USD 436.29 EUR 492.83
RUB 5.92 CNY 68.48
جاڭالىقتار

قازاق ءتىلىن دالادا ۇيرەندىم - مينيستر سكليار

1 ناۋرىز 09:57
:ءبولىسۋ
قازاق ءتىلىن دالادا ۇيرەندىم - مينيستر سكليار

استانا. قازاقپارات - ق ر يندۋستريا جانە ينفراقۇرىلىمدىق دامۋ ءمينيسترى رومان سكليار جاڭا قىزمەتتە ۇكىمەتتەگى العاشقى بايانداماسىن جاسادى، دەپ حابارلايدى قازاقپارات ءتىلشىسى.

جاڭا مينيستر ءوز بايانداماسىن تولىعىمەن مەملەكەتتىك تىلدە جاساپ شىقتى. ر. سكليار كوپبالالى وتباسىلارعا جالدامالى باسپانا تاراتۋدىڭ مەرزىمى تۋرالى ايتتى. ونىڭ ايتۋىنشا، بۇگىندە رەسپۋبليكا بويىنشا 340 مىڭ كوپبالالى وتباسى بار. سونىڭ ىشىندە 28 مىڭ وتباسى تۇرعىن ءۇي كەزەگىندە تۇر.

«مەملەكەت باسشىسىنىڭ تاپسىرماسىنا سايكەس، ءبىز جەتى جىلدىڭ ىشىندە جىل سايىن 6 مىڭ جالدامالى پاتەردى سالىپ وتىرامىز. ءسويتىپ، 2025 -جىلعا دەيىن 40 مىڭنان استام جالدامالى پاتەر تۇرعىزىلادى. سول كەزدە كەزەكتە تۇرعان كوپبالالى وتباسىلاردىڭ باسپانا ماسەلەسى تولىعىمەن شەشىلەدى. بيىل مامىر ايىندا ءبىز كوپبالالى وتباسىلارعا جالدامالى پاتەردى بەرۋدى باستايمىز»، - دەدى ر. سكليار.

بۇدان بولەك، «نۇر وتان» پارتياسىنىڭ XVIII سەزىندە مەملەكەت باسشىسى نۇرسۇلتان نازاربايەۆ الەۋمەتتىك جاعىنان از قامتىلعان وتباسىلارعا 2-3 پايىزبەن يپوتەكا بەرۋدى تاپسىرعان بولاتىن.

بۇگىن مينيستر رومان سكليار الەۋمەتتىك جاعىنان از قامتىلعان وتباسىلارعا بەرىلەتىن يپوتەكانىڭ شارتتارىن دا اتادى.

«از قامتىلعان وتباسىلارعا تۇرعىن ءۇي قۇرىلىس جيناق بانكى ارقىلى 20 جىلعا جەڭىلدەتىلگەن نەسيە ەنگىزىلەدى. جىلدىق مولشەرلەمەسى 2 پروتسەنت بولادى. اتالعان نەسيە كەلەسى ساناتتار - ءتورت جانە ودان كوپ بالاسى بار وتباسىلارعا، مۇگەدەك بالاسى بار نەمەسە مۇگەدەك بالانى تاربيەلەيتىن وتباسىلارعا جانە كامەلەتكە تولماعان بالالارى بار تولىق ەمەس وتباسىلارعا بەرىلەدى. ەكى جىلدا ءبىز اتالعان ساناتتارعا 22 مىڭ جەڭىلدەتىلگەن زايم بەرۋدى جوسپارلاپ وتىرمىز»، - دەپ اتاپ كورسەتتى ر. سكليار.

ونىڭ سوزىنە قاراعاندا، باستاپقى جارنا 10 پروتسەنت بولادى.

«نەگىزى، بۇل تۇرعىن ءۇي قۇرىلىس جيناق بانكىنىڭ بولەك باعدارلاماسى بولادى. جاقىن ارادا ءبىز بانك باسشىلىعىمەن بىرگە ءبارىن جان- جاقتى تۇسىندىرەتىن بولامىز. ارنايى بروشيۋرانى دا شىعارامىز. سول جەردە ءبارى جازىلادى»، - دەپ اتاپ كورسەتتى ر. سكليار.

ال ۇكىمەت وتىرىسىنان كەيىن جۋرناليستەر ودان قازاق ءتىلىن قالاي جانە قاي جەردە جەتىك مەڭگەرگەنىن سۇرادى.

«قازاق تىلىندە سويلەگەن قيىن ەمەس. وسى جولى ءسال- ءپال اۋىرىپ قالدىم. داۋىسىم دۇرىس ەمەس سياقتى. ۇستازىم جوق. قازاق ءتىلىن دالادا ۇيرەندىم»، - دەيدى ر. سكليار.

ايتا كەتەيىك، وتكەن جىلى ماۋسىم ايىندا رومان سكليار ق ر ينۆەستيتسيالار جانە دامۋ ۆيتسە- ءمينيسترى بولىپ تۇرعاندا ۇكىمەتتە «نۇرلى جەر» باعدارلاماسى بويىنشا قازاق تىلىندە بايانداما جاسادى.

وتىرىستان كەيىن قازاقپارات تىلشىسىنە سۇحبات بەرگەن ۆيتسە- مينيستر قازاق ءتىلىن قالاي ۇيرەنگەنىن ايتىپ بەردى.

«مەن التى جاسىمدا اۋىلدا تۇرعانمىن. جارتى جىلداي اۋىلدا بولدىم. سودان قالعان بولۋى كەرەك. جەكە رەپەتيتورىم جوق. وعان ۋاقىت تابۋ دا قيىن»، - دەدى ر. سكليار.

اۆتور: ارمان اسقاروۆ


:ءبولىسۋ

اأتور:

novasa

سونداي-اق... وقىڭىز
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
بەيسەن سۇلتان
بەيسەن سۇلتان
954-049

مۇراعات