نۇر وتان سەزى: ەلباسى قانداي تاپسىرما جۇكتەدى
اتاپ ايتقاندا، رەسپۋبليكالىق بيۋدجەت شىعىندارىنىڭ 45 پروتسەنتى الەۋمەتتىك سالاعا باعىتتالادى.
«بيىل رەسپۋبليكالىق بيۋدجەت شىعىندارىنىڭ 45 پروتسەنتى الەۋمەتتىك سالاعا باعىتتالادى. الەۋمەتتىك بولىمدە ءبىرقاتار تۇيتكىلدى ماسەلەلەردىڭ بار ەكەنى انىقتالدى. وسىعان بايلانىستى، ازاماتتارىمىزدىڭ ءال- اۋقاتى مەن ءومىر ساپاسىن جاقسارتۋ ءۇشىن ۇلتتىق قوردان قاراجات ءبولۋ تۋرالى شەشىم قابىلدادىم. ۇكىمەت بۇل شىعىنداردى دۇرىس اكىمشىلىكتەندىرۋى كەرەك» ، - دەدى پرەزيدەنت.
بيىلعى 1 - شىلدەدەن باستاپ بيۋدجەت سالاسىنداعى ايلىعى تومەن قىزمەتكەرلەردىڭ جالاقىسىن 30 پايىزعا ارتتىرۋ تاپسىرىلدى.
سونىمەن قاتار، اۋداندىق جانە وبلىستىق دەڭگەيلەردە ازاماتتارمەن تىكەلەي جۇمىس ىستەيتىن اتقارۋشى ورگاندار قىزمەتكەرلەرىنىڭ ەڭبەكاقىسىن ورتاشا ەسەپپەن 25 پايىزعا كوتەرۋ جۇكتەلدى. وسى ماقساتتا 2019-2021 -جىلدارى قوسىمشا 980 ميلليارد تەڭگە بولىنەتىن بولادى.
ۇكىمەت الەۋمەتتىك جاعىنان از قامتىلعان ازاماتتاردى، اسىرەسە، كوپبالالى وتباسىلاردى قولداۋ شارالارىن كەڭەيتۋ باعىتىندا جۇمىس ىستەيدى.
«اتالعان كورسەتكىشتى كۇنكورىس دەڭگەيىنىڭ 70 پايىزىنا دەيىن جەتكىزۋىمىز كەرەك. ال اتاۋلى كومەك الىپ وتىرعان كوپبالالى وتباسىلاردىڭ ءاربىر بالاسىنا بەرىلەتىن جاردەماقىنى 21 مىڭ تەڭگەگە دەيىن ءوسىرۋدى تاپسىرامىن. اتالعان كومەكتى بارىنشا جەڭىلدەتۋ كەرەك. حالىق ارى- بەرى شاپقىلاپ جۇرمەسىن. سوسىن ونداي وتباسىلاردىڭ تابىسىن ەسەپتەگەندە باسقا الەۋمەتتىك جاردەماقىلاردى ساناۋدى الىپ تاستاۋ قاجەت» ، - دەدى ن. نازاربايەۆ.
تاعى ءبىر جاڭالىق، ۇكىمەتكە مۇگەدەك بالالاردى اسىراپ وتىرعان اتا- انالاردىڭ جاردەماقىسىن 30 پايىزعا كوبەيتۋ تاپسىرىلدى. وسىنىڭ ارقاسىندا، 100 مىڭ ادامنىڭ جاردەماقىسى وسەدى. وسى ماقساتتا 2019-2021 -جىلدارى قوسىمشا 300 ميلليارد تەڭگە بولىنبەك.
بۇدان بولەك، تولىق ەمەس كوپبالالى وتباسىلارعا ۇيدەن جۇمىس ىستەۋگە مۇمكىنشىلىك جاساۋ جۇكتەلدى. ال اۋىلداعى كوپبالالى وتباسىلارعا جەكەلەگەن گرانتتار، كۆوتالار جانە شاعىن نەسيەلەر بولىنەدى.
سەزد بارىسىندا ەلباسى ۇكىمەتكە «نۇرلى جەر» باعدارلاماسىن كەڭەيتىپ، ونىڭ اياسىندا كوپبالالى وتباسىلارعا 40 مىڭ جالدامالى پاتەر سالۋدى تاپسىردى. بۇل شاراعا جىل سايىن 50 ميلليارد تەڭگە بولىنەتىن بولادى.
كوپبالالى جانە تولىق ەمەس وتباسىلارعا، مۇگەدەك بالالارى بار، از قامتىلعان وتباسىلارعا پاتەر ساتىپ الۋدىڭ قولجەتىمدىلىگى ارتادى.
بۇل ساناتتاعى ازاماتتارعا تۇرعىن ءۇي قۇرىلىس جيناق جۇيەسى ارقىلى جىلدىق 2-3 پايىزبەن تۇرعىن ءۇي زاەمىن بەرۋ جەڭىلدىكتەرى تەتىكتەرى ازىرلەنەدى.
