كيىم ديزاينەرلەرىنىڭ العاشقى ۇلتتىق بايقاۋى وتەدى

استانا. قازاقپارات - قازاقستاندا تۇڭعىش رەت وتاندىق كيىم ديزاينەرلەرىنىڭ ۇلتتىق بايقاۋى وتەدى، دەپ حابارلايدى قازاقپارات ءتىلشىسى.

«اتامەكەن» ۇلتتىق كاسىپكەرلەر پالاتاسى مەن ايەلدەر كاسىپكەرلىگىن قولداۋ قورى ۇيىمداستىرعان «ALTYN OIMAQ» بايقاۋى باسەكەگە قابىلەتتى وتاندىق برەندتەردى قالىپتاستىرا الاتىن كاسىبي ديزاينەرلەردىڭ جاڭا بۋىنىن انىقتاۋعا مۇمكىندىك بەرەدى.

«اتامەكەن» پالاتاسىنان ءمالىم ەتكەندەي، بايقاۋ التى نوميناتسيا بويىنشا وتەدى:

- ۇلتتىق ويۋ- ورنەكپەن كومكەرىلگەن ىسكەرلىك كيىمنىڭ ۇزدىك ديزاينى؛

- ۇلتتىق ويۋ- ورنەكپەن كومكەرىلگەن سپورتتىق كيىمنىڭ ۇزدىك ديزاينى؛

- ۇلتتىق ويۋ- ورنەكپەن كومكەرىلگەن بالالار كيىمىنىڭ ۇزدىك ديزاينى؛

- ۇلتتىق ويۋ- ورنەكپەن كومكەرىلگەن ۇيگە ارنالعان تەكستيلدىڭ ۇزدىك ديزاينى؛

- ۇلتتىق ويۋ- ورنەكپەن كومكەرىلگەن اكسەرسسۋاردىڭ ۇزدىك ديزاينى؛

- سپورتتىق اياق كيىمنىڭ ۇزدىك custom-ديزاينى؛

بايقاۋ ءۇش كەزەڭنەن تۇرادى. العاشقى كەزەڭدە وتىنىمدەر بايقاۋدىڭ رەسمي سايتىنا 2019 -جىلدىڭ 4 - ناۋرىزىنان 15 - مامىرىنا دەيىن قابىلدانادى. ەكىنشى كەزەڭدە ۇمىتكەرلەر قوعامدىق ونلاين- داۋىس بەرۋگە قاتىسادى جانە ءۇشىنشى كەزەڭدە باس جۇلدە يەگەرى انىقتالادى.

ەسكە سالايىق، ەلباسى نۇرسۇلتان نازاربايەۆ وتاندىق جەڭىل ونەركاسىپ سالاسىن قولداۋ قاجەتتىگى تۋرالى بىرنەشە مارتە ايتقان بولاتىن. 2018 -جىلدىڭ 5 - قازانىنداعى جولداۋىندا كيىم تىگەتىن قازاقستاندىق كاسىپورىندارعا كومەك ءبىلدىرۋدى تاپسىردى.

 كەيىن، جەلتوقسان ايىندا وتكەن «يندۋستريالاندىرۋدىڭ ەكىنشى بەسجىلدىعى: قازاقستاندا جاسالعان» اتتى جالپى ۇلتتىق تەلەكوپىر بارىسىندا ەلىمىزدە تىگۋگە بولاتىن كيىم- كەشەك پەن تۇرمىستىق زاتتاردى يمپورتتاپ وتىرعانىمىزعا كەيىستىك تانىتتى.

بيىلعى 30 - قاڭتاردا پرەزيدەنت ۇكىمەت نازارىن وتاندىق كاسىپكەرلەردىڭ ونىمدەرىنە تاعى دا اۋداردى. اسىرەسە، جاستار جىلىنىڭ اشىلۋى كەزىندە ۇيىمداستىرىلعان كورمەدەگى ونىمدەردىڭ ساپالى ەكەنىن اتاپ ءوتتى.

اۆتور: ايجان سەرىكجان قىزى