قازاقستاندىقتار ءۇشىن تۇركيادا دەمالىپ قايتۋ قىمباتتاماق

استانا. قازاقپارات - قازاقستاندىقتار ءۇشىن تۇركياعا بارىپ دەمالۋ قىمباتتاي تۇسەدى. وعان تۋريستىك اگەنتتىكتەردە تولەم ۆاليۋتاسىنىڭ اۋىستىرىلۋى سەبەپ بولماق.

ەندى باعالار دوللاردىڭ ەمەس، ەۋرونىڭ ەسەبىنەن ورناتىلاتىن بولادى دەپ جازادى KAZ. NUR. KZ.

«تۋريستتىك قامقور» كورپوراتيۆتىك قوردىڭ باسپا ءسوز قىزمەتى ۆاليۋتانىڭ اۋىسۋى سالدارىنان وزگە ەلگە تۋرلاردىڭ باعاسى %10-20 قىمباتتايتىنىن مالىمدەدى.

تۋردى تەڭگەمەن تولەۋ مۇمكىندىگى ساقتالادى. الايدا، سوما ءبارىبىر ەۋروعا اۋدارىلادى.

ستاتيستيكالىق مالىمەتتەرگە سايكەس، وتكەن جىلى شەتەلگە شىعىپ دەمالعان 343 مىڭ قازاقستاندىقتىڭ 148 مىڭى تۇركياعا بارعاندار.

قازاقستان تۋروپەراتورلارى قاۋىمداستىعىنىڭ پرەزيدەنتى يننا رەي ناۋرىز مەيرامى قارساڭىندا ۇشاقپەن ۇزاق ۇشپايتىن باعىتتى تاڭداۋعا كەڭەس بەردى.

ول ناۋرىزدى جاقسى قارسى الۋعا بولاتىن مەملەكەت رەتىندە وزبەكستاندى تاڭدادى. ال قازاقستاندا بۇل مەرەكەنى شىمكەنتتە تويلاعان ءجون.