مەملەكەت باسشىسى قوعامدىق دەنساۋلىق پەن العاشقى مەديتسينالىق كومەككە بولىنەتىن قاراجاتتىڭ جالپى دەنساۋلىق ساقتاۋ سالاسىنا قاراستىرىلعان اقشانىڭ 40 پايىزىنان 60 پايىزعا دەيىن ارتتىرىلۋى تيىستىگىن ايتتى. اتالعان سالانى دامىتۋعا قوسىمشا 120 ميلليارد تەڭگە بولىنەدى.
ەلباسى ءوز سوزىندە زاماناۋي جەرگىلىكتى جولدارى جەلىسىن كەڭەيتۋ - بۇل ۇكىمەتتىڭ باستى مىندەتى ەكەنىن، ونىڭ ورىندالۋىن پارتيا باقىلاۋى قاجەت ەكەنىن قاداپ ايتتى.
بۇل ماقساتقا قوسىمشا 350 ميلليارد تەڭگە بولىنەدى. ق ر پرەزيدەنتىنىڭ دەرەگىنشە، اتالعان شارالاردىڭ ارقاسىندا 2025 -جىلعا قاراي وبلىستىق جانە اۋداندىق ماڭىزى بار جولداردىڭ 95 پايىزىنىڭ جاي- كۇيى ايتارلىقتاي جاقساراتىن بولادى. سونىمەن قاتار مەملەكەت باسشىسى وڭىرلىك كولىك ينفراقۇرىلىمىنىڭ بارلىق نىساندارى، ونىڭ ىشىندە اۋەجايلار، اۆتو جانە تەمىرجول ۆوكزالدارى جاڭعىرتىلۋى تيىستىگىن باسا ايتتى.
بەلگىلى بولعانداي، قازاقستانداعى ءىرى قالالار ءۇشىن، ياعني استانا، الماتى جانە شىمكەنت قالالارى توڭىرەگىندەگى پروبلەمالاردى شەشۋگە 2019-2021 -جىلدارى قوسىمشا 90 ميلليارد تەڭگە بولىنەدى. سونىمەن بىرگە، كىشى جانە مونوقالالاردى دامىتۋ ءۇشىن دە جىلىنا 10 ميلليارد تەڭگەدەن ءۇش جىل بويى قوسىمشا قاراجات بولىنەتىنى حابارلاندى.
حالىقتى تازا اۋىز سۋمەن قامتۋ جانە جاپپاي گازداندىرۋ - ماڭىزدى باسىمدىق بولىپ قالا بەرەدى.
«ەلدى مەكەندەرگە سۋ تارتۋ جانە سۋمەن قامتاماسىز ەتۋ جۇمىستارىنا قوسىمشا 140 ميلليارد تەڭگە ءبولۋدى تاپسىرامىن. بۇل قاراجاتتى وبلىستار الىپ، جۇمىسقا كىرىسۋى كەرەك. بۇل شەشىم وسى سالاداعى 2,2 ميلليون ازاماتتىڭ ماسەلەسىن شەشەدى» ، - دەپ ناقتىلادى پرەزيدەنت.
ەلباسى گازداندىرۋ جانە ەلەكتر قۋاتىمەن قامتۋ ءۇشىن 190 ميلليارد تەڭگە ءبولۋدى تاپسىردى. بۇل شارالار 1,1 ميلليون ادامدى گازبەن قامتۋعا مۇمكىندىك بەرەدى جانە وڭىرلىك ەنەرگيامەن قامتۋ الەۋەتىن ارتتىرادى. بۇل ماقساتتار ءۇشىن ۇكىمەتكە 2019-2021 -جىلدار ارالىعىندا 920 ميلليارد تەڭگە قاراستىرىلماق.
ايتپاقشى، نۇرسۇلتان نازاربايەۆ پارتياعا «قۇتتى مەكەن» جوباسىن ىسكە اسىرۋدى تاپسىردى.
«نۇر وتان» پارتياسى ەلىمىزدەگى ينجەنەرلىك- الەۋمەتتىك ينفراقۇرىلىمدى دامىتۋعا باعىتتالعان «قۇتتى مەكەن» پارتيالىق جوباسىن ىسكە قوسۋعا كىرىسەدى. وسىلايشا، 7,5 ميلليون اۋىل تۇرعىندارىنىڭ جاعدايىن جاقسارتۋ مۇمكىندىگى تۋادى. ەڭ الدىمەن، ۇكىمەت اكىمدەرمەن جانە ماسليحاتتارمەن بىرىگىپ، كەلەشەگى بار اۋىلداردى ىرىكتەپ، الەۋمەتتىك نىساندار مەن ينتەرناتتار تۇرعىزۋ جۇمىستارىن جۇرگىزەدى.
اۋىلدى جەرلەردە تابىس جاساۋدىڭ الەۋەتتى بار ەكەنىنە توقتالعان ەلباسى، وسىعان بايلانىستى ۇكىمەتكە «اۋىل - ەل بەسىگى» ارنايى جوباسىن ىسكە اسىرۋ بويىنشا ۇسىنىس ازىرلەۋدى تاپسىردى. جوبانى قارجىلاندىرۋعا 2019-2021 -جىلدارعا 90 ميلليارد بولىنەتىن بولادى. بۇل ءوز كەزەگىندە جاستاردىڭ اۋىلدىق جەرلەردە تۇراقتاۋىنا ىقپال ەتەدى.
