نۇرسۇلتان نازاربايەۆ قازاقستاننىڭ ۇلتتىق يدەياسى تۋرالى ايتىپ بەردى
ول ءۇشىن زاماناۋي الەمنىڭ نەگىزگى ترەندتەرىن ەسكەرىپ، ۇلتتىق يدەيانى باسشىلىققا الۋ كەرەك.
«جاڭا زامان جاڭا سىن-تەگەۋرىندەرىمەن كەلەدى. ءبىزدى قورشاعان الەم توقتاۋسىز تۋربۋلەنتتى ايماققا ەنىپ كەلەدى. ءبىراق بۇل قورقۋ كەرەك دەگەن ءسوز ەمەس. كەز كەلگەن قيىندىق جاڭا وزگەرىستەرمەن كەلىپ، جاڭا مۇمكىندىكتەرگە جول اشادى. ەڭ باستىسى، دامۋدىڭ دۇرىس باعىتىن تاڭداپ، قوعامدى العا قويعان ماقساتتارعا جۇمىلدىرۋ كەرەك. زاماناۋي الەمنىڭ نەگىزگى ترەندتەرىن ەسكەرۋ قاجەت. بۇگىندە مەملەكەتتەر اراسىنداعى باسەكە جەكەلەگەن ادامداردىڭ باسەكەسىنە پارا-پار. كەز كەلگەن ەكونوميكالىق جەتىستىكتەر مەن گەوساياسي جەڭىستەر ءاربىر ادامنىڭ ءال-اۋقاتىن جاقسارتۋعا ىقپال ەتپەسە، ەش ماڭىزى بولمايدى. مۇندا ХХІ عاسىرداعى مەملەكەتتەردىڭ تۇراقتى دامۋىنىڭ سىرى جاتىر»، - دەدى پرەزيدەنت.
ول «نۇر وتان» پارتياسىنىڭ 2030-جىلعا دەيىنگى «باقۋاتتى قوعام: ونجىلدىقتىڭ 10 ماقساتى» اتتى باعدارلاماسىنىڭ ءوز تاپسىرماسىمەن ازىرلەنگەنىن اتاپ ءوتتى.
«بۇگىنگى سەزد قازاقستان دامۋىنداعى جاڭا كەزەڭدى باستايدى. الداعى 10 جىل - الدىڭعى قاتارلى دامىعان مەملەكەتتەردىڭ 30 دىعىنا ەنۋدەگى شەشۋشى كەزەڭ. وسىعان بايلانىستى پارتيا ناقتى ماقساتتار قويۋى ءتيىس. مۇنىڭ بارلىعى باعدارلامادا كورسەتىلگەن. ءارقايسىسىمىزدىڭ گۇلدەنگەن ءارى قۋاتتى قازاقستاندى قالىپتاستىرۋعا ۇلەس قوساتىنىمىزعا سەنىمدىمىن»، - دەدى ەلباسى.
سونىمەن بىرگە، پرەزيدەنت قازاقستاننىڭ تابىستى دامۋىنىڭ نەگىزى بولىپ سانالاتىن ۇلتتىق يدەيانى باسشىلىققا الۋعا شاقىردى.
«ءوز قىزمەتىمىزدە ءبىز ۇلتتىق يدەيامىزدى باسشىلىققا الۋىمىز كەرەك. ونىڭ نەگىزگى قۇراۋشىلارى: ۇلتتىق بىرلىك، باسەكەگە قابىلەتتى قۋاتتى ەكونوميكا، زياتكەرلىك دامىعان قوعام جانە الەم قۇرمەتىنە بولەنگەن مەملەكەت. مۇنىڭ بارلىعى - قازاقستاننىڭ تابىستى دامۋىنىڭ نەگىزى. ءوز كەزەگىندە ۇلتتىق بىرلىك دوكتريناسىنىڭ ءتورت تىرەگى بار - ورتاق تاريح، ورتاق قۇندىلىقتار، ورتاق وتان جانە ورتاق بولاشاعىمىز»، - دەدى پرەزيدەنت.
ايتا كەتەيىك، ەلورداداعى تاۋەلسىزدىك سارايىندا ەلباسى نۇرسۇلتان نازاربايەۆتىڭ توراعالىعىمەن «نۇر وتان» پارتياسىنىڭ كەزەكتى XVIII سەزى ءوتىپ جاتىر.