قازاقستان بيزنەسىنە اۋعانستاندا قانداي مۇمكىندىكتەر بار
«بۇگىن ۇكىمەت ساعاتىندا مينيستر قازاقستاندىق كومپانيا تەندەر ۇتىپ العانىن حابارلاعان بولاتىن. بۇل مەملەكەتتىك تەندەردى قارجىلاندىرۋ اۋعانستان ۇكىمەتى تاراپىنان ىسكە اسىرىلادى، سەبەبى ول جوبا بۇل ەل ءۇشىن باسىمدىقتى بولىپ وتىر. بولاشاقتا بارلىق تالاپتاردى ساقتاي وتىرىپ، قازاقستاندىق كومپانيالار ينۆەستور رەتىندە كىرۋى مۇمكىندىگىن جوققا شىعارمايمىز» ، - دەدى ە. اشىقبايەۆ پارلامەنت ماجىلىسىندە تىلشىلەر ساۋالىنا جاۋاپ بەرە وتىرىپ.
وسى ورايدا ول اتالعان ەلدەگى وزىندىك احۋالدى ەسكە الا وتىرىپ، قازاقستاندىق بيزنەسمەندەر ءۇشىن قاۋىپسىزدىككە تولىقتاي كەپىلدىك بەرۋ قيىن ەكەنىن اتاپ ءوتتى.
«ارينە، قاۋىپسىزدىك ماسەلەسى باسىمدىقتى باعىتتاردىڭ ءبىرى بولىپ وتىر. ءبىز جاعدايدى تىڭعىلىقتى زەردەلەپ، قازاقستاندىق كومپانيالارعا ۇسىنىستار بەرەمىز. بارىنشا قولايلى جۇمىس رەجىمىن قامتاماسىز ەتۋگە تىرىسامىز. وزدەرىڭىز تۇسىنەسىزدەر، قاۋىپسىزدىك بويىنشا 100 پايىزعا كەپىلدىك بەرۋ مۇمكىن ەمەس. اۋعانستان پروبلەماسى بويىنشا ۇزاقمەرزىمدى شەشىم جاسالعاندا عانا كەپىلدىك بەرۋگە بولادى» ، - دەدى ءمينيستردىڭ ورىنباسارى.
بۇدان بۇرىن حابارلانعانداي، قازاقستان اۋعانستانداعى تەمىرجول قۇرىلىسىنا ۇلەسىن قوسادى.
سونىمەن قاتار، ەلىمىز اتالعان مەملەكەت اۋماعىندا كەن ورىندارىن يگەرۋدى كوزدەپ وتىر.