العىس ايتۋ كۇنى باۋىرمالدىق پەن تاتۋلىق مەرەكەسىنە اينالدى - داۋرەن ابايەۆ

استانا. قازاقپارات - العىس ايتۋ كۇنى ۇلتارالىق ىنتىماقتى، باۋىرمالدىق پەن تاتۋلىقتى ايشىقتايتىن جىلى مەرەكەلەردىڭ بىرىنە اينالدى.

بۇل تۋرالى بۇگىن اقپارات جانە قوعامدىق دامۋ ءمينيسترى داۋرەن ابايەۆ ايتتى، دەپ حابارلايدى قازاقپارات ءتىلشىسى.

«ەڭ الدىمەن سىزدەردى بۇگىنگى العىس ايتۋ كۇنىمەن قۇتتىقتايمىن. بۇل كۇن ۇلتارالىق ىنتىماقتى، باۋىرمالدىق پەن تاتۋلىقتى ايشىقتايتىن جىلى مەرەكەلەردىڭ بىرىنە اينالدى. جاس مەملەكەتىمىز، ماڭگىلىك ەلىمىز ءۇشىن قوعامدىق كەلىسىمنىڭ، بەيبىت زاماننىڭ قۇنى التىننان دا قىمبات.

قازاقتا: «التىن الما، العىس ال. التىن جەردىڭ سىيى، العىس ەلدىڭ سىيى» دەگەن استارى تەرەڭ ءسوز بار. ءاربىرىڭىزدىڭ شاڭىراقتارىڭىزعا شاتتىق، وتباسىلارىڭىزعا اماندىق تىلەيمىن. تاۋەلسىزدىگىمىز تۇعىرلى، ەلدىگىمىز باياندى، باۋىرىمىز ءبۇتىن بولسىن»، - دەدى داۋرەن ابايەۆ ۆەدومستۆونىڭ كەڭەيتىلگەن القا ءماجىلىسى بارىسىندا.

 

ايتا كەتەيىك، 1 -ناۋرىز - قازاقستان حالقى اسسامبلەياسىنىڭ قۇرىلعان كۇنى. وسىدان ءتورت جىل بۇرىن اسسامبلەيانىڭ XXII سەسسياسىندا مەملەكەت باسشىنى نۇرسۇلتان نازاربايەۆ وسى كۇندى «العىس ايتۋ كۇنى» دەپ جاريالاۋدى ۇسىندى.

اتالعان شارانىڭ نەگىزگى ماقساتى - قازاق حالقىنىڭ وزگە ۇلتتارعا كورسەتكەن قامقورلىعىن ۇمىتپاۋ، سول ءۇشىن ريزاشىلىق ءبىلدىرۋ. قازاقستان حالقى اسسامبلەياسىنىڭ مالىمەتىنە سايكەس، بيىل اتالعان مەرەكەنى اتاپ ءوتۋ اياسىندا رەسپۋبليكا بويىنشا 1570-كە جۋىق مادەني-كوپشىلىك جانە قايىرىمدىلىق شارالارى وتەدى. سونىڭ بارىنە 1 ميلليون 400 مىڭنان استام ادام قاتىسادى دەگەن بولجام بار.