ورالدا ەكى ادامنىڭ باسىنا مۇز كەسەگى قۇلاعان

ورال. قازاقپارات - ورالدا سەنبىلىك كەزىندە ەر ادامنىڭ باسىنا ۇلكەن سۇڭگى مۇز قۇلادى، دەپ حابارلايدى قازاقپارات ءتىلشىسى.

وبلىستىق دەنساۋلىق ساقتاۋ باسقارماسىنىڭ باسپا ءسوز حاتشىسى ايناگۇل ساقپوسىنوۆانىڭ ايتۋىنشا، وقيعا 2 -ناۋرىز كۇنى تاڭەرتەڭ ورىن الدى.

جالپى قالالىق سەنبىلىككە قاتىسقان م. وتەمىسوۆ اتىنداعى باتىس قازاقستان مەملەكەتتىك ۋنيۆەرسيتەتىنىڭ قىزمەتكەرىنىڭ باسىنا مۇز سۇڭگى قۇلاعان.

«1959 -جىلعى ەر ادام قالالىق كوپ بەيىندى اۋرۋحاناعا جەتكىزىلدى. دارىگەرلەر قاراپ، باس پەن ميدىڭ جاراقاتى جوق دەپ، امبۋلاتورلىق ەم الۋعا جىبەردى»، دەدى قازاقپارات تىلشىسىنە ا. ساقپوسىنوۆا.

بۇل - وسىنداي ەكىنشى وقيعا. 1 -ناۋرىز كۇنى ورتالىق بازار اۋدانىندا د. نۇرپەيىسوۆا كوشەسى بويىنداعى قوس قاباتتى «ناتەاترالنوي» ساۋدا ءۇيىنىڭ توبەسىنەن ايەل ادامنىڭ باسىنا مۇز قۇلاعان ەدى. ول دا اۋىر جاراقاتى بولماعاندىقتان، امبۋلاتورلىق ەم الۋعا جىبەرىلدى.

ورالدا بيىل قاردىڭ كوپ تۇسۋىنە بايلانىستى سەنبىلىك ۇيىمداستىرىلعان بولاتىن. قازىرگى كەزدە قالا بويىنشا 35 اۋماق سۋ باسۋ قاۋپى بار دەپ تانىلىپ وتىر.

ەسكە سالا كەتەيىك، بۇدان بۇرىن ب ق و- دا 300-دەن استام ادامنىڭ قار قۇرساۋىنان قۇتقارىلعانىن، ءبىرقاتار جولداردىڭ جابىلعانىن جازعان بولاتىنبىز.