بەيبىت اتامقۇلوۆ سوڭعى جىلدارداعى ەلباسىنىڭ شەتەلدەگى كەلىسسوزدەرى تۋرالى ايتتى

استانا. قازاقپارات - پارلامەنت ماجىلىسىندەگى ۇكىمەت ساعاتىندا ق ر سىرتقى ىستەر ءمينيسترى بەيبىت اتامقۇلوۆ ب ۇ ۇ قاۋىپسىزدىك كەڭەسىندەگى قازاقستاننىڭ مۇشەلەگى اياسىندا ەلباسى نۇرسۇلتان نازاربايەۆتىڭ كەلىسسوزدەرى تۋرالى ايتتى، دەپ حابارلايدى قازاقپارات ءتىلشىسى.

«استانانىڭ مەسسەدجى ايقىن - ول «بلوكتىق ويلاۋدان» ارىلۋ جانە الەمدىك كۇن ءتارتىبىنىڭ ءتۇيىندى ماسەلەلەرى بويىنشا ءباتۋاعا قول جەتكىزۋ ءۇشىن جەتەكشى دەرجاۆالاردىڭ اراسىندا ينكليۋزيۆتىك ديالوگتىڭ قاجەتتىگى. قازاقستاننىڭ قاۋىپسىزدىك كەڭەسىندەگى جۇمىسى كەزىندەگى جەتىستىكتەردىڭ كوبىنە- كوپ مەملەكەت باسشىسىنىڭ سىرتقى ساياساتتاعى بەلسەندى قىزمەتىنىڭ جانە ونىڭ پرينتسيپتىك بەيبىتسۇيگىش باستامالارىنىڭ ارقاسىندا مۇمكىن بولعانىنا ەش كۇمان جوق. تەك 2017-2018 -جىلدار ىشىندە عانا پرەزيدەنتتىڭ جيىرما ءتورت شەتەلدىك، ونىڭ ىشىندە قاۋىپسىزدىك كەڭەسىنىڭ تۇراقتى مۇشەلەرىنىڭ استانالارىنا ساپارلارى ءوتىپ، ەڭ وزەكتى ماسەلەلەر بويىنشا الەمدىك ليدەرلەرمەن كوپتەگەن كەلىسسوزدەرى وتكىزىلدى. جوعارى دەڭگەيدەگى كەزدەسۋلەردىڭ قورىتىندىلارى بويىنشا ەلباسى قول جەتكىزگەن ۋاعدالاستىقتار ءبىزدىڭ ديپلوماتتارىمىزدىڭ كۇن سايىنعى قاجىرلى جۇمىسى ءۇشىن نەگىز بولىپ قالاندى»، - دەدى مينيستر ب ۇ ۇ قاۋىپسىزدىك كەڭەسىندەگى قازاقستاننىڭ قىزمەتىنە ارنالعان ۇكىمەت ساعاتىندا.

وسى ورايدا ب. اتامقۇلوۆ ەلىمىزدىڭ بىرىككەن ۇلتتار ۇيىمىنىڭ قاۋىپسىزدىك كەڭەسىندەگى جۇمىسىنا توقتالدى.

«2018 -جىلعى 18- قاڭتاردا ەلباسىنىڭ توراعالىعىمەن وتكىزىلگەن «جاپپاي قىرىپ- جويۋ قارۋىن تاراتپاۋ: سەنىم شارالارى» تاقىرىبىنداعى جوعارى دەڭگەيلى بريفينگ ءبىزدىڭ قاۋىپسىزدىك كەڭەسىندەگى جۇمىسىمىزدىڭ شارىقتاۋى بولعانى ءسوزسىز. قر پرەزيدەنتى بىرىككەن ۇلتتار ۇيىمىنىڭ قاۋىپسىزدىك كەڭەسىندە العاش رەت ءتوراعالىق ەتتى جانە كەڭەستىڭ رەسمي وتىرىستارى زالىندا مەملەكەتتىك تىلدە ءسوز سويلەدى. قازاقستاننىڭ تاجىريبەسى نەگىزىندە نۇرسۇلتان نازاربايەۆ ءوز ءسوزىن يادرولىق قارۋدى تاراتپاۋ رەجىمىن نىعايتۋدا سەنىمنىڭ ەرەكشە رولىنە ارناۋعا شەشىم قابىلداپ، سول ارقىلى يادرولىق قارۋدان ازات الەمنىڭ ستراتەگيالىق ماقساتىنىڭ قولجەتىمدىلىگىن اتاپ كورسەتتى. قازاقستان باسشىسى ءتوراعالىق ەتكەن وتىرىس ءوزارا تۇسىنىستىك اتموسفەراسىندا وتكەن جانە كورەي تۇبەگىندەگى جاعدايدى قوسا العاندا، وسى زامانعى وزەكتى سىن- تەگەۋرىندەردى ساپالىق جاعىنان جاڭا تۇرعىدا قاراۋعا مۇمكىندىك بەرگەن قاۋىپسىزدىك كەڭەسىنىڭ ازداعان ءىس- شارالارىنىڭ ءبىرى بولدى. بۇل پرەزيدەنتتىڭ ساياسي كورەگەندىگىن جانە ونىڭ ايرىقشا بىتىمگەرشىلىك الەۋەتىن تاعى ءبىر رەت ايقىندادى»، - دەدى بەيبىت اتامقۇلوۆ.

بۇدان بۇران حابارلانعانداي، سىرتقى ىستەر ءمينيسترى قازاقستان ب ۇ ۇ اياسىندا ءوز ميسسياسىن ابىرويمەن ورىنداعانىن ءمالىم ەتتى.

اۆتور: رۋسلان عابباسوۆ