العىس ايتۋ كۇنى - كيەلى قازاق جەرىنە دەگەن ريزاشىلىقتىڭ بەلگىسى - ەلباسى

استانا. قازاقپارات - بۇگىن بەيبىتشىلىك جانە كەلىسىم سارايىندا «مىڭ العىس» اتتى قايىرىمدىلىق كونسەرتى ءوتتى، دەپ حابارلايدى قازاقپارات ءتىلشىسى.

كونسەرت الدىندا «قىمىزدان قۋات العان ءبىرتۇتاس ەل» اتتى بىرەگەي كورمە ۇيىمداستىرىلدى. سونىمەن قاتار كوپشىلىك نازارىنا بوتاي مادەنيەتىنىڭ ەكسپوزيتسيالارى ۇسىنىلدى. كورمە بارىسىندا جيىنعا كەلگەندەر ءونىمدى ۇزاق ساقتاۋعا ارنالعان ىدىستارعا قۇيىلعان قىمىزدىڭ ءدامىن تاتتى. بۇل ونىمدەردى الماتى، جامبىل، قاراعاندى، پاۆلودار وبلىستارىنىڭ تاۋار وندىرۋشىلەرى تانىستىردى.

سونىمەن قاتار كونسەرت الدىندا ق ر اقپارات جانە قوعامدىق دامۋ ءمينيسترى داۋرەن ابايەۆ مەملەكەت باسشىسى نۇرسۇلتان نازاربايەۆتىڭ العىس ايتۋ كۇنىنە وراي قۇتتىقتاۋ حاتىن وقىپ بەردى.

«قۇرمەتتى وتانداستار! بۇگىن ءبىز ەرەكشە مەرەكە - العىس ايتۋ كۇنىن اتاپ وتۋدەمىز. بۇل حالقىمىزدىڭ قيىن-قىستاۋ زاماندا تانىتقان مەيرىمدىلىگىنىڭ ەشقاشان ۇمىتىلمايتىنىن بىلدىرەدى. العىس ايتۋ كۇنى - ءبىزدىڭ ورتاق تاريحىمىزعا بىلدىرگەن قۇرمەت، بارشا قازاقستاندىقتاردىڭ ءوز ۇيىنە اينالعان كيەلى قازاق جەرىنە دەگەن ريزاشىلىعى»، - دەپ اتاپ وتىلگەن ەلباسى قۇتتىقتاۋىندا.

وسى ورايدا پرەزيدەنت تاۋەلسىزدىك جىلدارىندا قازاقستان حالقىنىڭ بىرلىگىن نىعايتا وتىرىپ، ەلىمىزدىڭ ايرىقشا تاتۋلىق پەن كەلىسىم مودەلى قالىپتاسقانىن جەتكىزدى.

«قازىرگى كەزدە ءبىز اۋقىمدى جاڭعىرتۋ باعدارلاماسىن ىسكە اسىرۋدامىز، حالىقتىڭ ءال-اۋقاتىن ارتتىرۋ جونىندە كەشەندى شارالار قابىلداۋدامىز. ىنتىماقتاستىق پەن ءوزارا كومەك سياقتى ەشقاشان جويىلمايتىن ادامي قۇندىلىقتار ءارقاشان بىزدەردى بىرىكتىرىپ، ويىمىزعا ەلىمىزدىڭ ورتاق بولاشاعىنا قاتىستىلىق پەن جاۋاپكەرشىلىك سەزىمىن قالىپتاستىرادى. قازاقستاندىقتاردىڭ قازىرگى بۋىنى، اسىرەسە جاستار، دانا تاريحىمىزدى ءبىلۋى جانە ەستە ساقتاۋى كەرەك. تاريحتىڭ تاعىلىمى مەن دانا ساباقتارى شىنايى پاتريوتيزم مەن بىرلىكتىڭ ۇلگىسىن كورسەتەدى. ءارقايسىمىزدىڭ جۇرەگىمىزدى ءبىزدىڭ ورتاق جەتىستىگىمىز - وركەندەۋشى قازاقستان ءۇشىن ماقتانىش پەن ريزاشىلىق سەزىمى كەرنەي بەرسىن! بارشاڭىزدى وسى تاماشا مەرەكەمەن شىن جۇرەكتەن قۇتتىقتايمىن! ءار قازاقستاندىق وتباسىنا باقىت مەن قۇت-بەرەكە، تاتۋلىق پەن وركەندەۋ تىلەيمىن!»، - دەلىنگەن مەملەكەت باسشىسىنىڭ قۇتتىقتاۋ حاتىندا.

ايتا كەتەيىك، العىس ايتۋ كۇنىن مەرەكەلەۋ اياسىندا ەلىمىزدە 1570-كە جۋىق ءتۇرلى مادەني- كوپشىلىك جانە قايىرىمدىلىق ءىس-شارالارى وتەدى.

قازاقستان حالقى اسسامبلەياسىنىڭ مالىمەتىنە قاراعاندا، وسى شارالارمەن 3,5 مىڭ ەلدى مەكەن قامتىلدى. وسى ورايدا مۇقتاج جاندارعا، كوپبالالى انالارعا، جەتىمدەرگە 126 ميلليون تەڭگەگە كومەك كورسەتىلەدى.