استانادا «قازاق حاندىعى. التىن تاق» فيلمىنىڭ تۇساۋى كەسىلدى

استانا. قازاقپارات - استانادا «قازاق حاندىعى. التىن تاق» فيلمىنىڭ تۇساۋكەسەرى ءوتتى، دەپ حابارلايدى قازاقپارات «قازاقفيلم» كينوستۋدياسىنىڭ رەسمي سايتىنا سىلتەمە جاساپ.

«التىن تاق» تاريحي تۋىندىسى «قازاق حاندىعى» كينوسەريالىنىڭ ەكىنشى ماۋسىمى. ونىڭ العاشقى كورەرمەندەرى ەلىمىزدىڭ بارلىق ايماقتارىنان «نۇر وتان» پارتياسىنىڭ مەرەيتويلىق سەزىنە كەلگەن دەلەگاتتار بولدى. تۇساۋكەسەر ەلورداداعى «قازاقستان» ورتالىق كونسەرت زالىندا ءوتتى.

تۇساۋكەسەر بارىسىندا كينوتۋىندىعا قاتىسقان شىعارماشىلىق قۇرام مەن اكتەرلەر قىزىل كىلەممەن ءجۇرىپ ءوتتى.

 «قازاق حاندىعى» كينوجوباسى ەلباسىنىڭ باستاماسى بويىنشا قولعا الىندى جانە حالىقتىڭ رۋحاني جاڭعىرۋىنا باعىتتالعان. قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ جاڭا تۇرپاتتى جاڭعىرۋدىڭ ەڭ باستى شارتى ۇلتتىق مادەنيەتتى، ۇلتتىق كودتى ساقتاي ءبىلۋ ەكەندىگىن ايتتى. ولار ساقتالماسا، ەشقانداي جاڭعىرۋ بولمايتىندىعىن اتاپ وتكەن بولاتىن. فيلمدە تاريح قانا ەمەس، كوشپەندى حالىقتىڭ باي مادەنيەتى، ونىڭ تىنىس- تىرشىلىگى بەينەلەنگەن. سونىمەن قاتار، ەلباسىنىڭ «ۇلى دالانىڭ جەتى قىرى» ماقالاسىندا كوتەرىلگەن ماسەلەلەر فيلمدە كورىنىس تاپتى»، - دەدى مادەنيەت جانە سپورت ءمينيسترى ارىستانبەك مۇحامەدي ۇلى.

فيلم
پروكاتقا بيىلعى ناۋرىز ايىندا شىعادى.

 كوپ سەريالى كارتينانى ق ر مادەنيەت جانە سپورت مينيسترلىگىنىڭ تاپسىرىسى بويىنشا «Centaurus Rustem Abdrashev production»   ج ش س- ءنىڭ قاتىسۋىمەن ش. ايمانوۆ اتىنداعى «قازاقفيلم» كينوستۋدياسى ءتۇسىردى.

ەكىنشى ماۋسىمنىڭ وقيعا جەلىسى جانىبەك پەن كەرەي حانداردىڭ ءابىلقايىر شايباني ۇرپاقتارىمەن قازاق حاندىعىنىڭ سىعاناقتاعى تاح ءۇشىن تالاسى اينالاسىندا ءوربيدى. بۇل قازاق حاندىعىنداعى ەڭ كۇردەلى كەزەڭدەرىنىڭ ءبىرى.

فيلمنىڭ رەجيسسەرى - قازاقستان رەسپۋبليكاسىنىڭ ەڭبەك سىڭىرگەن قايراتكەرى، كينورەجيسسەر، سسەناريست جانە سۋرەتشى رۇستەم ءابدىراش. ول «قۇراق كورپە»، «قالادان كەلگەن قىز»، «ستالينگە سىيلىق»، ەلباسى جولى كينوەپوپەياسىنىڭ: «بالالىق شاعىمنىڭ اسپانى»، «وت- وزەن»، «تەمىرتاۋ»، «تىعىرىقتان جول تاپقان» جانە «قازاق حاندىعى. الماس قىلىش» اتتى كينوتۋىندىلاردىڭ اۆتورى.

 «قازاق حاندىعى» سەريالىنىڭ ءبىرىنشى ماۋسىمى وتانداستارىمىزدىڭ تاريحقا دەگەن قىزىعۋشىلىعىن وياتتى. شىعارماشىلىق توپتىڭ اتىنا كوپتەگەن العىس حاتتار كەلىپ ءتۇستى، عالامتور جانە الەۋمەتتىك جەلىلەر ارقىلى جىلى لەبىزدەر الدىق. كوپتەگەن پىكىرتالاستار مەن سىندار دا بولدى. حالىق تاراپىنان وسى جوبانىڭ جالعاسىن تۇسىرسە ەكەن دەگەن تىلەگىن اڭعاردىق. بۇل ءبىز ءۇشىن وتە ماڭىزدى» دەپ اتاپ ءوتتى فيلمنىڭ رەجيسسەرى رۇستەم ءابدىراش.

