قازاقستان اۋعانستان جەرىندە كەن ورىندارىن يگەرمەك

استانا. قازاقپارات - ق ر يندۋستريا جانە ينفراقۇرىلىمدىق دامۋ مينيسترلىگى اۋعانستانعا ەكسپورتتىق الەۋەتتىڭ مۇمكىندىگى تۋرالى ايتىپ بەردى، دەپ حابارلايدى قازاقپارات ءتىلشىسى.

«اۋعانستانعا ءونىم ەكسپورتتى 520 ميلليون دوللاردان استام بولدى. بۇل تۇرعىدا بيداي، ۇن، زىعىر جانە تابيعي گاز قامتىلدى. دەگەنمەن دە ءبىزدىڭ ەكسپورتتى تاعى دا 24 تاۋارلىق پوزيتسياعا ۇلعايتۋ مۇمكىندىگى بار. قازىرگى كەزدە وزبەكستان، تۇركىمەنستان جانە اۋعانستانمەن ارادا ءتيىستى كەلىسسوزدەر ءجۇرىپ جاتىر. ياعني بۇل تۇرعىدا ءبىزدىڭ ەكسپورتتىق ءونىمدى ورنالاستىرۋ ءۇشىن تەرمينالداردىڭ جۇكتەمەسىنە قاتىستى تالقىلاۋ بولدى»، - دەدى ۆيتسە- مينيستر تيمۋر توقتابايەۆ پارلامەنت ماجىلىسىندەگى ۇكىمەت ساعاتىندا.

 ونىڭ سوزىنە قاراعاندا، اۋعانستان اۋماعىندا جاڭا جۇك تەرمينالدارىنىڭ قۇرىلىسى پىسىقتالۋدا.

 «تەمىرجول جانە اۆتوكولىك كولىگىنە توقتالساق، بۇگىندە پرەسپەكتيۆالى جوبالاردىڭ بىرلەسكەن تىزبەسى قۇرىلۋدا. ءتيىستى قۇجاتتار مينيسترلىكتەر اراسىندا ءوزارا جىبەرىلدى. ەندى اۋعانستان تاراپىنان جاۋاپ كۇتىپ وتىرمىز. سونىمەن قاتار كەن ورنىن پايدالانۋ تۇرعىسىندا دا پەرسپەكتيۆا بار»، - دەدى توقتابايەۆ.

 ونىڭ ايتۋىنشا، اتالعان ەلدە مۇنايدىڭ، مىستىڭ، بەريلليدىڭ، مارگانەتستىڭ جانە قالايىنىڭ ۇلكەن كولەمى شوعىرلانعان. «قازمۇنايگاز»، «قازگەولوگيا» كومپانيالارى الەۋەتتى جوبالاردى ىرىكتەۋ كەلىسسوزدەرىن جۇرگىزۋدە. ءىرى جوبالار بويىنشا ءۇش مۇناي كەن ورنى قاراستىرىلىپ جاتىر. وسى ورايدا جاقىن ارادا ءتيىستى ناتيجە بولادى دەپ كۇتىلۋدە.

بۇدان بۇرىن حابارلانعانداي، قازاقستان اۋعانستانداعى تەمىرجول قۇرىلىسىنا ۇلەسىن قوسادى.

اۆتور: رۋسلان عابباسوۆ