USD 436.29 EUR 492.83
RUB 5.92 CNY 68.48
جاڭالىقتار

قازاق ءتىلىن بويىما انامنىڭ اق سۇتىمەن ءسىڭىردىم - راميل ورۋدجوۆ

1 ناۋرىز 10:45
:ءبولىسۋ
قازاق ءتىلىن بويىما انامنىڭ اق سۇتىمەن ءسىڭىردىم - راميل ورۋدجوۆ

اقتوبە. قازاقپارات - اقتوبە وبلىستىق پوليتسيا دەپارتامەنتىنىڭ قىزمەتكەرى راميل ورۋدجوۆ قازاق ءتىلىن جەتىك بىلەدى. ازەربايجان ۇلتىنىڭ ازاماتى دوستىق پەن تاتۋلىق مەكەنى بولعان قازاق حالقىنا ءوز العىسىن ءبىلدىردى، دەپ حابارلايدى قازاقپارات ءتىلشىسى.

راميل ورۋدجوۆ ۋچاسكەلىك پوليتسيا قىزمەتكەرى بولىپ جۇمىس ىستەيدى. اقتوبە جەرىندە تۋىپ- وسكەن ازامات مەكتەپ، جوعارى وقۋ ورنىن بىتىرگەن سوڭ وتان الدىنداعى بورىشىن وتەپ كەلدى. بوكسپەن شۇعىلدانادى.

«وتباسىمدا اتا- انام، مەن جانە ءىنىم بار. اكەمنىڭ ۇلتى - ازەربايجان، انام - قازاق، ماڭعىستاۋ ءوڭىرىنىڭ قىزى. ءىنىم ەكەۋمىز بالا كەزىمىزدەن ەكى ۇلتتىڭ سالت- ءداستۇرىن، ءتىلىن بويىمىزعا ءسىڭىرىپ وستىك. ازەربايجان مەن قازاق حالقىنىڭ سالت- داستۇرىندە، مەرەكەلەرىندە كوپ ۇقساستىق بار. مىسالى، ناۋرىز مەيرامىن ازەربايجان حالقى دوعا مەرەكەسى رەتىندە تويلايدى. ۇيىمىزدە قازاقشا ەت اسىلىپ، باۋىرساق، جەتى شەلپەك پىسىرىلەدى. اتا- انامىزدىڭ ءبىر- بىرىنە دەگەن سىيلاستىعىن كورىپ وسكەن ءبىز ءاربىر ادامدى قۇرمەتتەۋدى، داۋىس كوتەرىپ سويلەمەۋدى، قاراپايىم بولۋدى، «ۇيات بولادى» دەگەن ءسوزدىڭ ماعىناسىن تەرەڭ ءتۇسىنىپ وستىك»، - دەيدى راميل ورۋدجوۆ.

پوليتسيا قىزمەتكەرى حالىق سەنىمىنە يە بولۋ ءۇشىن ولارمەن تىعىز بايلانىس جاساپ، ءتىپتى تەلەفونىن بەرىپ قويۋدى دۇرىس سانايدى. ۇزدىكسىز، دەمالىسسىز بايلانىستا بولۋ، كەز كەلگەن ءوتىنىشتى تىڭداي ءبىلۋ ماڭىزدى.

«پوليتسيا قىزمەتكەرىنىڭ سىرتقى كەيپى، مىنەز- قۇلقىنان باستاپ ءبىلىمى، پسيحولوگيالىق ازىرلىگى، جاۋىنگەرلىك دايارلىعى جوعارى دەڭگەيدى بولۋى قاجەت. تۇرعىندارمەن سەنىمدى قارىم- قاتىناس ورناتۋىما مەملەكەتتىك ءتىلدى جەتىك بىلەتىنىم سەپتىگىن تيگىزدى. قازاق ءتىلىن بويىما انامنىڭ اق سۇتىمەن ءسىڭىردىم. ۇيدە اناممەن ۇنەمى قازاقشا سويلەسەمىز. قازىرگى تاڭدا مەن قازاق، ورىس جانە ازەربايجان تىلدەرىن جەتىك بىلەمىن. مەنىڭ ويىمشا، ەلىمىزدە تۇرىپ جاتقان ءار ازامات مەملەكەتتىك ءتىلدى بىلۋگە ۇمتىلۋى قاجەت. قازاق حالقىن انام دەپ سىيلايمىن. دوستىق پەن تاتۋلىقتىڭ مەكەنى بولعان قازاق جەرىندە تۋىپ- وسكەنىمدى ماقتان ەتەمىن»، - دەدى ول.

اۆتور: التىناي ساعىندىقوۆا


:ءبولىسۋ

اأتور:

novasa

سونداي-اق... وقىڭىز
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
باقىتجول كاكەش
باقىتجول كاكەش
954-049

مۇراعات