حالىق ءارتىسى جولجاقسىنوۆ ايەل وبرازىنا قۇمار اكتەرلەردى سىناپ تاستادى
حالىق ءارتىسىنىڭ ايتۋىنشا، ەلدەن ەرەكشەلەنۋ ءۇشىن كەمپىر مەن كەلىنشەكتىڭ وبرازىنا ەنگەندەر ساف ونەردى لاستاۋدا. بۇل رەتتە تاجىريبەلى اكتەر اشۋىنا تيگەندەردى جازالاۋدىڭ جولدارىن دا ۇسىندى.
بۇل تۋرالى ن ت ك ارناسىنىڭ «رەۆيۋ» باعدارلاماسىنا سىلتەمە جاساپ Stan.kz حابارلايدى.
«ەركەك - ايەل بولادى. ويباي، مىناۋ دەپ... دوبالداي ءبىر ازامات، تەپسە تەمىر ۇزەتىن. وعان تراكتوردا نە بولماسا ەكسكاۆاتوردا وتىرۋ كەرەك. كومىر قازدىرۋ كەرەك. ال ول ايەلدىڭ كيىمىن كيىپ، ساحناعا شىعادى ۇيالماي. ولار مۇنى ونەر دەپ ويلايتىن بولۋ كەرەك. بۇل - ونەر ەمەس!» - دەيدى دوسحان جولجاقسىنوۆ.
«ەر ادام ايەل ادامنىڭ وبرازىن سومداعىش بولىپ كەتتى دەپ سىنايدى عوي. بۇل جەردە «ونەر» دەگەن ءسوز بار»، - دەيدى ءشمان اجەنىڭ وبرازىمەن تانىلعان ەربولات تولەگەن.
اعا بۋىننىڭ بۇل پىكىرىنە سوڭىنار ەرگەن ىنىلەرى باس شۇلعىماي وتىر. جولجاقسىنوۆتىڭ جوعارىداعى ويىنا قارسىلىق بىلدىرگەندەردىڭ ءبىرى - ءشىمان اپانى سومداعان اكتەر. «ءازىل الەمىندە» ايەل وبرازى ارقىلى تانىلعان ەربولات تولەگەننىڭ، ءوزىن ءسوز قىلعاندارعا ايتار جالعىز عانا جاۋابى بار.
«سونى باياعىدا ايتاتىن بولسا، قۇدايبەرگەن سۇلتانبايەۆقا نەگە ايتپادى؟ قازىر كۇلپاش پەن ءشىمان شىعىپ ەدى، ءبارى سوعان سويلەپ، ءبارى بىلگىش، ءبارى ايتقىش بولىپ كەتتى»، - دەيدى ەربولات.
«ولار تۇڭعىشباي اعاڭ دا، قۇدايبەرگەن اعاڭ دا، ليديا تاتەڭ دە، سونىڭ ىشىندە ءبىراز اكتەرلارىمىز بار. بارلىعى ىزدەندى. ول ىزدەۋ جولى بولاتىن»، - دەيدى دوسحان جولجاقسىنوۆ.
ءسابينا كەلىننىڭ ءومىرىن كوپشىلىككە كينوەكران ارقىلى تانىتقان نۇرتاس ادامباي دا، نازىك جاندىلاردى سومداۋعا قۇشتار. ازىلكەش سوڭعى ۋاقىتتا سىندى دا، ءمىندى دە ءجيى ەستىپ ءجۇر. ءبىراق، دەگەنىنەن قايتپاق ەمەس.
«عالامتوردا ءتۇرلى پىكىرلەردى وقيمىن. بىرەۋلەر: «وي، ايەلدىڭ كيىمىن كيىپ الىپتى. ۇيات ەمەس پە؟»، - دەگەن سياقتى جازبا قالدىرادى. ازىلگە جاقىن ادامدار، مەنىڭ كەيىپكەرىمدى تۇسىنەدى. بۇل مەنىڭ وبرازىم. ال ۇناماسا، قاراماسىن!» - دەيدى نۇرتاس ادامباي.
ادامبايدىڭ ارىپتەسى ايدارقۇلوۆ، كەزەكتى كارتينالاردىڭ بىرىندە كەلىنشەكتىڭ كەيپىنە ەنگەن. ايەل وبرازىن ويناۋ بارىسىندا ءوزىن جايسىز سەزىنگەن داۋرەن، بۇدان بىلاي مۇنداي ءرولدى سومداماۋعا سەرت بەردى.
«باسكەلەس بولعىم كەلمەيدى، ونداي ويىم دا جوق. بولاشاقتا مۇمكىندىگىمشە سول، ايەلدىڭ وبرازىن ويناماۋعا تىرىسامىن»، - دەيدى داۋرەن.