ۋايىمنان ارىلۋ جولدارى
ويتكەنى ادامنىڭ جۇيكە تالشىقتارى وتە نازىك، ەگەر ءوز- ءوزىڭىزدى قۇتقارۋعا تىرىسپاساڭىز، ارەكەت جاساماساڭىز، ساناڭىز سىر بەرۋى مۇمكىن. قيىندىقتى كوتەرە الماي، باستان اۋىرىپ، ىشىمدىككە سالىنىپ، ءوز-ءوزىن قۇردىمعا تاستاعان ادامدار از ەمەس...
امەريكالىق پسيحولوگيالىق اسسوتسياتسياسى 70 پايىز ايەلدىڭ ءوز ۋايىمىن زيان زاتتار ارقىلى جەڭۋگە تىرىساتىنىن انىقتاعان. ەنەرگەتيكالىق سۋسىنداردى ۇزدىكسىز ءىشۋ، اينالاداعى ادامدارمەن ۇرسىسۋ، ۇزدىكسىز تەلەديدار كورۋ، ىشىمدىككە سالىنىپ، تەمەكى تارتىپ كەتۋ سياقتى ومىرىڭىزگە زيانىن تيگىزەتىن ارەكەتتەن اۋلاق بولعانىڭىز ءجون. بۇلاردىڭ قاي- قايسىسى دا ءسىزدىڭ ۋايىمىڭىزدى ۋاقىتشا عانا جەڭىلدەتەدى.
«ءبارى وتكىنشى، بۇل دا وتەدى». ەڭ الدىمەن ءوز- وزىڭىزگە سەنىڭىز! باسىڭىزعا تۇسكەن ءسىز ءۇشىن قيىن جايتتىڭ ءبىر شەشىمى بارى انىق. اسىعىس شەشىم قابىلداۋدان اۋلاق بولىڭىز. «مەن - مىقتىمىن»، «ءبارى جاقسى بولادى!» دەگەن سوزدەردى قايتالاي بەرىڭىز. ادەتتە بۇل ءتاسىل جاقسى ناتيجە بەرەدى.
سەنبە جۇرتقا، تۇرسا دا قانشا ماقتاپ،
اۋرە ەتەدى ىشىنە قۋلىق ساقتاپ...
وزىڭە سەن، ءوزىڭدى الىپ شىعار
ەڭبەگىڭ مەن اقىلىڭ ەكى جاقتاپ، -
دەگەن ابايدىڭ ولەڭى بويتۇمارىڭىز بولسىن.
اعزاڭىزعا دەمالىس جاريالاڭىز. ءبىر ءسات اعزاڭىز بەن ميىڭىزدى تىنىقتىرىپ، كوپتەن بارعىڭىز كەپ، بارا الماي جۇرگەن جەرگە جول تارتىپ، دەمالىڭىز. تولىقتاي دەمالعان سوڭ، مي دا جاڭارىپ، ماسەلەڭىز وڭ شەشىمىن تابۋى مۇمكىن.
تاماقتانىڭىز. ۋايىم كەزىندە تاماعىمىزدان اس وتپەي، تابەتىمىز قاشىپ كەتەدى. بۇرىن جەپ كورمەگەن تاماق ساتىپ الىپ نە بۇرىن ءپىسىرىپ كورمەگەن اسىڭىزدى دايىنداڭىز. دەنساۋلىق ءبىر بۇزىلسا، ونى قالتاڭىزدا قانشا قاراجات بولسا دا، قايتارىپ الۋ وڭاي ەمەس. ۋايىمعا سالىنعان كەزەڭدە ءوز- وزىڭىزدەن قولىڭىزدا بار اقشانى اياماڭىز.
ءوز-وزىڭىزگە دەگەن قارىم-قاتىناستى وزگەرتىڭىز. شاش ۇلگىسى، كيىم كيۋ ستيلىنە وڭ وزگەرىس ەنگىزىپ، ۋايىمعا بەرىلمەڭىز.
ۋايىمدى ۋاقىت قانا جەڭەدى، ۋايىمنىڭ شيپاسى دا - سول. سىزگە تەمىردەي ءتوزىم مەن ءوز- ءوزىڭىزدى الدارقاتۋ كەرەك. ۋايىمداۋعا ۋاقىت بەرمەي، ءبىر ساعاتىڭىزدى دا بوس قالدىرماۋعا تىرىسىڭىز. جۇمىسقا (ساباققا) الدانىپ، جۇمىستان كەيىن ماسەلەن، سپورتپەن شۇعىلدانساڭىز، اعزاڭىز شارشاپ، توسەككە قۇلاعان بويدا، ۇيقى قۇشاعىنا كەتەتىن بولاسىز... ەگەر اعزاڭىز شارشاماسا، ۋايىمعا سالىنىپ، تۇنىمەن دوڭبەكشىپ شىعۋعا تۋرا كەلەدى.
قىز بالا جارالانعىش، نازىك كەلەدى. دەسە دە ساۋ ساناڭىزدى ساقتاپ، ەرىك- جىگەرىڭىزدى جاسىتۋعا جول بەرمەڭىز. ءومىر - تاماشا سىي. ءومىردىڭ ءتاتتى ساتتەرى از ەمەس.
دەرەككوز: Reactor