قازاقستانداعى ەسكى قوعامدىق كولىكتەردىڭ ورنىن ەكولوگيالىق تازا اۆتوبۋستار باسادى

استانا. قازاقپارات - قازاقستاندا ەكولوگيالىق تازا قوعامدىق كولىكتەر كوبەيەدى، دەپ حابارلايدى قازاقپارات ءتىلشىسى.

بۇل تۋرالى «Allur Group» اۆتوموبيل كومپانيالارى توبىنىڭ پرەزيدەنتى اندرەي لاۆرەنتيەۆ «نۇر وتان» پارتياسىنىڭ كەزەكتى XVIII سەزىندە ايتتى.

«وتكەن جىلى ءبىزدىڭ زاۋىت اقتاۋ، اقتوبە، اتىراۋ قالالارى ءۇشىن ەلەكتر جانە گازبەن جۇرەتىن اۆتوبۋستار شىعاردى. بيىل مىڭ جارىمنان استام جاڭا ەكولوگيالىق اۆتوبۋستار شىمكەنت، پاۆلودار، تالدىقورعان قالالارى ءۇشىن شىعارىلادى. استانا مەن الماتى قالالارىندا JAC ەلەكتر كولىكتەرى ءجۇر. بىرنەشە جىلدا 16 مىڭ ەسكى اۆتوبۋس جاڭارتىلادى.

سونداي-اق، ا. لاۆرەنتيەۆ ەلىمىزدە اگرارلىق سەكتوردى دامىتاتىن مۇمكىندىكتەر زور ەكەنىن، سوندىقتان، ءوز اۋىل شارۋاشىلىعى تەحنيكامىزدى شىعارۋ كەرەكتىگىن ءسوز ەتتى.

«ەلىمىزدەگى اۋىل شارۋاشىلىعى تەحنيكالارىنىڭ تەڭ جارتىسى - ءبىزدىڭ كاسىپورىنعا تيەسىلى. بۇل جىلدارى 4,5 مىڭ كومباين شىعاردىق، ولاردىڭ جالپى قۇنى 200 ميلليون دوللاردان اسادى. بيىل تانىمال پەتەربۋرگ تراكتور زاۋىتىمەن بىرلەسىپ، كيروۆەتس تراكتورلارىن شىعارۋدى باستايمىز»، - دەدى ا. لاۆرەنتيەۆ.

سپيكەر ازاماتتاردىڭ ءومىر ساپاسىن جاقسارتۋ، ينكليۋزيۆتى ەكونوميكا باستاماسىن دامىتۋ، باقۋاتتىلىقتىڭ ءوسۋى، ءاربىر جەكەلەگەن ازامات سەزىنەتىندەي ەكونوميكا قۇرۋعا اتسالىساتىنىن جەتكىزدى.

«ءبىزدىڭ زاۋىتتا مىڭ جارىمعا جۋىق ادام جۇمىس ىستەيدى. بيىل ولاردىڭ ەڭبەك اقىسىن 30 پايىزعا كوتەرىپ، الەۋمەتتىك پاكەتتى كەڭەيتتىك. ءۇش جىل بۇرىن دۋالدى وقىتۋ جۇيەسىن ەنگىزىپ، دانەكەرلەۋشى، بوياۋشى مامانداردى ءوزىمىز دايارلاپ كەلەمىز»، - دەدى ا. لاۆرەنتيەۆ.