اراب شەيحى قۇبىجىق كولىگىن كورسەتتى

 استانا. قازاقپارات - شەيح حاماد بين حامدان ءال ناحايان الەمدەگى ەڭ باي ادامدار قاتارىندا جانە ول ەكسكليۋزيۆ اۆتوكولىكتەردى جيناۋمەن تانىلعان.

ابۋ-دابي بيلەۋشى اۋلەتىنەن شىققان شەيح حاماد بين حامدان ءال ناحايان تاپسىرىس بويىنشا جاسالعان «الەمدەگى ەڭ ۇلكەن جول تالعامايتىن كولىكتى» كورسەتتى، - دەپ حابارلايدى Mirror.

«ترانسفورمەرى» فانتاستيكالىق فيلمىندەگى كولىكتەرگە ۇقساس تۋىندىنى دۋباي كونسترۋكتورلارى جاساپ شىعارعان. 11 مەترلىك جول تالعامايتىن كولىكتىڭ سالماعى شامامەن 24 توننا. كولىك امەريكالىق اسكەري Oshkosh M1075 تارتقىشى نەگىزىندە قۇراستىرىلعان. وندا 600 اتتىڭ كۇشى بار 15,2-ليترلىك Caterpillar ديزەل وتىنىمەن ءجۇرۋ قۇرىلعىسى ورناتىلعان. اۆتوموبيلدىڭ الدىڭعى بولىگى 40- جىلدارداعى جۇك ماشينالارىنان الىنعان، كابيناسى - قازىرگى Jeep Wrangler Unlimited، شامدارى - Ford Super Duty، ال ارتقى بامپەر - Dodge Dart. ون دوڭگەلەكتى قۇبىجىققا Dhabiyan اتاۋى بەرىلگەن. ونىڭ ەنى - 2,5 مەتر، بيىكتىگى - 3,2 مەتر. ونىڭ يەسى Instagram جەلىسىندەگى پاراقشاسىندا سۋرەتتەرىن جاريالادى. ەرەكشە اۆتوكولىكتىڭ قۇنى ناقتىلانباعان.

Kaz.tengrinews.kz