گەرمانيادا الەمدەگى ەڭ ەجەلگى شالباردىڭ كوشىرمەسى جاسالدى
وسىدان 3 مىڭ جىل بۇرىن تىگىلگەن وسى كيىمدى ەۋرازيا دالاسىندا جۇرگىزگەن قازبا كەزىندە تاپقان ەدى. جادىگەردى قالپىنا كەلتىرۋ ويى كەلگەن نەمىس ارحەولوگيا ينستيتۋتىنىڭ پروفەسسورى مايكي ۆاگنەر سول ەكسپەديتسيا قۇرامىندا بولعان. كوشپەلى اتا- بابالارىمىز كيگەن شالباردىڭ الەم قاۋىمداستىعىنا ماڭىزى قانداي بولعانىن كەلەسى سيۋجەتىمىزدەن بىلەسىز.
كوشپەندىلەردىڭ بۇل ەجەلگى شالبارى 2014 -جىلى تابىلعان. ارحەولوگتار وسىنداي كيىمدى بۇرىن دا تاپقان، ءبىراق بۇل ەڭ كونەسى بولىپ شىقتى. جاسى ءۇش مىڭ جىلدان اسادى. مۇنى زەرتتەۋ بارىسىندا تاجىريبەلى نەمىس ارحەولوگى مايكي ۆاگنەر انىقتاعان. قۇرعاق جەردە جاتقاندىقتان، جاقسى كۇيدە ساقتالىپتى. ول تەك جاسىمەن عانا ەمەس، كۇردەلى پىشىمىمەن دە ەرەكشەلەنەدى.
الەم ارحەولوگياسىنداعى ەڭ ماڭىزدى جوبالاردىڭ بىرىنە قاتىسۋى تۋرالى مايكي ۆاگنەر كىتاپ جازعان. بۇل تۋىندىسىنىڭ تانىستىرىلىمى وسىدان 4 اي بۇرىن فرانكفۋرتتەگى كىتاپ جارمەڭكەسىندە ءوتتى.
مايكي ۆاگنەر، نەمىس ارحەولوگيا ينستيتۋتى ەۋرازيا ءبولىمىنىڭ عىلىمي ديرەكتورى:
- كىتابىمىزدا شالباردى كىم، قايدا جانە نەلىكتەن ويلاپ تاپقانى تۋرالى جازدىق. بۇل جونىندە تەك ارحەولوگيا قاۋىمى عانا ەمەس، بۇكىل الەم كوبىرەك ءبىلۋى ءتيىس. ءجۇن ءتىلىمىن زەرتتەپ، بۇل شالباردىڭ جاسى 3 مىڭ جىلدان اساتىنىن انىقتاعاننان كەيىن، مۇنى ماڭىزدى جاڭالىق دەپ اتاعانىم ەسىمدە. بۇل الەمدە ساقتالعان ەڭ ەجەلگى شالبار ەكەنىن بىلدىرەدى. ونى زيراتتا ەر ادامنىڭ ۇستىندە تاپتىق. ول سالت اتتى جاۋىنگەر بولعان دەپ سانايمىز.
نەمىس زەرتتەۋشىلەرى ەجەلگى شالباردىڭ كوشىرمەسىن جاساۋدى شەشكەن. بۇل جاي ەكسپونات عانا ەمەس، ونى كيىپ، اتقا ءمىنىپ تە كوردى. الايدا بۇل ءۇشىن ءبىر جىل بويى تىنباي ەڭبەك ەتكەن. فراۋ حاللگرەن ۇزاق ۋاقىت ەجەلگى قولونەر ادىستەمەلەرىن زەرتتەپ، سايكەس ءجىپتى تاڭداپ جۇرگەن. اقىرى كونە شالباردىڭ سىرىن اشىپ، دالمە- ءدال كوشىرمەسىن تىگىپ شىقتى.
موا حاللگرەن، توقىما ديزاينەرى، «جىبەك جولىنىڭ موداسى» جوباسىنىڭ ازىرلەۋشى اسسيستەنتى:
- ماسەلەن تىزەسىندە كۇردەلى ويۋ بار، ونى قالاي ىستەگەنىن بىلگەن جوقپىن. سول سەبەپتەن ءتۇرلى ءادىستى بايقاپ كوردىم. ونى قايتالاۋ وڭايعا سوققان جوق. سايكەس كەلەتىن ماتا تابۋ دا قيىن بولعان. شالبار ءۇش بولىكتەن تىگىلگەن. مەن كونە توقىما بەلدىگىن قولداندىم. ال قوي جۇنىنەن يىرىلگەن جىپكە ارنايى تاپسىرىس بەردىك. بۇل شالبار اتقا ءمىنىپ جۇرۋگە ويداعىداي جارايتىنىنا كوزىمىز جەتتى.
نەمىس ارحەولوگتارى قازاقستان جىبەك جولىنىڭ نەگىزگى بولىگى بولعانىن ايتادى. ولار ەلىمىزگە قۋانا كەلەتىنىن جاسىرعان جوق. ۇلى دالا ەلىنىڭ ءالى تالاي سىرىن اشۋعا بولاتىنىنا سەنىمدى.
www.24.kz