ەۋروپارلامەنت دەپۋتاتى «الپامىس باتىر» جىرىنان ءۇزىندى وقىپ بەردى

استانا. قازاقپارات - «تۇلپار ءمىنىپ، تۋ العان» جوباسى ەلدەن بولەك، شەت ەلدە دە قولداۋعا يە بولىپ كەلە جاتىر. بۇل جولى ەۋروپارلامەنت دەپۋتاتى اندرەي مامىكين «الپامىس باتىر» جىرىنان ءۇزىندى وقىپ، ۇلتتىق جوباعا ءۇن قوستى، دەپ حابارلايدى قازاقپارات ءتىلشىسى.

«بۇل جولى لاتۆيا مەملەكەتىنىڭ ازاماتى، لاتۆياداعى ەۋروپارلامەنت دەپۋتاتى اندرەي مامىكين «الپامىس باتىر» جىرىنان ءۇزىندى وقىدى. ول ەستافەتانى بەلگىلى قازاقستاندىق جۋرناليست جانات ەرنستتەن الىپ، ق ر سىرتقى ىستەر ءمينيسترىنىڭ ورىنباسارى رومان ۆاسيلەنكوعا جولدادى»، - دەلىنگەن «تۇلپار ءمىنىپ، تۋ العان» ۇلتتىق جوباسىنىڭ فەيسبۋكتەگى پاراقشاسىندا.

ەسكە سالا كەتسەك، «تۇلپار ءمىنىپ، تۋ العان» جوباسى بىلتىر باستالىپ، ۇلتتىق جوباعا حالىقپەن بىرگە ءبىرقاتار مينيسترلەر مەن وبلىس اكىمدەرى، دەپۋتتاتتار ءۇن قوسقان بولاتىن.

جالپى، ەلىمىزدە باتىرلار جىرىنا دەگەن بەتبۇرىس بايقالىپ كەلەدى. قازاقستاندا مەكتەپ وقۋشىلارى اراسىنداعى «تۇلپار ءمىنىپ، تۋ العان!» بايقاۋىنا 50 مىڭ وقۋشىنى قاتىستىرۋ كوزدەلىپ وتىرعانىن بۇعان دەيىن اقپارات جانە قوعامدىق دامۋ ءمينيسترى داۋرەن ابايەۆ ايتقان بولاتىن.

«بۇل اۋقىمدى ءارى اعارتۋشى جوبا. ول جوباعا ءبىز ەلىمىزدىڭ بارلىق وڭىرلەرىنەن 50 مىڭنان استام وقۋشىنى تارتۋدى جوسپارلاپ وتىرمىز. ونىڭ ماعىناسى - وقۋشىلار قازاقتىڭ «قوبىلاندى باتىر» ەپوسىن جاتتاپ قانا قويماي، ونى تالقىلاپ، قازاقتىڭ ەرتەدەگى سوزدەرىنە تۇسىنىك بەرە الۋى كەرەك. بۇل بايقاۋدى جاستار جىلىنا ارناپ وتىرمىز. قوعامنىڭ كەڭ نازارىنا يە بولار دەگەن سەنىمىمىز بار. جوبانىڭ فينالدىق كەزەڭى - «حابار» تەلەارناسىندا تەلەكۇندەلىك جانە گالا- كونسەرت فورماتىندا وتەدى»، - دەگەن ەدى مينيستر.

اۆتور: ايان بەكەن ۇلى