ءومىرزاق شوكەيەۆ شەتەلدە وقۋدى قىزىل ديپلوممەن ءبىتىرىپ كەلگەن - نۇرسۇلتان نازاربايەۆ

استانا. قازاقپارات - مەملەكەت باسشىسى نۇرسۇلتان نازاربايەۆ «بولاشاق» باعدارلاماسىنىڭ ماڭىزىن ەرەكشە اتاپ ءوتتى. سەبەبى وعان دەيىن شەتەلدە وقىپ كەلگەندەر ءبىراز قيىنشىلىقتارعا تاپ بولعان. سوعان قاراماستان، وقۋدى ۇزدىك ءبىتىرىپ كەلگەندەر از ەمەس، دەپ حابارلايدى قازاقپارات ءتىلشىسى.

«نۇر وتان» پارتياسىنىڭ XVIII سەزىندە «بولاشاق» باعدارلاماسىنىڭ تۇلەگى ءابۋتالىپ ءمۇتالى بارلىق تۇلەكتەردىڭ اتىنان شەتەلدە العان ءبىلىمىن ەل يگىلىگى ءۇشىن جۇمسايتىنىن ايتىپ، ۋادە بەردى. وسى كەزدە پرەزيدەنت «بولاشاق» باعدارلاماسىنىڭ ماڭىزىن ەرەكشە اتاپ ءوتتى.

«بولاشاقپەن» وقۋعا بارعان بالالاردىڭ باسقالاردان ەشبىر ايىرماشىلىعى جوق. قازاقتىڭ ىشىنەن ماتەماتيك تە، فيزيك تە شىعادى. ءبىزدىڭ ىشىمىزدەن شىققان سەن سياقتى بالالار «بولاشاقتىڭ» ارمانىن ورىنداسا، جاقسى بولار ەدى»، - دەدى ن. نازاربايەۆ

وسى ورايدا پرەزيدەنت «بولاشاق» باعدارلاماسىنا دەيىن شەتەلدە وقىپ كەلگەن اعا بۋىننىڭ تاجىريبەسى تۋرالى اڭگىمە ءوربىتتى.

«سەندەر عانا ەمەس، سەندەردەن بۇرىن دا اقىلدى اعالارىڭ بار عوي. مىنا جانىمىزدا وتىرعان ءومىرزاق شوكەيەۆ اعاڭ ماسكەۋگە وقۋعا بارعاندا ءبىرىنشى كۋرستا ءبىر اۋىز ورىسشا بىلمەپتى. سوڭىندا ۋنيۆەرسيتەتتى قىزىل ديپلوممەن ءبىتىرىپ شىقتى. كوردىڭدەر مە؟ ماتەماتيكا- كيبەرنەتيكا ماماندىعى بويىنشا وقىدى. قازىر تۇركىستاندى دۇرىلدەتىپ سالىپ جاتىر»، - دەپ اتاپ ءوتتى ن. نازاربايەۆ.

 ايتا كەتەيىك، بۇگىن مەملەكەت باسشىسى نۇرسۇلتان نازاربايەۆ كوپبالالى وتباسىلاردا ءار بالانىڭ جاردەماقىسىن 21 مىڭ تەڭگەگە دەيىن ارتتىرۋدى تاپسىردى. بۇدان بولەك، مۇگەدەك بالالاردى اسىراپ وتىرعان وتباسىلاردىڭ جاردەماقىسى 30 پروتسەنتكە وسەدى.

اۆتور: ارمان اسقاروۆ