نازيم شيحاليەۆ: قازاق حالقى - وتە مەيىربان، مەيماندوس، كىشىپەيىل حالىق
نازيم شيحاليەۆتىڭ ايتۋىنشا، بۇگىنگى كۇنى تاۋەلسىز قازاقستان كوپ ۇلتتىلىعىمەن قوسا، بىرلىگى جاراسقان، بەرەكەسى مولايعان ەل رەتىندە باعالانادى. اسىرەسە، ەلىمىزدى مەكەن ەتكەن وي- ماقساتى ورتاق سانالۋان ۇلت پەن ۇلىس وكىلدەرىنىڭ ءبىرى - ازەربايجاندار.
«ازەربايجانداردىڭ قازاقستانعا كەلۋ تاريحى دا ءارتۇرلى. مەن ءوزىم 1952 -جىلى ازەربايجاننىڭ ماسالى اۋدانى شاتىروبا اۋىلىندا دۇنيەگە كەلدىم. كەيىن ك س ر و- نىڭ ىشكى ىستەر مينيسترلىگى بەرگەن جولدامامەن 1970 -جىلى قازاقستانعا قونىس اۋداردىم. وتان الدىنداعى بورىشىمدى دا الماتى وبلىسىندا وتەدىم. ءسويتىپ، وسىندا تامىرىمدى تەرەڭگە جايىپ، قالىپ قويدىم دەۋگە بولادى. قازىر ينتەرناتسيونالدى وتباسىنىڭ وتاعاسىمىن. ايەلىم - ورىس ۇلتىنىڭ وكىلى. نەمەرەلەرىم دە وسى قازاق جەرىندە ءوسىپ، قازاقشا ءتالىم- تاربيە الۋدا. مۇنى ءوز باسىم ءبارى قازاق حالقىنىڭ دارحاندىعى مەن پەيىلىنىڭ كەڭدىگىنىڭ ارقاسىندا دەر ەدىم. بۇگىنگى تاڭدا باۋىرمال قازاق حالقىمەن بىرگە وزگە دە ۇلت وكىلدەرىمەن قاتار تاتۋ- ءتاتتى ءومىر ءسۇرىپ جاتقاندىعىمدى ماقتان تۇتامىن» ، - دەيدى ول.
نازيم شيحاليەۆ قازاقستاندى ءوزىنىڭ ەكىنشى وتانى سانايدى.
«قازاق حالقى - وتە مەيىربان، مەيماندوس، كىشىپەيىل حالىق. ءتىپتى، ەن دالادا كەلە جاتىپ، كولىگىڭ توقتاپ قالسا دا، جاقىن جەردەگى اۋىلعا سوعا قالساڭ، سەنى جىلى ۇيگە كىرگىزىپ، الدىڭا قولىنداعى بارىن توسىپ، قۇتتى قوناعىنداي كۇتەدى» ، - دەيدى نازيم شيحاليەۆ.
سونىمەن قاتار، ول استانادا وتكەن «نۇر وتان» پارتياسىنىڭ كەزەكتى XVIII سەزىندە ايتىلعان پرەزيدەنتتىڭ الەۋمەتتىك باستامالارى ۇلتىمىزدى ۇيىستىرا وتىرا ۇلى ماقساتتارعا، ءبىزدىڭ ۇلتتىق يدەيامىزدىڭ ءتۇپ قازىعى «ماڭگىلىك ەلگە» اپاراتىن داڭعىل جول ەكەنىن اتاپ ءوتتى.
«مەملەكەت باسشىسى ايتپاقشى، ءبىزدىڭ تاۋەلسىزدىگىمىز، زايىرلىعىمىز بەن ەلىمىزدىڭ ەكونوميكالىق ءوسىمى ۇلتتىق قۇندىلىقتارىمىزدى بىرىكتىرەدى. بۇل جولعى ايتىلعان باستامالاردىڭ ەل بولاشاعى ءۇشىن ماڭىزى وتە زور. ويتكەنى، الەۋمەتتىك باستامالار كوپۇلتتى حالقىمىزعا كۇش- قۋات بەرەر قاينار كوز دەپ بىلەمىن. ەلباسى الداعى ۋاقىتتا كوپتەگەن جۇمىستاردىڭ كۇتىپ تۇرعانىن ايتىپ ءوتتى. سان- سالالى ءومىرىمىزدىڭ بارلىق تىنىس- تىرشىلىگىن تۇگەل قامتىعان ەلباسى باستامالارى كوپبالالى وتباسىلار مەن جاستاردىڭ كوڭىلىنە ءۇمىت وتىن ۇيالاتىپ وتىر. قازىرگى كۇنى جاستاردىڭ كوبى پاتەر جالداپ، كۇن كورەتىنى جاسىرىن ەمەس. قانشاما جاس وتباسىلار دا باسپانانىڭ جوقتىعىنان قينالىپ ءجۇر. وسى رەتتە جالعا بەرىلەتىن تۇرعىن ءۇي قۇرىلىسىنىڭ جانداناتىنى جاس قازاقستاندىقتاردى ءبىر سەرپىلتىپ تاستادى» ، - دەپ تۇيىندەدى نازيم شيحاليەۆ.