كۋۆەيت قازاقستانمەن تىكەلەي اۋە قاتىناسىن اشۋدى ۇسىندى

استانا. قازاقپارات - كۋۆەيت تاراپى قازاقستانمەن اراداعى بايلانىسقا وڭ سەرپىن بەرەتىن تىكەلەي اۋە قاتىناسىن اشۋدى ۇسىندى.

بۇل تۋرالى ق ر سىرتقى ىستەر ءمينيسترى بەيبىت اتامقۇلوۆتىڭ ءابۋ- دابيدە وتكەن يسلام ىنتىماقتاستىعى ۇيىمى (ي ى ۇ) سىرتقى ىستەر مينيسترلەرىنىڭ 46- وتىرىسى اياسىندا بىرنەشە ەلدىڭ سىرتقى ىستەر مينيسترلەرىمەن  كەلىسسوزدەرى بارىسىندا بەلگىلى بولدى، دەپ حابارلايدى قازاقپارات مينيسترلىكتىڭ باسپا ءسوز قىزمەتىنە سىلتەمە جاساپ.

مينيستر العاش بولىپ كۋۆەيت مەملەكەتى پرەمەر- ءمينيسترىنىڭ ءبىرىنشى ورىنباسارى - سىرتقى ىستەر ءمينيسترى شەيح ساباح ءال- حالەد اس- ساباحپەن كەزدەستى. تاراپتار ەكىجاقتى ىنتىماقتاستىق ماسەلەلەرىن، اتاپ ايتقاندا ساۋدا- ەكونوميكالىق جانە ينۆەستيتسيالىق قاتىناستاردى جانداندىرۋىن تالقىلادى. كۋۆەيت تاراپى قازاقستان مەن كۋۆەيت اراسىنداعى تۋريزمدى دامىتۋعا ىقپال ەتەتىن جانە ەكى ەل اراسىنداعى ەكونوميكالىق، گۋمانيتارلىق جانە مادەني بايلانىستارعا وڭ سەرپىن بەرەتىن تىكەلەي اۋە قاتىناسىن اشۋدى ۇسىندى.

سونداي- اق، كۋۆەيت ءمينيسترى ءوز كەزەگىندە قازاقستانعا بۇۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندە ءوز كۇش- جىگەرى ءۇشىن ريزاشىلىعىن ءبىلدىردى.

كەلەسى ساۋد ارابياسى كورولدىگىنىڭ سىرتقى ىستەر ءمينيسترى ادەل ءال- دجۋبەيرمەن كەزدەسۋدە ەكى ەلدىڭ ساۋدا- ەكونوميكالىق ىنتىماقتاستىعى ماسەلەلەرى ءسوز بولدى. ب. اتامقۇلوۆ ساۋد ارابياسى تاراپىنان ءبىزدىڭ ەلمەن ەكونوميكالىق ديالوگتى بەلسەندى دامىتۋعا باعىتتالعان «قازاقستان- ساۋد ارابياسى» ۇيلەستىرۋ كەڭەسىن قۇرۋ تۋرالى ۇسىنىسىن تولىق قولدايتىندىعىن ءبىلدىردى.

سودان سوڭ، ب ا ءا- ءنىڭ سىرتقى ىستەر جانە حالىقارالىق ىنتىماقتاستىق ءمينيسترى شەيح ابداللا بەن زايد ءال ناحايانمەن كەلىسسوز جۇرگىزىلدى. كەزدەسۋ بارىسىندا الداعى ەكىجاقتى ساپارلار كەستەسى، ساۋدا- ەكونوميكالىق جانە ينۆەستيتسيالىق ىنتىماقتاستىق پەرسپەكتيۆالارى، ونىڭ ىشىندە ءباا كاپيتالى تارتىلعان جوبالار تالقىلاندى. ساۋدا- ەكونوميكالىق ىنتىماقتاستىق اۋقىمىن ودان ءارى كەڭەيتۋ تۋرالى ۋاعدالاستىققا قول جەتكىزىلدى.

ەلىمىزدىڭ سىرتقى ىستەر ۆەدومستۆوسىنىڭ باسشىسى ءوز سوزىندە قازاقستان مەن ب ا ءا عارىش سالاسىندا ءوزارا ءتيىمدى ىنتىماقتاستىقتى دامىتۋ مەن عارىش كەڭىستىگىن بەيبىت ماقساتتا زەرتتەۋدە جوعارى پەرسپەكتيۆا بار ەكەنىن اتاپ ءوتتى.

 اعىمداعى جىلى امىرلىك «بايقوڭىر» عارىش ايلاعىنان حالىقارالىق عارىش ستانساسىنا ءوز عارىشكەرىن جىبەرۋدى جوسپارلاپ وتىر.

 ودان بولەك، يوردانيا حاشيميت كورولدىگىنىڭ سىرتقى ىستەر ءمينيسترى ايمان اس- سافاديمەن ساۋدا- ەكونوميكالىق ىنتىماقتاستىقتى نىعايتۋ ماسەلەلەرى تالقىلاندى. قازاقستان مەن يوردانيا اراسىنداعى قالىپتاسقان ساياسي ديالوگقا قاراماستان، ەكى جاقتى ساۋدانىڭ كولەمى وبەكتيۆتى سەبەپتەرمەن ىنتىماقتاستىقتىڭ قارقىنىنا سايكەس كەلمەيدى. وسى رەتتە ەكىجاقتى ىنتىماقتاستىق جول كارتاسىن ازىرلەۋ قاجەتتىلىگى اتاپ ءوتىلدى.

 مينيسترلىكتىڭ مالىمەتىنە سۇيەنسەك، ءبىزدىڭ ەل سيرياداعى داعدارىستى شەشۋگە باعىتتالعان بارلىق حالىقارالىق باستامالاردى قولدايدى. سونىمەن قاتار، كەزدەسۋ بارىسىندا يوردانيانىڭ سيرياداعى قاقتىعىستىڭ شەشىلۋىندەگى ايرىقشا ءرولى مەن قوسقان ۇلەسىن باسا ايتىلدى.

جانە ءبىر كەزدەسۋ يندونەزيانىڭ سىرتقى ىستەر ءمينيسترى رەتنو مارسۋديمەن ءوتتى. كەلىسسوز بارىسىندا ەكىجاقتى جانە كوپجاقتى فورماتتاعى ماسەلەلەر تالقىلاندى. ب. اتامقۇلوۆ يندونەزيالىق تاراپتى 2019-2020 -جىلدارعا ب ۇ ۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندە سايلانۋىمەن قۇتتىقتاپ، حالىقارالىق بەيبىتشىلىك پەن قاۋىپسىزدىكتى قامتاماسىز ەتۋ ماقساتىندا قازاقستان مەن يندونەزيا اراسىنداعى ب ۇ ۇ شەڭبەرىندەگى ىنتىماقتاستىقتى نىعايتۋعا سەنىم ءبىلدىردى.

 سونىمەن قاتار، ەكىجاقتى كولىك- لوگيستيكالىق ىنتىماقتاستىقتى جانداندىرۋ قاجەتتىگى دە اڭگىمە بولدى. وسى تۇرعىدا ەلىمىزدىڭ ءمينيسترى سۇحباتتاسىن ا س ە ا ن ەلدەرىنە قازاقستاننىڭ تەڭىز قاقپاسى رەتىندە قاراستىرىلاتىن قىتايلىق ليانيۋنگاڭ پورتىنداعى وتاندىق تەرمينالدىڭ مۇمكىنشىلىكتەرىمەن تانىستىردى.

اۆتور: داۋلەت ىزتىلەۋ