جىگىتتىڭ ويىنداعى قىز قانداي؟
بەت-ءپىشىنى سۇيكىمدى، سىمباتى سۇلۋ، مىنەز-قىلىعى جايلى جاندى ىزدەپ، ءوز يدەالىن قالىپتاستىرادى. الايدا ويشا قۇرىلعان سۇلبا وڭايلىقپەن تابىلمايدى. كەيدە ءتىپتى سول يدەالدى ءومىرىنىڭ سوڭىنا دەيىن ىزدەپ وتەتىن ادامدار از ەمەس.
پسيحولوگتاردىڭ ايتۋىنشا، نازىك جاندىلار بولاشاق جارىنىڭ قانداي ەكەنىن %95 عا بىلەتىن بولسا، ەر ادامدار مۇلدە ەلەستەتە المايدى ەكەن. سەبەبى، ولاردىڭ قالاۋى ۋاقىت اعىسىمەن وزگەرىپ، الەۋمەتتىك جاعدايىنا بايلانىستى اۋىسادى. مەنىڭ تاڭداۋىم وسى دەپ قاتەلەسىپ، كەيىننەن قوساعىن تالاي وزگەرتىپ جاتاتىندار بارشىلىق. دەمەك، ولاردىڭ ويىنان شىعۋ ءۇشىن، ارۋلارىمىزدىڭ كوركىنە اقىلى ساي بولۋى قاجەت. مىنەزىنەن سامال جەلدىڭ جىلى لەبى ەسىپ، ەستى جىگىتتى ەسسىز سۇيگىزەتىن قىلىق تا كەرەك. ءتىپتى، وسىعان وراي بەلدى جۋرنالدار ساۋالناما دا جۇرگىزىپتى. ساۋالناما ناتيجەسى بويىنشا، ءار جىگىت جارىنىڭ بويىندا مىنا قاسيەتتەر بولعانىن قالايدى ەكەن:
ول جىگىتتىڭ وزگەرۋىنە ىقپال ەتۋى ءتيىس.
بىلايشا ايتقاندا، ەر ادام زايىبىنىڭ قاسىندا ءوزىن وزگەشە سەزىنۋى ءتيىس. قامقور بوپ، ءوزىن تىرەك ساناعان ساتتە عانا ولار ءبۇتىن ءبىتىم بولا الادى. دوس- جاراندارىنىڭ اراسىندا ونى سىيلايتىن ادام بارىن ءبىلدىرۋ ارقىلى ونىڭ دارەجەسى وسەدى. قورىتا ايقاندا، ول ءوزىن ناعىز جىگىتتىڭ سۇلتانى دەپ تانۋى ءتيىس.
جۇبايىن سىيلاۋ، اراداعى سۇيىسپەنشىلىك.
«مەنى بىرەۋ سۇيسە دەيمىن سەبەپسىز» دەمەكشى، قاي ادام بولماسىن ءوزىن اتاق- داڭقى، نە كەلبەتى، جيناعان ابىرويى ءۇشىن ەمەس، جاي عانا سەبەپسىز سۇيگەنىن قالايدى. سول سەكىلدى ەر ازاماتتار دا قىزداردىڭ قالتاسىنا ەمەس، جۇرەگىنە ۇڭىلگەگەنىن دۇرىس سانايدى. اراداعى قارىم- قاتىناستىڭ قانشالىقتى ادال ەكەنى ارۋلارىمىزدىڭ تاراپىنان دا ءبىلىنىپ جاتادى.
قيالداعى قىز ونىڭ اتا-اناسىمەن، دوستارىمەن جاقسى ءتىل تابىسا الادى.
قاي جىگىت بولماسىن ومىرلىك سىڭارىن ىزدەگەن ساتتە ەڭ ءبىرىنشى، اناسىنا ۇقساس ادام تابۋعا تىرىسادى. ونىڭ الدىنداعى ەڭ ءبىرىنشى يدەال ايەل - اناسى. سوندىقتان دا ول كىسىمەن جاقسى قارىم- قاتىناستا بولۋ - قاي جىگىتتىڭ بولماسىن ەڭ ءبىرىنشى تالابى. كەيىن، ارينە، دوستارى. دوستارىمەن دە جاراسىمدى اڭگىمە-دۇكەن قۇرا ءبىلۋ كەرەك.
