كۇندىزگى ۇيقىنىڭ پايداسى

 استانا. قازاقپارات - كۇندىزگى ۇيقى قالامايتىن ادام جوق شىعار. كەيدە قاتتى شارشايتىن ۋاقىتتارىمىز بولاتىن بەلگىلى.

مۇنداي جاعداي ۇيقى قانباعاندا نەمەسە ۇزدىكسىز وي جۇمىسىمەن اينالىسقاندا ءجيى كەزدەسىپ جاتادى. مۇنداي ماسەلەنىڭ تەكسەرىلگەن جانە ءتيىمدى ەمى بار. ول - كۇندىزگى ۇيقى. ول ءسىزدىڭ اعزاڭىزداعى كوپتەگەن ماسەلەلەردى شەشۋگە كومەكتەسە الادى.

ۇزاق جۇمىس كۇنىنەن كەيىن كوپتەگەن ادامدار ۇيىنە شارشاپ كەلەدى. ەگەر تۇستە ازداعان ۋاقىتىڭىز بولسا، دەمالىپ الىڭىز. ءتىپتى 15-20 مينۋتتىق ۇيقى ءسىزدىڭ اعزاڭىزدىڭ كۇنى بويى جاقسى اسەر ەتەدى. كۇندىزگى ۇيقى ەنەرگيا مەن دەنساۋلىق سىيلايدى.

كۇندىزگى ۇيقى كومەكتەسەدى:

ويلاۋ قابىلەتى مەن دەنەنى قالپىنا كەلتىرۋگە. فيزيكالىق جانە اقىل-ويدىڭ شارشاۋى ءار ادامعا تانىس شىعار. بۇل اعزاڭىزدىڭ سىزگە ازداعان ۋاقىت دەمالۋ كەرەك ەكەندىگىن سەزدىرىپ تۇرعانى. ارينە، جارتى ساعات بويى كوڭىلىڭىزدى اۋلاپ تەلەديدار كورىڭىزگە بولادى. الايدا تەلەديدار قاراۋ سىزگە كومەك بەرمەيدى. وداندا ۋاقىتىڭىزدى پايدامەن جۇمساڭىز. ازعانا ۇيىقتاپ الىڭىز. بۇل وي مەن دەنەنىڭ ءتيىمدى جۇمىس جاساۋىنا پايدالى كەرەمەت يدەيا بولار ەدى. 15 مينۋتتىق ۇيقىنىڭ ارقاسىندا ءسىز ويىڭىزدى ايقىن ەتىپ، جۇمىس ىستەۋ قابىلەتىڭىزدى ارتتىرىپ، سەرگەك جۇرە الاسىز.

ەسكە ساقتاۋ قابىلەتىن جاقسارتۋ. كوپتەگەن تانىمال ساياساتكەرلەر مەن عالىمداردىڭ كۇندىزگى ۋاقىتتا ۇيىقتاپ الاتىن ادەتتەرى بولعان. مۇنداي ادەتكە ولار اسىرەسە جاستارى كەلگەن كەزدە ۇيرەنە باستاعان. جانە وسى جەردە ولاردىڭ ارەكەتتەرى وتە دۇرىس بولدى. سەبەبى قىسقا ۇيقى تەك قانا اعزانى قالپىنا كەلتىرمەيدى، سونىمەن بىرگە ەستە ساقتاۋ قابىلەتىنىڭ ارتۋىنا وڭ اسەرىن تيگىزەدى. شەتەلدىك عالىمدار زەرتتەۋ جۇمىستارىن جۇرگىزگەندە ۇيقىنىڭ تەك ەستە ساقتاۋ قابىلەتىن جاقسارتۋعا عانا ەمەس، سونىمەن قاتار اقپاراتتى قابىلداۋ جانە ءبىلىم الۋ پروتسەسسىندە كومەگى كوپ ەكەنىن انىقتاعان جانە دالەلدەگەن.

دەنساۋلىقتى جانە سۇلۋلىقتى ساقتاۋ. كۇننىڭ ەكىنشى جارتىسىنداعى ۇيقى سونىمەن بىرگە دەنساۋلىق پەن سۇلۋلىقتىڭ كوزى بولىپ تابىلادى. كۇندىزگى ۇيقى اۋرۋدىڭ الدىن الادى. اسىرەسە، جۇيكە جانە جۇرەك- قان تامىرلارى اۋرۋلارىنىڭ الدىن- الۋعا كومەكتەسەدى.

كوڭىل-كۇيدى جاقسارتادى. كۇيزەلىسكە تولى كۇننەن كەيىن نەمەسە جاعىمسىز جاعدايلاردان كەيىن بولعان تەز ۇيقى ادامدى اياققا تۇرعىزىپ الەمگە وڭ كوزبەن قاراۋعا مۇمكىندىك بەرەدى. ءبىز ۇيىقتاعان كەزدە، ءبىزدىڭ دەنەمىز سەروتونين (باقىت گورمونى) بولەدى. بۇل گورمون ءوز كەزەگىندە انتيدەپرەسسانت جانە قاناعاتتانۋ سەزىمىن ارتتىرادى.