بۇرىنعى ىشكى ىستەر ءمينيسترى قازىرگى قىزمەتى جايلى ايتىپ بەردى

 استانا. قازاقپارات - ق ر ەكس-ىشكى ىستەر ءمينيسترى قالمۇحانبەت قاسىموۆ جاڭادان تاعايىندالعان پرەزيدەنت كەڭەسشىسى - قاۋىپسىزدىك كەڭەسىنىڭ حاتشىسى قىزمەتى جايلى ايتىپ بەردى.

بۇل تۋرالى Tengrinews.kz حابارلايدى.

تىلشىگە بەرگەن سۇحباتىندا قاسىموۆ مۇنداي تاعايىنداۋدى كۇتپەگەنىن ايتتى. «ءبىز يىعىمىزعا پوگون تاققان ادامبىز، قاي لاۋازىمعا تاعايىنداسا دا سول جاقتا قىزمەت ەتەمىز. ارينە، ءبىز ۇزاق ۋاقىت قىزمەت جاسامايمىز. مەن مينيستر بولعانىما بەس جىل بولعان كەزدە اتقارىپ جاتقان قىزمەتىم جايلى شەشىم كۇتكەنمىن. ءبىراق ودان كەيىن دە جۇمىس ىستەدىم. جاقىندا جاڭا جۇمىستى اتقارىپ جۇرگەنىمە ءبىر اي بولادى. بۇل جۇمىس وتە جاۋاپتى جانە اۋىر. بۇل جۇمىستىڭ باعىتى كوپ: قورعانىس ونەركاسىبى، قورعانىس قاۋىپسىزدىگى جانە ەكولوگيالىق ماسەلەلەر دە بار. بۇل سالالاردىڭ بارلىعىنا نازار اۋدارىپ ءجۇرمىز. كۇن سايىن پرەزيدەنتكە اتقارعان جۇمىستار جايلى قۇجاتتاما تاپسىرامىز»، - دەدى قالمۇحانبەت قاسىموۆ.

وعان قوسا قالمۇحانبەت قاسىموۆ ىشكى ىستەر ءمينيسترى قىزمەتىنە سايلانعان ەرلان تۇرعىنبايەۆ جايلى ءوز پىكىرىن ءبىلدىردى.

«ول تاجىريبەلى، التى جىل مەنىڭ ورىنباسارىم بولدى، ول جۇمىستىڭ بارلىق باعىتىن بىلەدى جانە دۇرىس اتقارا الادى»، - دەدى پرەزيدەنت كەڭەسشىسى - قاۋىپسىزدىك كەڭەسىنىڭ حاتشىسى. قاسىموۆ بۇل قىزمەتكە 12 -اقپاندا تاعايىندالعان ەدى. وسىعان دەيىن ول ىشكى ىستەر ءمينيسترى بولعان.