قىزدار ۋنيۆەرسيتەتى كوپبالالى وتباسىنان شىققان تالاپكەرلەردى جەڭىلدىكپەن قابىلدايدى

الماتى. قازاقپارات - كوپبالالى وتباسىنان شىققان بالالار قازاق ۇلتتىق قىزدار پەداگوگيكالىق ۋنيۆەرسيتەتىندە ءجۇز پايىزدىق جەڭىلدىكپەن ءبىلىم الاتىن بولادى.

بۇل تۋرالى وقۋ ورنىنىڭ باسپا ءسوز قىزمەتىنىڭ جەتەكشىسى جاندار اسان مالىمدەدى، دەپ حابارلايدى قازاقپارات ءتىلشىسى.

ونىڭ ايتۋىنشا، جاستار جىلى قارساڭىندا قولعا الىنعان يگىلىكتى ءىس قىزدار ۋنيۆەرسيتەتى مەن «نۇر وتان» پارتياسى اراسىندا جاسالعان ءوزارا ىنتىماقتاستىق مەموراندۋمى اياسىندا جۇزەگە اسىپ وتىر.

سونىمەن قاتار، الماتى قالاسىنىڭ اكىمدىگى دە باستاماعا قولداۋ ءبىلدىردى.

وقۋ جەڭىلدىگى كوپبالالى وتباسىنان شىققان، مەكتەپتە وقۋ ۇلگەرىمى جاقسى، حالىقارالىق جانە رەسپۋبليكالىق ءپان وليمپيادالارىنىڭ جەڭىمپازدارىنا بەرىلەدى.

«بۇگىندە 3 مەكتەپ وقۋشىسىنا قازاق ۇلتتىق قىزدار پەداگوگيكالىق ۋنيۆەرسيتەتىندە وقۋ گرانتىن الۋعا قۇقىق بەرەتىن ارنايى سەرتيفيكات تابىستالدى. ەندى ولار ءبىلىم مەن عىلىمنىڭ قاراشاڭىراعىندا ءبىلىم الاتىن بولادى» ، - دەدى جاندار اسان.

سونىمەن قاتار «نۇر وتان» پارتياسىنىڭ 2030 -جىلعا دەيىنگى باعدارلاماسىنىڭ «ءاربىر ادام ءۇشىن قولجەتىمدى بولاشاق ءبىلىمى» اتتى ەكىنشى ماقساتىندا قازاقستاننىڭ ءاربىر مەكتەبىندە IT سىنىپتارىن اشۋ، ىرگەلى عىلىمدى دامىتۋ ءۇشىن جاعداي جاساۋ قاجەتتىگى، ءبىلىم بەرۋ جۇيەسىنە ۇزدىك مامانداردى تارتۋ جانە وقۋ پروتسەسىنە تسيفرلىق تەحنولوگيالاردى كەڭىنەن ەنگىزۋدى جۇزەگە اسىرۋ سىندى ماسەلەلەر كوتەرىلدى. بۇل مىندەتتى جۇزەگە اسىرۋ باعىتىندا قىزدار ۋنيۆەرسيتەتىندە ءبىرقاتار جۇمىستار قولعا الىنىپ، جۇزەگە اسىرىلۋدا.

اتاپ ايتقاندا، وقۋ ورنىنىڭ جاس عالىمدارى روبوت تەحنيكاسى بويىنشا ستارتاپ جوبالار جاسايدى. ۋنيۆەرسيتەت بازاسىندا وسى تاراپتا عىلىمي- زەرتتەۋ جۇمىستارىن جۇرگىزۋگە باعىتتالعان ارنايى سەكسيالىق ۇيىرمەلەر قۇرۋ دا كوزدەلىپ وتىر. وندا ۋنيۆەرسيتەت عالىمدارى روبوت تەحنيكاسى بويىنشا وڭىردەگى جوعارى وقۋ ورىندارىنىڭ ستۋدەنتتەرى مەن مەكتەپ وقۋشىلارىن زاماناۋي زەرتحانالىق جۇمىستارعا تارتىپ، ولاردىڭ عىلىمي الەۋەتىن كوتەرمەك. بۇل جەردە جاستاردىڭ روبوت تەحنيكاسى بويىنشا عىلىمي- تەحنيكالىق شىعارماشىلىق قابىلەتىن دامىتۋ ماقسات بولىپ وتىر. بۇعان ۋنيۆەرسيتەتتىڭ ماتەريالدىق- تەحنيكالىق بازاسى تولىق مۇمكىندىك بەرەدى. فيزيكا- ماتەماتيكا فاكۋلتەتىنىڭ جانىنداعى «روبوت تەحنيكاسى» زەرتحاناسى Lego, اrduino جانە Raspberry روبوتتارىمەن، وقۋ- ادىستەمەلىك جانە باعدارلامالىق نۇسقاۋلىقتارمەن جابدىقتالعان.

«نۇر وتاننىڭ» «رۋحاني جاڭعىرۋ» شەڭبەرىندەگى جوبالارىنان كىتاپحانالار دا تىس قالعان جوق، كىتاپحانا قورىن سيفرلاندىرۋدى قولعا الدى. بۇل تاراپتا دا وقۋ ورنىنىڭ عىلىمي كىتاپحاناسىندا ءبىرقاتار جۇمىستار جۇيەلەنىپ، ادەبيەتتەر تسيفرلىق فورماتقا كوشىرىلىپ جاتىر.

ايتا كەتسەك، بۇگىن ەلورداداعى تاۋەلسىزدىك سارايىندا ەلباسى نۇرسۇلتان نازاربايەۆتىڭ توراعالىعىمەن «نۇر وتان» پارتياسىنىڭ كەزەكتى XVIII سەزى ءوتتى. جيىندا مەملەكەت باسشىسى حالىقتى قولداۋعا ارنالعان ءبىرشاما الەۋمەتتىك باستامالاردى قوزعاعان بولاتىن.