10 سەريادان تۇراتىن تاريحي سەريالدىڭ ەكىنشى ماۋسىمىنىڭ سسەنارييىن جازۋعا ءبىرىنشى ماۋسىمنىڭ اۆتورلارى تيمۋر جاقسىلىقوۆ، سماعۇل ەلۋباي، رۇستەم ءابدىراش قاتىستى.

 تاريحي كينونىڭ تۇسىرىلىمدەرى الماتى وبلىسىندا مامىردىڭ باسىندا باستالعان ەدى. كەيىنىرەك ءتۇسىرىلىم توبى تۇركىستان وبلىسىندا ورنالاسقان «ەلتاي» اۋىلى ماڭىنداعى «ءيىر سۋ» جايلاۋىنا اۋىستى. ءتۇسىرىلىم توبى رەجيسسەر رۇستەم ءابدىراشتىڭ باستاۋىمەن كەرەي مەن جانىبەك حانداردىڭ تۇراعىن - تورەلەردىڭ اۋىلىن جاساپ شىقتى. شايبانيلار مەن قازاق حاندىعىنىڭ ۇلكەن ۇرىس ساحناسى دا جايلاۋدا تۇسىرىلگەن.

 سونىمەن قاتار، تۇسىرىلىمدەر قازاقستاننىڭ تاريحي قالالارى - تاراز جانە تۇركىستاندا ءوتتى. 

«ەكىنشى ماۋسىمنىڭ اتى ايتىپ تۇرعانداي «قازاق حاندىعى. التىن تاق». قازاق حاندىعىنداعى ەڭ ءبىر كۇردەلى كەزەڭدەردىڭ ءبىرى. جانىبەك پەن كەرەيدىڭ ءابىلقايىر شايباني ۇرپاقتارىمەن قازاق حاندىعىنىڭ سىعاناقتاعى تاعى ءۇشىن تاق تالاسى. بۇل ماۋسىمدا تاقتى، اقوردانىڭ استاناسى سىعاناقتى قايتارۋ سىندى ماڭىزدى وقيعالاردىڭ اينالاسىندا ءوربيدى. ءبىرىنشى ماۋسىممەن سالىستىرعاندا بۇل، ارينە، الدەقايدا قىزىعىراق، ديناميكاسى جاعىنان جىلدام. ەكشن كوپ بولادى. كورەرمەنگە قىزىقتى بولادى دەگەن ويدامىن»، - دەدى فيلمنىڭ باس پروديۋسەرى ارمان اسەنوۆ.

ەستەرىڭىزگە سالا كەتەيىك، قازاق حاندىعىنىڭ قۇرىلعانىنا 550 جىل تولۋىنا بايلانىستى جاسالعان سەريالدىڭ ءبىرىنشى ماۋسىمىنىڭ تەلەۆيزيالىق تۇساۋكەسەرى 2017 -جىلدىڭ ناۋرىزىندا وتكەن بولاتىن. سونداي- اق، سول جىلى قاڭتار ايىندا «الماس قىلىش» اتتى كينونۇسقاسى جالپى ۇلتتىق پروكاتقا شىقتى.

قويۋشى- رەجيسسەرى: رۇستەم ءابدىراش

سسەناري اۆتورلارى: سماعۇل ەلۋباي، تيمۋر جاقسىلىقوۆ، رۇستەم ءابدىراش

قويۋشى سۋرەتشى: مۇرات كاريپوۆ

قويۋشى وپەراتورلارى: ساپار كويچۋمانوۆ، الەكساندر پلوتنيكوۆ

كوستيۋم جونىندەگى سۋرەتشى: اجار اۋباكىروۆا

 حۋدوجنيك پو گريمۋ: سەرگەي ماۋرين

باس پروديۋسەرى: ارمان اسەنوۆ

كومپوزيتورى: ءابىلقايىر ءابدىراش

رەداكتورى: ەرلان تولەۋتاي

 باستى رولدە: قايرات كەمالوۆ، ەركەبۇلان دايىروۆ، دوسحان جولجاقسىنوۆ، يىسبەك ءابىلماجينوۆ، ايان وتەپبەرگەن، مەيىرعات امانگەلدين، نيازبەك شايسۇلتانوۆ، بەكبولات تىلەۋحان، ارمان قوجا، شۇعىلا ساپارعالي، مادينا ەسمانوۆا، عازيزا تىلەۋباي، قارلىعاش مۇحامەدجانوۆا، ىڭكار ءابدىراش، فاريزا ەسكەرمەسوۆا، اشىلەر سۇلەيمەنوۆ جانە باسقالار.