ول ارۋدىڭ بويىندا سەبەپسىز ايىپتاۋ مەن كىنا تاعۋ سەكىلدى كەرەعار قاسيەتتەر بولماۋى قاجەت.
راس، ايەل زاتىنىڭ ءبىر كەمشىلىگى دە وسى. جۇبايىنا قايتا-قايتا ايتىلعان ەسكەرتۋلەر مەن سەبەپسىز كىنا تاعۋ ولاردىڭ بويىنا ءسىڭىپ كەتكەن قاسيەت. ال مۇنداي قىلىقتار جىگىتتەردىڭ ىزاسىنا ءتيىپ، اشۋىن كەلتىرەرى انىق. سوندىقتان ولارعا دەگەن رەنىشىڭىزدى تيىپ، ءدايىم شات جۇرۋگە ترىسىڭىز!
ناعىز قاھارمان ەكەنىن سەزدىرۋ.
كەيدە اشۋىمىزعا بوي الدىرىپ، جەكىرىپ، ايعايلاپ جاتاتىن كەزەڭدەر كوپ بولادى. سونداي جايتتا ەر ادامدار ءسوز كوتەرمەي، وزدەرىن قولعا ۇيرەتىلگەن كۇشىك سەكىلدى سەزىنەدى. سوندىقتان سۇيىكتىڭىزبەن اقىلداسىپ، ونى ءارقاشان دەمەپ وتىرۋ - باياندى باقىتتىڭ نىشانى بولماق. ارينە، ماحابباتىڭ باستاۋى - سىيلاستىق. وزىڭىزدىكى دۇرىس ەكەن دەپ، ءسوز بەرمەي، ونى تىڭداماۋعا ءسىزدىڭ ەشقانداي قۇقىڭىز جوق. كەرىسىنشە، جاقسىسىن اسىرىپ، جامانىن جاسىرىپ وتىرۋ ءسىزدىڭ مىندەتىڭىز.
ارمانداعىن ارۋ - حور قىزىنداي سۇلۋ، ءارى اقىلدى بولۋى كەرەك.
ءار ادامنىڭ سۇلۋلىق جايىندا تۇسىنگى ءار ءتۇرلى. ءبىرى سىرتقى كەلبەت دەسە، ەندى بىرەۋى ىشكى جان دۇنيە دەيدى. ەكى قاعيدانى دا جوققا شىعارۋعا بولمايدى. ءتان سۇلۋلىعىمەن جان سۇلۋلىعى قاتار كەلسە، ناعىز حور قىزى سول بولماق. ەڭ الدىمەن قىزدارىمىز كۇتىنىپ، ءوزىن ساقتاي ءبىلۋى كەرەك. رۋحاني تارتىمدىلىق تا تابىلىپ، بويىندا توعىسۋى ءتيىس. ءجۇرىس- تۇرىسىمەن، سويلەۋ مانەرىمەن دە جۇمىس جاساعان ابزال.
اتالعان ارەكەتتەردى جاساپ، تابيعات سىيلاعان نازىكتىكتى قولدانساڭىز جىگىتىڭىز سىزدەن ەشقايدا كەتە المايدى. «ايەل اشۋلانسا - جەڭىلەدى، ەركەلەسە - جەڭەدى». سوندىقتان اشۋعا بوي الدىرماي، قۋلىقپەن جەڭۋگە تىرىسقانىڭىز ءجون. «قىزدىڭ قىرىق ايلاسى بار» دەمەي مە؟ ءوزىڭىزدىڭ ايەل ەكەنىڭىزدى ەشقاشان ەستەن شىعارماڭىز! ءسىزدىڭ قولىڭىزدان كەلمەتىن نارسە كەمدە-كەم! سوندىقتان، ىسكە ءسات!