ەكى، ءۇش پايىزدىق باسپانا نەسيەلەرى قاشان بەرىلەدى
اتالعان نەسيەلەر تابىسى تومەن كوپبالالى جانە تولىق ەمەس وتباسىلار، سونداي-اق مۇگەدەك بالالاردى اسىراپ وتىرعان ازاماتتارعا بەرىلەدى، دەپ حابارلايدى قازاقپارات ءتىلشىسى.
ق ر پرەمەر-ءمينيسترىنىڭ ورىنباسارى - ق ر قارجى ءمينيسترى ءاليحان سمايىلوۆتىڭ ايتۋىنشا، الدىمەن رەسپۋبليكالىق بيۋدجەتتەن تۇرعىن ءۇي قۇرىلىس جيناق بانكىنە 50 ميلليارد تەڭگە بولىنەدى. بانك ول قاراجاتتى باسقا رەسۋرستارمەن بىرگە جەڭىلدەتىلگەن نەسيەلەردى بەرۋگە جۇمسايدى.
«ءساۋىر ايىندا ءبىز قارجىلاندىرۋدى باستايمىز. ودان كەيىن تۇرعىن ءۇي قۇرىلىس جيناق بانكى نەسيەنىڭ جاڭا ءتۇرىن تەزدەتىپ ازىرلەپ، حالىققا ۇسىنۋى قاجەت. ءبىراق بيىلدان باستاپ 2-3 پروتسەنتتىك نەسيەلەر بەرىلەدى. ول - انىق نارسە»، - دەدى ءا. سمايىلوۆ جۋرناليستەرگە بەرگەن سۇحباتىندا.
ايتا كەتەيىك، بۇگىن «نۇر وتان» پارتياسىنىڭ كەزەكتى XVIII سەزىندە ەلباسى نۇرسۇلتان نازاربايەۆ تابىسى تومەن وتباسىلارعا 2-3 پروتسەنتپەن باسپانا ساتىپ الۋ مۇمكىندىگىن قاراستىرۋدى تاپسىردى.
«تابىسى تومەن كوپبالالى جانە تولىق ەمەس وتباسىلارعا، مۇگەدەك بالالارى بار، از قامتىلعان وتباسىلارعا پاتەر ساتىپ الۋدىڭ قولجەتىمدىلىگىن ارتتىرۋ قاجەت. بۇل ساناتتاعى ازاماتتارعا تۇرعىن ءۇي قۇرىلىس جيناق جۇيەسى ارقىلى جىلدىق 2-3 پايىزبەن تۇرعىن ءۇي زاەمىن بەرۋ تەتىكتەرىن ازىرلەۋدى تاپسىرامىن. ول ءۇشىن تۇرعىن ءۇي قۇرىلىس جيناق بانكىنە قاراجات قاجەت بولادى جانە وعان جىل سايىن 50 ميلليارد تەڭگە ءبولۋدى تاپسىرامىن»، - دەدى ن. نازاربايەۆ.