«پارتيا حالىقتىڭ كۇندەلىكتى ماسەلەلەرىن شەشۋگە بەلسەنە اتسالىسۋى قاجەت. اتالعان جۇمىس «حالىققا كومەك» جوباسىن دا كۇشەيتەدى دەگەن سەنىم بار. بۇگىندە قوعامنىڭ وزەكتى ماسەلەلەرىن دەر كەزىندە انىقتاپ، مەملەكەتتىك ورگانداردى سوعان قاراي جۇمىلدىرۋ قاجەت. بۇل - ناعىز ناتيجەلى ستراتەگيا. ول ءۇشىن حالىقپەن كەرى بايلانىستىڭ مىقتى جۇيەسىن جاساپ شىققان ءجون» ، - دەدى ن. نازاربايەۆ "نۇر وتان" پارتياسىنىڭ XVIII سەزىندە.
پرەزيدەنتتىڭ ايتۋىنشا، بۇگىندە «نۇر وتان» پارتياسىنىڭ قابىلداۋ بولىمشەلەرىن بارىنشا كۇشەيتۋ كەرەك. اتالعان قۇرىلىمدار حالىققا كومەك بەرۋدىڭ «ءبىرىڭعاي تەرەزەسىنە» اينالۋى شارت. «بۇل جەردە بيۋروكراتياعا جول جوق. «نۇر وتان» پارتياسىنىڭ بارلىق فيليالدارى سوعان كۇش سالۋى قاجەت. پارتيا حالىقتىڭ بارلىق ساناتتارىن قورعاي ءبىلۋى كەرەك. ءسويتىپ، مەملەكەت پەن حالىق اراسىنداعى كوپىر ىسپەتتەس بولۋى شارت» ، - دەپ اتاپ كورسەتتى مەملەكەت باسشىسى.
بۇگىنگى سەز بارىسىندا مەملەكەتتىك باعدارلامالاردىڭ تيىمدىلىگىن ەرەكشە باقىلاۋعا الۋ تاپسىرىلدى.
«بۇگىندە يندۋستريا، اۋىل شارۋاشىلىعى، ينفراقۇرىلىم، دەنساۋلىق ساقتاۋ، ءبىلىم جانە تاعى باسقا سالالار بويىنشا مەملەكەتتىك باعدارلامار بار. وعان قىرۋار قارجى ءبولىندى. سونىڭ ءبارى جۇزەگە اساتىن بولسا، حالىقتىڭ جاعدايى تۇزەلەدى. وسىعان بايلانىستى «نۇر وتان» پارتياسى مەن پرەزيدەنت اكىمشىلىگىنە مەملەكەتتىك باعدارلامالار مەن رەفورمالاردىڭ تيىمدىلىگىن باعالايتىن ورتالىقتى قۇرۋدى تاپسىرامىن» ، - دەدى ن. نازاربايەۆ «نۇر وتان» پارتياسىنىڭ XVIII سەزىندە.
ايتا كەتەيىك، «نۇر وتان» پارتياسىنىڭ 2030 -جىلعا دەيىنگى باعدارلاماسى قابىلداندى.
«سوڭعى بەس جىلدىڭ ىشىندە زاڭنامالىق وزگەرىستەر مەن جاڭا تاجىريبەلەرگە سايكەس، پارتيا جارعىسىنا كەيبىر نورمالاردى ەنگىزۋ قاجەتتىگى تۋىنداپ وتىر. ەڭ الدىمەن، قازاق ءتىلىنىڭ لاتىن الىپبيىنە كوشۋىنە بايلانىستى پارتيانىڭ مەملەكەتتىك تىلدەگى اتاۋىندا لاتىن ارىپتەرىن قولدانۋ ۇسىنىلۋدا. ەكراننان پارتيانىڭ جاڭارتىلعان لوگوتيپىن كورۋلەرىڭىزگە بولادى. ۇسىنىلىپ وتىرعان لوگوتيپتە كۇننىڭ 17 ساۋلەسى بەينەلەنگەن. ول ءبىزدىڭ وبلىستارىمىز بەن الماتى، شىمكەنت، استانا قالالارىن سيمۆوليكالىق تۇرعىدا بەينەلەيدى. وسى رەتتە پارتيانىڭ لاتىن الىپبيىندەگى اتاۋىن - پارتيا ءتوراعاسىنىڭ ءوز قولىمەن جازعانىن اتاپ وتكىم كەلەدى» ، - دەدى «نۇر وتان» پارتياسى ءتوراعاسىنىڭ ءبىرىنشى ورىنباسارى ماۋلەن اشىمبايەۆ ەكراننان «Nur Otan» دەپ لاتىن ارىپتەرىنە وزگەرتىلگەن لوگوتيپتى كورسەتە وتىرىپ.