ەلوردالىق ستۋدەنتتەر سۇرانىسقا يە ماماندىقتاردى مەڭگەرىپ جاتىر

 استانا. قازاقپارات - حالىقتى جۇمىسپەن قامتۋ ورتالىعى س. سەيفۋللين اتىنداعى قازاق اگروتەحنيكالىق ۋنيۆەرسيتەتى تەحنيكالىق فاكۋلتەتىنىڭ تۇلەكتەرىن جۇمىسقا ورنالاستىرۋ جارمەڭكەسىنە قاتىسىپ، «جاستار تاجىريبەسى» باعدارلاماسىن تانىستىردى، دەپ حابارلايدى قازاقپارات استانا قالاسى اكىمدىگىنىڭ رەسمي سايتىنا سىلتەمە جاساپ.

حالىقتى جۇمىسپەن قامتۋ ورتالىعى جىل سايىن ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋدىڭ 2017-2021 -جىلدارعا ارنالعان «ەڭبەك» مەملەكەتتىك باعدارلاماسىن ىسكە اسىرۋ شەڭبەرىندە جاستار پراكتيكاسىن ۇيىمداستىرادى.

 «جاستار پراكتيكاسى - جاستارعا ءوز ماماندىعى بويىنشا العاشقى تاجىريبە جيناقتاۋدىڭ جولى. پراكتيكاعا جولدانعان كەزدە ولار جۇمىسسىز بولىپ تىركەلۋى ءتيىس. باعدارلاماعا وقۋىن كەمىندە 3  جىل بۇرىن ءتامامداعان جاسى 29 اسپاعان جاستار قاتىسا الادى. جاستار پراكتيكاسىندا  81345 تەڭگە كولەمىندە ەڭبەكاقى تولەۋ قاراستىرىلعان. بارلىق اۋدارىمدار مەن سالىقتاردى ەسكەرە وتىرىپ، مامان قولىنا  70139 تەڭگە الادى. جاستار پراكتيكاسىنىڭ ۇزاقتىعى 6 ايدان اسپايدى» ، - دەپ مالىمدەدى جۇمىسپەن قامتۋ ورتالىعىنداعىلار.

 پراكتيكادان وتكەن ۋاقىت ەڭبەك كىتاپشاسىنا جازىلادى، ەگەر جۇمىس بەرۋشىنىڭ تالابىنا ساي كەلىپ جاتسا، جاس مامان تۇراقتى جۇمىسقا الىنادى.

جۇمىسپەن قامتۋ ورتالىعى جاستار جىلىندا جاس مامانداردى كوپتەپ جۇمىسقا ورنالاستىرۋدى كوزدەپ وتىر. وسى جىلى ج و و- نى مەن كوللەدجدىڭ 1 مىڭ تۇلەگىنە جاستار پراكتيكاسىن ۇيىمداستىرۋ كوزدەلگەن.