استانادا قۇرامىندا زياندى قوسپالارى بار كەسپە تابىلدى

استانا. قازاقپارات - ەلوردا سۋپەرماركەتتەرىنىڭ بىرىندە ساتىلىپ جاتقان كەسپە قۇرامىنان جوعارى دەڭگەيدەگى گەندىك- موديفيكاتسيالانعان اعزالار (گ م ا) انىقتالدى، دەپ حابارلايدى قازاقپارات ءتىلشىسى استانا قالاسى قوعامدىق دەنساۋلىق ساقتاۋ دەپارتامەنتىنە سىلتەمە جاساپ.

مەكەمە باسشىسى ءسادۋاقاس بايعابىلوۆتىڭ ايتۋىنشا، اتالمىش تاۋارلار قالاداعى ساۋدا ورىندارىندا قولدانىستاعى ازىق-تۇلىك تاۋارلارىنا مونيتورينگ جۇرگىزۋ كەزىندە انىقتالعان.

«سالماعى 86 گرامدىق «يۋككەديان» (BowlNoodleSoup «YUKGAEJANG»)» اتتى تەز ازىرلەنەتىن لاپشا قۇرامىنداعى گ م ا ءتيىستى نورمادان %0,9- عا ارتىق. ءونىم كورەيا رەسپۋبليكاسى سەۋل قالاسىندا شىعارىلعان. سونداي-اق، اتالعان ءونىمنىڭ قوراپشاسىندا گ م ا تۋرالى اقپارات كورسەتىلمەگەن»، - دەلىنگەن دەپارتامەنت حابارلاماسىندا.

ءونىم استانا قالاسى، ەسىل اۋدانى ە 319 كوشەسىندەگى 2 ب نىساندا ورنالاسقان «گرانتۋم» جەكە كاسىپكەرلىگىنە قاراستى Family سۋپەرماركەتىنەن تابىلدى. ال ساراپتاما جۇمىسى استاناداعى ۇلتتىق ساراپتاما ورتالىعىنىڭ حالىقارالىق اككرەديتتەلگەن زەرتحاناسىنىڭ بازاسىندا جاسالدى. قازىرگى ۋاقىتتا دەپارتامەنت ساۋدا نۇكتەلەرىنە شارا قابىلداپ، قاۋىپتى ونىمدەردى ساتىلىمنان الىپ تاستاۋ جانە جاۋاپتى تۇلعالاردى اكىمشىلىك جاۋاپكەرشىلىككە تارتۋ جۇمىستارىن جۇرگىزۋدە.

ايتا كەتەيىك، گەندىك موديفيكاتسيالانعان اعزالار - گەندىك ينجەنەريا ادىستەرىنىڭ كومەگىمەن جاساندى تۇردە گەنوتيپى وزگەرتىلگەن ءتىرى اعزالار.

ەسكە سالا كەتەيىك، تاۋاردان گ م ا انىقتالعان جاعدايدا 87172316181 تەلەفونىنا حابارلاۋعا بولادى.