شاڭعى فەدەراتسياسى باسى داۋعا قالعان پولتورانينگە بايلانىستى تۇسىنىكتەمە بەردى

استانا. قازاقپارات - ق ر شاڭعى جارىسىنىڭ ۇلتتىق فەدەراتسياسى اۆستريانىڭ زەەفەلدە قالاسىندا ءوتىپ جاتقان الەم چەمپيوناتىندا الەكسەي پولتورانيننىڭ جارىس جولىنا شىقپاي قالۋىنا قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

ەسكە سالا كەتسەك، كەشە نەمىس ءجۋرناليستى حايو زەپپەلت تۆيتتەرىندە اۆستريانىڭ زەەفەلدە قالاسىندا شاڭعى جارىسىنان ءوتىپ جاتقان الەم چەمپيوناتىندا قازاقستان، اۆستريا مەن ەستونيا سپورتشىلارى انتيدوپينگتىك ەرەجەلەردى بۇزدى دەگەن كۇدىككە ىلىنگەنىن جازعان ەدى. حابارلانىپ وتىرعانداي، اۆستريالىق شاڭعىشىلار دومينيك بالداۋف پەن ماكس حاۋكەنى قازىردىڭ وزىندە پوليتسيا ۇستاعان. ولاردان بولەك، 15 شاقىرىمدىق كلاسسيكالىق جارىس جولىنا قازاقستان قۇراماسىنىڭ كوشباسشىسى الەكسەي پولتورانين، سونىمەن بىرگە ەستوندىق اندرەاس ۆەەرپالۋ مەن كارەل تامميارۆ شىقپاعان.

ق ر شاڭعى جارىسىنىڭ ۇلتتىق فەدەراتسياسىنىڭ باسپا ءسوز حاتشىسى سامال ناۋرىزوۆا ءمالىم ەتكەندەي، بۇل جاعداي بارىنە كۇتپەگەن وقيعا بولىپ وتىر.

«بۇعان دەيىن باسقا ب ا ق كوزدەرىنە حابارلاعانىمىزداي، ءبىز كەز كەلگەن ادىلەتسىز ادىستەر مەن تىيىم سالىنعان سۋبستانتسيالاردى قولدانۋعا قارسىمىز. ءبىراق، الەكسەي پولتورانيننىڭ انتيدوپينگتى ەرەجەلەردى بۇزعانى دالەلدەنگەنشە، WADA، موك، FIS- تەن ءبىزدىڭ فەدەراتسياعا حابارلاما كەلىپ، الەكسەيگە رەسمي تۇردە ايىپ تاعىلعانشا ءبىز ءوز سپورتشىمىزدى قورعايمىز. ازىرگە ءىستىڭ ءمان-جايىن انىقتالىپ جاتىر»، - دەيدى فەدەراتسيانىڭ باسپا ءسوز حاتشىسى.