قازاقستاندا بۇگىن - العىس ايتۋ كۇنى
قازاقستان حالقى بۇگىن تاريحىندا ءتورتىنشى رەت العىس ايتۋ كۇنىن اتاپ وتكەلى وتىر. 2016-جىلدىڭ 14- قاڭتارىندا مەملەكەت باسشىسى نۇرسۇلتان نازاربايەۆ جارلىققا قول قويىپ، وعان سايكەس، 1- ناۋرىز - ەلىمىزدە العىس ايتۋ كۇنى دەپ جاريالاندى. ايتا كەتەرلىگى، ءدال وسى 1- ناۋرىز كۇنى ەلىمىزدە قازاقستان حالقى اسسسامبلەياسى قۇرىلعان بولاتىن.
مەملەكەت باسشىسى نۇرسۇلتان نازاربايەۆ 2015-جىلدىڭ 22- ساۋىرىندە اسسامبلەيانىڭ XXII سەسسياسىندا العىس ايتۋ كۇنىنىڭ بەلگىلەۋگە نە تۇرتكى بولعانىن تاريحپەن بايلانىستىرا وتىرىپ ايتىپ بەرگەن ەدى. پرەزيدەنت ستاليندىك رەجىم كەزىندە قازاقستانعا كوپتەگەن حالىقتار جەر اۋدارىلعانىن - 800 مىڭعا جۋىق نەمىس، 102 مىڭ پولياك، 550 مىڭ سولتۇستىك كاۆكاز حالقىنىڭ وكىلدەرى، 18,5 مىڭ قيىر شىعىستاعى كورەي وتباسىلارى كوشىپ كەلۋگە ءماجبۇر بولعانىن ەسكە سالعان ەدى.
«ولاردى پويىز ۆاگوندارىنان جاپان دالاعا ءتۇسىرىپ كەتتى. ول كەزدەرى مۇندا تەك قازاقتار ءومىر ءسۇردى. سوندىقتان، ولار قابىل الىپ، كومەك كورسەتتى. قيىن ۋاقىتتاردى باستان وتكەرىپ جۇرگەن قازاق وتباسىلارى بالشىق ۇيلەرىنە كىرگىزىپ، قابىلدادى. ءبىزدىڭ جانۇيامىز دا ءۇش بالاسى بار ەرلى-زايىپتىنى قابىلدادى. قازاقستان حالقى اسسامبلەياسىنىڭ قۇرىلعان كۇنىن - 1- ناۋرىزدى جىل سايىن بارلىق ەتنوستاردىڭ ءبىر-بىرىنە مەيىرىمدىلىك كورسەتەتىن، ءتۇرلى حالىقتاردى تۋعانىنداي قابىلداعان قازاقتارعا العىس ايتۋ كۇنى دەپ اتاپ وتكەن دۇرىس بولار ەدى. بۇل ءبىزدى ودان ءارى جاقىنداستىرار ەدى. بۇل كۇن بارلىق قازاقستاندىقتاردىڭ ءبىر-بىرىنە مەيىرىمدىلىك، دوستاستىق جانە ماحاببات تانىتۋ مەرەكەسى بولا الادى»، - دەگەن ەدى نۇرسۇلتان نازاربايەۆ.
قازاقتار اشارشىلىقتان زارداپ شەگىپ، سوعىستان ەڭسەسى ءتۇسىپ وتىرسا دا، وزگە ۇلتتى وزەگىنەن تەپكەن جوق. وزگە ۇلتتىڭ ميلليونداعان وكىلدەرىن قۇشاق جايا قارسى الىپ، اۋىرتپالىقتى بىرگە قايىسپاي بىرگە كوتەرە ءبىلدى.
العىس ايتۋ كۇنى ءسوزسىز بۇكىل ەل اۋماعىندا اتالىپ وتەدى. ايتا كەتەرلىگى، استانادا «قازاق ەلىنە مىڭ العىس» مونۋمەنتىن ەلوردانىڭ 20 جىلدىعىن مەرەكەلەۋ شەڭبەرىندە قاراعاندى وبلىسىنىڭ اكىمدىگى ورناتقان بولاتىن. ول قۋعىن-سۇرگىن جىلدارى قازاقستانعا جەر اۋدارىلعان كوپتەگەن ۇلتتاردىڭ وكىلدەرىن باۋىرىنا باسقان قازاق حالقىنىڭ مەيىرىمدىلىگىن بەينەلەيدى. كومپوزيتسيانىڭ ورتاسىندا جاس قازاق ايەلىنىڭ ءارتۇرلى ەتنوستاردىڭ وكىلى بولىپ تابىلاتىن 3 بالانى قورعاشتاي قۇشاقتاپ تۇرعان ءمۇسىنى ورناتىلعان.
«قازاق ەلىنە مىڭ العىس» مونۋمەنتتەرى الماتى (قاراتال اۋدانىنداعى باستوبە اۋىلى)، باتىس قازاقستان (ورال قالاسى)، جامبىل (ماسانشى سەلوسى)، اتىراۋ (ماحامبەت اۋدانىنىڭ بەيبارىس اۋىلى) جانە اقتوبە (اقتوبە قالاسى) وبلىستارىندا، شىمكەنت قالاسىندا دا بوي كوتەرگەن.
العىس ايتۋ كۇنىن مەرەكەلەۋ شەڭبەرىندە قازاقستان بويىنشا 3 مىڭ 527 ەلدى مەكەندە ۇزىن سانى 1570 كە جۋىق ءارتۇرلى مادەني- كوپشىلىك جانە قايىرىمدىلىق ءىس-شارالارى وتەدى. ولارعا 1 ميلليون 400 مىڭنان استام ادام قاتىسادى دەپ كۇتىلىپ وتىر.