قىسقى ۋنيۆەرسيادا: قازاقستان حوككەيشىلەرى لاتۆيانى ويسىراتا جەڭدى
ۋنيۆەرسيادادا ءبىزدىڭ جىگىتتەر ۆ توبىندا سىنعا تۇسەدى. قارسىلاستارى - كانادا، شۆەتسيا، شۆەيتساريا، لاتۆيا جانە ۇلى بريتانيا قۇرامالارى.
بۇگىنگى كەزدەسۋدە قازاقستان قۇراماسى وتە سەنىمدى ويىن كورسەتتى. ولار ويىننىڭ العاشقى كەزەڭىندە جاۋاپسىز ءتورت شايبا سوقتى. اتاپ ايتقاندا، 8-مينۋتتا اركادي شەستاكوۆ، 12-مينۋتتا كيريلل ساۆيسكي، 15 جانە 16-مينۋتتا انتون نيكرياچ قارسىلاستار قاقپاسىنان ساڭىلاۋ تاپتى.
ەكىنشى كەزەڭدە ءبىزدىڭ قۇراما تاعى دا ءۇش شايبا ەنگىزدى. بۇل جولى 24-مينۋتتا نيكيتا تيتوۆ گول سوقسا، 30-مينۋتتا كيريلل ساۆيسكي ەسەپتى ۇلعايتا ءتۇستى. ال 34-مينۋتتا الەكساندر پەليەۆين مەرگەندىك تانىتتى. ءبىزدىڭ جىگىتتەر 36-مينۋتتا ءوز قاقپاسىنا ءبىر شايبا جىبەرىپ الدى.
سوڭعى كەزەڭدە ءبىزدىڭ قۇراما ءۇش شايبا سوعىپ، قورىتىندى ەسەپتى بەلگىلەدى. الدىمەن 43-مينۋتتا انتون نيكرياچ، 5-مينۋتتا ارتەم ليحوتنيكوۆ شايبا سوقتى. قورىتىندى ەسەپتى اندرەي ياكوۆليەۆ بەلگىلەدى. وسىلايشا قازاقستان قۇراماسى لاتۆيادان 10:1 ەسەبىمەن باسىم ءتۇستى. لاتۆيا كەشە 1 -ناۋرىزدا شۆەيتساريانى 6:4 ەسەبىمەن تىزە بۇكتىرگەن ەدى.
ءبىزدىڭ توپتا تاعى دا ەكى ويىن وتكىزىلدى. شۆەيتساريا شۆەتسيانى 3:1، كانادا ۇلى بريتانيانى 12:0 ەسەبىمەن جەڭدى. بۇل توپتاعى كەلەسى تۋر ويىندارى 4 -ناۋرىزدا بولادى. قازاقستان شۆەتسيامەن، ۇلى بريتانيا شۆەيتساريامەن، كانادا لاتۆيامەن كەزدەسەدى. ال ا توبىندا 1 -ناۋرىزدا چەحيا ا ق ش- تى 4:1، ۆەنگريا جاپونيانى 3:2, رەسەي سلوۆانيانى 2:1 ەسەبىمەن جەڭدى.
ەستەرىڭىزگە سالا كەتەلىك، قىسقى ۋنيۆەرسيادا ويىندارىنىڭ اشىلۋ سالتاناتى استانا ۋاقىتىمەن 19.00-دە باستالادى. ءبىز بۇدان بۇرىن بەنديدەن قازاقستان قۇراماسىنىڭ جەڭىلىپ قالعانىن حابارلاعان ەدىك.