موڭعوليا استاناسىندا ناۋرىز تويلاۋ باستالىپ كەتتى
بۇل تۋرالى بىزگە تەلەارنادا قىزمەت ىستەيتىن موڭعوليالىق ارىپتەسىمىز گانزوريگ چيمەددورج ايتىپ بەردى.
بۇگىن قىستىڭ سوڭعى كۇنى. ەرتەڭنەن باستاپ كۇللى الەمگە كوكتەمنىڭ العاشقى كۇنى كەلەدى. ال كوكتەمنىڭ ەڭ كورىكتى مەرەكەسىنىڭ ءبىرى - ناۋرىزدى تويلاۋ شىعىس حالىقتارىنىڭ ەجەلگى ءداستۇرى. وسىعان وراي موڭعوليا استاناسى ۇلانباتىر قالاسىندا تۇراتىن قانداستارىمىز ناۋرىز مەرەكەسىن تويلاۋدى باستاپ كەتىپتى.
«بۇل مەرەكە ءبىزدىڭ تەلەارنادا داستۇرگە اينالعان. جىلدا وزىمىزبەن بىرگە جاساسىپ، توسكەيدە مالىمىز، توسەكتە باسىمىز قوسىلعان اعاش ۋىقتى، كيىز تۋىرلىقتى قازاق اعايىندارىمىزدىڭ ناۋرىز مەرەكەسىن اتاپ وتەمىز. ارينە، ءوزىم جاستايىمنان قازاق اعايىندارمەن كورشى تۇرعاندىقتان بۇل مەرەكەنىڭ قىر- سىرىن جەتىك بىلەمىن. ولار دا ءبىزدىڭ شاعان مەرەكەمىزدى بىرگە تويلايدى. ەكەۋى دە جىل باسى مەرەكەسى بولىپ ەسەپتەلەتىندىكتەن، بۇل موڭعول مەن قازاقتىڭ تاتۋلىعىنىڭ، بەرەكە- بىرلىگىنىڭ كۋاسىنە اينالعان مەرەكەلەر. ارينە، بىزگە ۇلانباتىردا تۇراتىن قازاق اعايىندار كومەكتەسىپ، ساحنالىق قويلىمدار مەن ۇلتتىق كيىمدەردى ۇسىندى. بارلىعىنان ناۋرىز كۇنى دايىندالاتىن كوجەنىڭ ءدامدى بولاتىنىن ايتقىم كەلەدى" - دەيدى گانزوريگ چيمەددورج.
baq.kz