دوستىق كەدەنىنىڭ بىرنەشە قىزمەتكەرىنىڭ ۇستىنەن پاراقورلىققا قاتىستى قىلمىستىق ءىس قوزعالدى

استانا. قازاقپارات - سىرتقى ەكونوميكالىق قىزمەت قاتىسۋشىلارىنان جۇيەلى نەگىزدە پارا الدى دەگەن كۇدىكپەن «دوستىق» كەدەنىنىڭ «الاكول» كەدەن بەكەتىنىڭ قىزمەتكەرلەرى ۇستالدى، دەپ حابارلايدى قازاقپارات ءتىلشىسى.

«وزدەرىڭىزگە بەلگىلى، كۇنى كەشە «نۇر وتان» پارتياسىنىڭ سەزىندە مەملەكەت باسشىسى كەدەن باستىقتارىنىڭ جۇمىسى بويىنشا ءتارتىپ بۇزۋشىلىقتى تىلگە تيەك ەتكەن بولاتىن. كەشە سىبايلاس جەمقورلىققا قارسى ءىس- قيمىل ۇلتتىق بيۋروسىنىڭ الماتى وبلىسى بويىنشا دەپارتامەنتىمەن ارنايى جەدەل- ىزدەستىرۋ شارالارىن جۇرگىزۋ بارىسىندا وبلىستىق مەملەكەتتىك كىرىستەر دەپارتامەنتىنىڭ «دوستىق» كەدەنىنىڭ «الاكول» كەدەن بەكەتى باسشىسىنىڭ ورىنباسارى، ەكونوميكالىق تەرگەۋ قىزمەتىنىڭ ىشكى قاۋىپسىزدىك ءبولىمىنىڭ اسا ماڭىزدى ىستەرى جونىندەگى تەرگەۋشىسى (بىلىكتىلىگى 4-سانات) جانە اتالعان كەدەن بەكەتىنىڭ ءۇش باس مامانىنا قاتىستى پاراقورلىق فاكتىسى انىقتالدى» ، - دەيدى دەدى اگەنتتىكتە وتكەن باسپا ءسوز ءماسليحاتىندا ارمان بەردالين.

ونىڭ ايتۋىنشا، ۇستالعاندار جالپى قامقورلىعى جانە ترانزيتتىك دەكلاراتسيانى راسىمدەۋدى جەدەلدەتۋ ءۇشىن سىرتقى ەكونوميكالىق قىزمەت قاتىسۋشىلارىنان جۇيەلى نەگىزدە پارا الدى دەگەن كۇدىككە ىلىنگەن. تەرگەۋ جالعاسۋدا.

ەسكە سالا كەتسەك، كەشە «نۇر وتان» پارتياسىنىڭ سەزىندە مەملەكەت باسشىسى كەدەندىك اكىمشىلىكتى قاتاڭ باقىلاۋعا الۋدى تاپسىرعان بولاتىن.