ەرلان سايروۆ: ەلىمىزدە الەۋمەتتىك ماسەلەلەردى شەشۋدە وڭتايلى ادىستەر تابىلىپ جاتىر

 استانا. قازاقپارات - پرەزيدەنت نۇرسۇلتان نازاربايەۆتىڭ «نۇر وتان» پارتياسىنىڭ كەزەكتى سەزىندە ايتىلعان كەشەندى جۇمىستار ىسكە اسىرىلاتىن بولسا، ەلىمىز ادام دامۋ يندەكسى بويىنشا كوش ىلگەرى جىلجيدى دەگەن سەنىم بار.

 مۇنداي پىكىردى قازاقپارات تىلشىسىنە بەلگىلى ساياساتتانۋشى ەرلان سايروۆ ءبىلدىردى، دەپ حابارلايدى قازاقپارات ءتىلشىسى.

«ەلىمىزدە الەۋمەتتىك ماسەلەلەردى شەشۋدە وڭتايلى ادىستەر تابىلىپ جاتىر. «نۇر وتان» پارتياسىنىڭ كەزەكتى سەزىندەگى كوتەرىلگەن باستامالاردىڭ ءبارى دە ادام ءۇشىن، ادامنىڭ يگىلىگى ءۇشىن جاسالىپ جاتىر دەپ ايتساق بولادى. ءوزىڭىز بىلەتىندەي، جيىندا انا مەن بالانىڭ ماسەلەسى جان- جاقتى قاراستىرىلىپ، ەلىمىزدەگى ادامنىڭ دامۋ يندەكسىن كوتەرۋ ماسەلەسى نازاردان تىس قالمادى. بۇعان قوسا، ءبىزدىڭ ەلىمىزدەگى ايماقتاردى - اۋداندار مەن اۋىلداردىڭ ينفراقۇرىلىمىن دامىتۋ ماسەلەسى قارالىپ، ناقتى سومالار بولىنگەلى وتىر» ، - دەيدى ساياساتتانۋشى.

ەرلان سايروۆتىڭ ايتۋىنشا، كوپتەن بەرى جوندەۋدى قاجەت ەتىپ وتىرعان اۋدانارالىق جانە اۋىلارالىق جولداردىڭ سالىنۋى - اۋىل- ايماقتاعى اعايىننىڭ ومىرىنە وڭ ىقپالىن تيگىزەرى انىق.

«جول دەگەن - كۇرەتامىر. جولدىڭ سالىنۋى شاعىن جانە ورتا بيزنەستىڭ دامۋىنا دا مۋلتيپليكاتيۆتى اسەر بەرەرى ءسوزسىز. ويتكەنى، ينفراقۇرىلىم دامىسا، مىندەتتى تۇردە سول جەردىڭ ىشكى ءونىمى 5-10 پايىزعا وسەتىنى - زاڭدىلىق. كەلەسى ءبىر سالا - مەديتسينا. مەديتسينا سالاسىنا 140 ميلليارد تەڭگەدەن استام قاراجات بولىنبەك. بۇل ءبىزدىڭ ەلىمىزدەگى ءومىر ءسۇرۋ جاسىن ارتتىرۋداعى كەشەندى قادام دەپ ايتۋعا بولادى. قازىردىڭ وزىندە قازاقستاندا ورتاشا ءومىر ءسۇرۋ ۇزاقتىعى 73 جاستان استى. ياعني، وسى كەشەندى جۇمىستار ىسكە اسىرىلاتىن بولسا، وندا ەلىمىز ادام دامۋ يندەكسى بويىنشا كوش ىلگەرى جىلجيدى دەگەن سەنىم بار» ، - دەپ ءتۇيدى ەرلان سايروۆ.

ايتا كەتسەك، بۇگىن ەلورداداعى تاۋەلسىزدىك سارايىندا ەلباسى نۇرسۇلتان نازاربايەۆتىڭ توراعالىعىمەن «نۇر وتان» پارتياسىنىڭ كەزەكتى XVIII سەزى ءوتتى. جيىندا مەملەكەت باسشىسى حالىقتى قولداۋعا ارنالعان ءبىرشاما الەۋمەتتىك باستامالار تۋرالى ءسوز قوزعاعان بولاتىن.