قازاقستاندىق پوشتا قىزمەتى جاڭا موبيلدى قوسىمشامەن تولىقتى

استانا. قازاقپارات - «قازپوشتانىڭ» جاڭا ونلاين قىزمەتى ارقىلى ەندىگى ۋاقىتتا كوميسسياسىز تولەم جاساۋعا بولادى، دەپ حابارلايدى قازاقپارات ءتىلشىسى.

«ءبىز قازپوشتا تولەم كارتالارىن ۇستاۋشىلار ءۇشىن post.kz ارقىلى تولەمدەرگە كوميسسيانى جويدىق. دوستار، مەن پوشتا بولىمشەلەرىنە كەلىپ، وندا كەزەككە تۇرىپ كوممۋنالدىق نەمەسە سالىق تولەمدەرىن جاساۋدى ۇناتپايتىن ادامداردىڭ پىكىرىن جەلىدە ءجيى كورەم. ونلاين قىزمەت الىپ ۇيرەنگەن موبيلدى ازاماتتار ءۇشىن post.kz پورتالىن ىسكە قوسىپ، دامىتىپ جاتقانىمىزدى ايتقىم كەلەدى»، - دەپ جازدى «قازپوشتا» اق باسقارما ءتوراعاسى ساكەن سارسەنوۆ ءوزىنىڭ فەيسبۋك پاراقشاسىندا.

ونىڭ ايتۋىنشا، ەندىگى ۋاقىتتا post.kz ارقىلى زەينەتاقى جارنالارىن، مىندەتتى مەديتسينالىق ساقتاندىرۋ جارنالارىن، الەۋمەتتىك تولەمدەردى، كوممۋنالدىق جانە باسقا دا تولەمدەردى كوميسسياسىز تولەي الاسىز.

«پورتال قىزمەتتەرىن پايدالاناتىن قالعان كليەنتتەرىمىز ەندى ۇيالى بايلانىس ءۇشىن 50 تەڭگە، كوممۋنالدىق تولەمدەر ءۇشىن - 100 تەڭگە، زەينەتاقى جارنالارى، مىندەتتى مەديتسينالىق ساقتاندىرۋ جانە الەۋمەتتىك تولەمدەر ءۇشىن - %1، ءبىراق 100 تەڭگەدەن كەم ەمەس، كوميسسيا تولەيدى. ەستەرىڭىزگە سالا كەتەيىن، post.kz پورتالىن نەمەسە ونىڭ ءموبيلدى قوسىمشاسىن پايدالانا وتىرىپ پوشتالىق جانە قارجىلىق قىزمەتتەر ءۇشىن ءتۇرلى تولەمدەر جاساي الاسىزدار»، - دەيدى ول.

سونىمەن قاتار، اتالعان قىزمەت ارقىلى جولداعان سالەمدەمەڭىزدى قاداعالاپ، ونى پوشتاماتقا جىبەرىپ، پوشتا بولىمشەسىنە بارۋ ۋاقىتىن برونداپ، اقشا اۋدارىپ، حات جىبەرىپ، 6 مىڭ قىزمەت كورسەتۋشىگە (كسك، بالاباقشالار، كولىك جانە الەمەتتىك كارتالار جانە ت. ب. ) اقى تولەۋ مۇمكىندىگى بار.

موبيلدى قوسىمشا Android جانە iOS قولدانۋشىلارى ءۇشىن قولجەتىمدى.