قازاقستان ب ۇ ۇ اياسىندا ءوز ميسسياسىن ابىرويمەن ورىندادى - بەيبىت اتامقۇلوۆ
بۇل تۋرالى ب ۇ ۇ قاۋىپسىزدىك كەڭەسىندەگى قازاقستاننىڭ قىزمەتىنە ارنالعان ۇكىمەت ساعاتىندا ق ر سىرتقى ىستەر ءمينيسترى بەيبىت اتامقۇلوۆ ءمالىم ەتتى، دەپ حابارلايدى قازاقپارات ءتىلشىسى.
«2018-جىلعى 31- جەلتوقساندا ءبىز حالىقارالىق بەيبىتشىلىك پەن قاۋىپسىزدىكتى قولداۋ ءۇشىن جاۋاپكەرشىلىك جۇكتەلەگەن ب ۇ ۇ- نىڭ باستى ورگانى قاۋىپسىزدىك كەڭەسىندەگى 2 جىلدىق مۇشەلىگىمىزدى اياقتادىق. ءبىزدىڭ جۇمىسىمىز قازاقستان پرەزيدەنتى نۇرسۇلتان نازاربايەۆتىڭ كەڭەس مۇشەلەرىنە ارناعان «قاۋىپسىز، ءادىل جانە وركەندەگەن الەم قۇرۋ ءۇشىن جاھاندىق ارىپتەستىكتى نىعايتۋ جونىندەگى قازاقستاننىڭ تۇجىرىمدامالىق كوزقاراسى» اتتى ساياسي ۇندەۋىن تولىققاندى ىسكە اسىرۋ ماقساتىندا قۇرىلدى. بۇل قۇجات مەملەكەت باسشىسىنىڭ «بەيبىتشىلىك. 21- عاسىر» مانيفەسىنە نەگىزدەلىپ جازىلعانى بەلگىلى. قازاقستان ءوز ميسسياسىن ابىرويمەن ورىندادى دەپ نىق سەنىممەن ايتا الامىن. ءبىز مەملەكەت باسشىسى بەلگىلەگەن بارلىق باسىمدىقتاردى ىسكە اسىردىق، ال ەلىمىزدىڭ جاۋاپتى جانە قاعيداتتىق ۇستانىمى حالىقارالىق قوعامداستىق تاراپىنان جوعارى باعالاندى»، - دەدى ۆەدومستۆو باسشىسى.
ونىڭ سوزىنە قاراعاندا، بۇل ىستە بارلىق مەملەكەتتىك قۇرىلىمداردىڭ ۇيلەسىمدى جۇمىسى اتقارىلعانىن جەتكىزدى. وسى ورايدا ب. اتامقۇلوۆ سىرتقى ىستەر مينيسترلىگى اتىنان پارلامەنت دەپۋتاتتارىنا نىسانالى زاڭ شىعارۋ جۇمىستارى ءۇشىن، سونىمەن بىرگە حالىقارالىق الاڭداردا كورسەتكەن بەلسەندى ساياسي قولداۋلارى ءۇشىن العىس ايتتى.
«ءبىزدىڭ ب ۇ ۇ قاۋىپسىزدىك كەڭەسىنە مۇشەلىگىمىز جاھاندىق ساياسي پروتسەستەردەگى شيەلەنىستەردىڭ بۇرىن-سوڭدى بولماعان دەڭگەيىنە جانە الەمدىك دەرجاۆالاردىڭ اراسىنداعى قايشىلىقتاردىڭ اسقىنۋى كەزەڭىنە ءدوپ كەلدى. ءوزارا سەنىمنىڭ تەرەڭ داعدارىسى مەملەكەتتەردىڭ كەلىسىمگە كەلۋ قابىلەتىنە جانە تۇتاستاي كەڭەس جۇمىسى تيىمدىلىگىنە تەرىس اسەر ەتتى. تاياۋ شىعىستاعى، سيرياداعى، افريكاداعى شيەلەنىستى داعدارىستار مەن قاقتىعىستار، كورەي حالىق دەموكراتيالىق رەسپۋبليكاسى، يران مەن ۋكرايناداعى جانە باسقا دە ەلدەردەگى جاعدايلار ءبىزدىڭ سىرتقى ساياسي تاسىلدەمەلەرىمىزدىڭ بەرىكتىگىنە الدەنەشە رەت جاسالعان سىن بولدى. حالىقارالىق بەيبىتشىلىك پەن قاۋىپسىزدىكتى نىعايتۋ ماقساتىندا ءوزارا ءتيىمدى ىمىرانى ىزدەۋگە باعىتتالعان تەڭگەرىمدى ءارى بەيبىت سۇيگىش سىرتقى ساياساتىمىز مەملەكەتىمىزدى ستراتەگيالىق جاعىنان ساۋاتتى كورسەتۋگە مۇمكىندىك بەردى ، - دەدى ب. اتامقۇلوۆ.
وسى ورايدا مينيستر يادرولىق دەرجاۆالارمەن ارىپتەستىكتىڭ جاڭا قىرلارمەن جۇرگىزىلگەنىن، قازاقستاننىڭ ساياسي بەدەلى كۇشەيگەنىن اتاپ ءوتتى.
ايتا كەتەيىك، قازاقستاننىڭ 2017-2018-جىلدارى ب ۇ ۇ قاۋىپسىزدىك كەڭەسىنىڭ جۇمىسىنا تۇراقتى ەمەس مۇشە رەتىندە تابىستى جۇمىسىنا بايلانىستى قۇتتىقتاۋلار ايتىلۋدا.