داۋرەن ابايەۆ جاڭا مينيسترلىكتىڭ مىندەتتەرىن اتادى
«ءبىزدىڭ مينيسترلىك جاڭا ساپادا جۇمىس ىستەي باستاعانىنا اپتا دا تولعان جوق. دەگەنمەن، قازىردىڭ وزىندە قوعامدىق دامۋ مەن اقپاراتتى ءبىر مينيسترلىككە بىرىكتىرۋ مەملەكەت باسشىسىنىڭ دەر كەزىندە ءارى ستراتەگيالىق دۇرىس شەشىمى بولعاندىعىن ايتۋ كەرەك»، - دەدى داۋرەن ابايەۆ مينيسترلىكتىڭ كەڭەيتىلگەن القا ماجىلىسىندە.
وسى ورايدا ول بۇرىنعى قوعامدىق دامۋ ءمينيسترى بولعان دارحان كالەتايەۆقا قوعامدىق دامۋ سالاسىندا ساپالى جۇمىس جۇرگىزگەنى ءۇشىن ريزاشىلىق ءبىلدىردى. سونىمەن قاتار ونىڭ بارلىق ءتيىمدى باستامالارى ودان ارى جالعاسىن تاباتىندىعىن اتاپ ءوتتى.
«تولىقتاي العاندا، الدىمىزدا وتە بايىپتى مىندەتتەر تۇر. 2019 -جىلدى پرەزيدەنت جاستار جىلى دەپ جاريالادى. بۇل كۇنتىزبەلىك جىل جاي عانا تاقىرىپتىق راسىمدەۋ نەمەسە ەسەپتىك شارالاردىڭ جيىنتىعى ەمەس. ول جاس ازاماتتاردىڭ ءومىرىن ساپالى تۇرلەندىرۋگە جانە ولاردىڭ وزدەرىن تانىتۋ ءۇشىن قاجەتتى بارلىق جاعدايدى جاساۋعا باعىتتالعان. ءبىز جاستاردىڭ بىرتەكتى ماسسا ەمەس ەكەندىگىن تۇسىنەمىز، ۇيرەنۋ، قالاۋ جانە قاجەتتىلىك سپەكترى وتە كەڭ. دەگەنمەن، جاستارمەن مەملەكەتتىك جۇمىستاردىڭ نەگىزگى كومپونەنتى ساپالى ءبىلىم، جۇمىسپەن قامتۋ ءجان وتباسى ينستيۋتى بولماق»، - دەدى د. ابايەۆ.
ول مينيسترلىك جۇمىسىنىڭ تاعى ءبىر ماڭىزدى باعىتى ازاماتتىق قوعاممەن جۇمىس ەكەندىگىن باسا ايتتى. وسى ورايدا ۆەدومستۆو باسشىسى بۇگىنگى كۇنى مەملەكەت جالعىز ءجۇرىپ كەشەندى الەۋمەتتىك پروبلەمالاردى شەشە المايتىندىعىن اشىق ايتتى.
«بۇل پروتسەستەرگە ۇكىمەتتىك ەمەس سەكتوردى تارتپاسا مەملەكەتتىك قولداۋدىڭ كوپتەگەن شارالارىنىڭ «ناۋقانشىلىققا» اينالىپ كەتۋ قاۋپى بار. وسى تۇرعىدا مەملەكەتتىك- الەۋمەتتىك تاپسىرىستىڭ اشىقتىعىن قامتاماسىز ەتۋ مەن سالانى تولىقتاي العاندا قۇقىقتىق رەتتەۋ ماسەلەسى ايرىقشا ماڭىزعا يە»، - دەدى داۋرەن ابايەۆ.
مۇنان بولەك، ول مينيسترلىكتىڭ نورما شىعارماشىلىق قىزمەتىنە قاتىستى ماسەلەلەر دە ايرىقشا ماڭىزعا يە ەكەندىگىن اتاپ ءوتتى. اعىمداعى جىلى زاڭ جوبالارىنا، قوعامدىق كەڭەس، ۇ ە ۇ، مەدياتسيا ينستيتۋتى جۇمىستارىنا تۇزەتۋلەر ەنگىزۋ، قايىرىمدىلىق پەن دونورلىقتىڭ قۇقىقتىق نەگىزدەرىن جەتىلدىرۋ جوسپارلانىپ وتىرعاندىعىن ايتتى.
«بارلىق جۇمىس ۇكىمەتتىك ەمەس سەكتوردىڭ تىكەلەي قاتىسۋىمەن جۇرگىزىلەتىن بولادى»، - دەدى مينيستر.