىرۋشىلەر اراسىندا باسەكەلەستىكتى ارتتىرۋ. ءونىم تۇرلەرىن كوبەيتۋ.

www.24.kz